އޮސްޓްރިއާ އަދި އަފްގާނިސްތާނުގައި ދިން ހަމަލާތައް ރާއްޖެއިން ކުށްވެރިކޮށްފި

އޮސްޓްރިއާގެ ވެރިރަށް ވިއެނާގެ އެކި ސަރަހައްދުތަކުގައި ރޭ ދިން ބަޑީގެ ހަމަލާ އާއި އަފްގާނިސްތާނުގެ ވެރިރަށް ކާބުލްގެ ކާބުލް ޔުނިވާސިޓީއަށް ހަތިޔާރު އެޅި ބަޔަކު ވަދެ ހަމަލާދީ، އެތައް ބަޔަކު މަރާލި ހާދިސާ ރާއްޖެއިން ކުށްވެރި ކޮށްފިއެވެ.

އެ ހަމަލާތައް ކުށްވެރިކޮށް ފޮރިން މިނިސްޓަރު އަބްދުﷲ ޝާހިދު ވަނީ އެ ދެގައުމަށްވެސް ތައުޒީޔާގެ މެސެޖް ފޮނުއްވާފައެވެ. އޮސްޓްރިއާގެ ފޮރިން މިނިސްޓަރު އެލެގްޒެންޑާ ޝެލެންބާގްއަށް ފޮނުއްވި ތައުޒިޔާގެ މެސެޖްގައި ޝާހިދު ވިދާޅުވީ، އެ ހަމަލާގައި މަރުވި ފަރާތްތަކުގެ އާއިލާތަކަށް ތައުޒިޔާ ފޮނުއްވާ ކަމަށާއި، މި ދަނޑިވަޅުގައި ދިވެހި ސަރުކާރާއި ރައްޔިތުން ތިބީ އޮސްޓްރިއާ އާއެކު ކަމަށެވެ.

އަދި ރާއްޖެއިން ހުރިހާ ބާވަތެއްގެ ޓެރަރިޒަމް ކުށްވެރިކުރާކަމަށް ޝާހިދުގެ މެސެޖްގައި ވިދާޅުވިއެވެ. އޮސްޓްރިއާގައި ދިން ހަމަލާތަކުގައި 4 މީހަކު މަރުވެ، 17 މީހަކަށް ވަނީ އެކިވަރުގެ އަނިޔާތައް ލިބިފައެވެ. ވިއެނާގައި ދިން ހަމަލާ އަކީ ޓެރަރިސްޓު ހަމަލާއެއް ކަމަށް އެ ގައުމުން ވަނީ ބުނެފައެވެ.

އޭގެ އިތުރުން އަފްގާނިސްތާނުގެ ވެރިރަށް ކާބުލްގެ ކާބުލް ޔުނިވަސިޓީއަށް ހަތިޔާރު އެޅި ބަޔަކު ވަދެ ހަމަލާދީ، އެތައް ބަޔަކު މަރާލި ހާދިސާ ކުށްވެރިކުރައްވައި، އެ ގައުމުގެ ވަގުތީ ފޮރިން މިނިސްޓަރު މުހައްމަދު ހަނީފު އަތުމާރްއަށް ޝާހިދު ފޮނުއްވި މެސެޖްގައި، ހަމަލާގައި މަރުވި ފަރާތްތަކުގެ އާއިލާތަކަށް ތައުޒިޔާ ރައްދުކޮށްދެއްވުމަށް އެދިވަޑައިގެން، ޓެރަރިޒަމްގެ ހުރިހާ ބާވަތެއް ރާއްޖެއިން ކުށްވެރިކުރާ ކަމަށް ވިދާޅުވިއެވެ. އަދި އަފްގާނިސްތާނު ގައި އަމާންކަމާއި ހަމަޖެހުން ގާއިމްކުރުމަށް އެގައުމުން ކުރަމުންދާ މަސައްކަތުގައި ދިވެހި ސަރުކާރާއި ރައްޔިތުން، އަފްގާނިސްތާން ސަރުކާރާއެކު އޮތް ކަމަށް މިނިސްޓަރ ޝާހިދު ވިދާޅުވިއެވެ.

އަފްގާނިސްތާނުގައި ދިން ހަމަލާގައި 19 މީހުން ވަނީ މަރާލާފައެވެ. މިއީ އެ ގައުމުގެ ތައުލީމީ މަރުޒަކަށް އެއް ހަފްތާ ތެރޭ ދިން ދިން ދެވަނަ ހަމަލާއެއް. މީގެ ކުރިން ދިން ހަމަލާ އާއި ގުޅިގެން ވެސް ޝާހިދު ވަނީ ހަމްދަރުދީގެ މެސެޖެއް ފޮނުއްވާފައެވެ.