ހަގީގީ ޓެރަރިސްޓަކީ މެކްރޯން: އިންޑޮނޭޝިއާގެ މުސްލިމުން

ހަގީގީ ޓެރަރިސްޓަކީ ފްރާންސްގެ ރައީސް އެމެނުއެލް މެކްރޮން ކަމަށް ބުނެ އިންޑޮނޭޝިއާގެ މުސްލިމުން އަޑުއުފުލާ، ނުރުހުންފާޅުކޮށްފިއެވެ.

ހޯމަ ދުވަހު އިންޑޮނޭޝިއާގެ މުސްލިމް އާބާދީގެ ގިނަ އަދަަދެއްގެ ބަޔަކު ވަނީ އެ ގައުމުގައި ހުންނަ ފްރާންސްގެ އެމްބަސީ ދޮށަށް އެއްވެ އިހުތިޖާޖު ކޮށްފައެވެ. މި އެއްވުމުގު ބަިއވެރިން ފްރާންސްގެ ރައީސް އަކީ ހަގީގީ ޓެރަރިސްޓްގެ ގޮތުގައި ލޭބަލްކޮށްފައިވާއިރު، އެ ގައުމުގައި ހުރި ފްރާންސްގެ އެމްބެސެޑަރ ވަގުތުން އެ ގައުމުން ބޭރުކުރުމަށް ވެސް ވަނީ ގޮވާލާފައެވެ.

މީގެ އިތުރުން މި އެއްވުމުގެ ބައިވެރިން ވަނީ ރައީސް މެކްރޯން މުސްލިމުންނޭ ކިޔައިގެން ދެއްކެވި ވާހަކަފުޅުތައް އަނބުރާ ގެންގޮސް ހުރިހާ މުސްލިމުންގެ ކިބައިން މާފަށް އެދުމަށް ގޮވާލާފައެވެ. އެގޮތުން ރޮއިޓާސްއާ ވާހަކަ ދައްކަމުން އެއްވުމުގެ ބައިވެރިއެއް ބުނީ މުސްލިމުން މެކްރޯންއަށް މައާފު ކުރާނެ ކަމަށާއި އެހެން ނަމަވެސް އޭނާ ދެއްކެވި ވާހަކަތައް އަނބުރާ ނުގެންގޮސްފިނަމަ ﷲ ގެ އިރާދަފުޅުން އޭނާއަށް އަބަދުވެސް މުސްލިމުން ނަފުރަތު ކުރާނެ ކަމަށް ބުނެފައެވެ.

އިންޑޮނޭޝިއާގައި ކުރިއަށް ގެންދިޔަ މި މުޒާހާރާގެ ބައިވެރިން ވަނީ ކަޅު ހެދުމުގައި މާސްކު އަޅައިގެން ނުކުމެ، ފްރާންސްގެ ރައީސްގެ ކާޓޫން ހިމެނޭ ބެނާތަކެއް ބޭނުން ކޮށްފައެވެ. އެ ކާޓޫންތަކުގައި މެކްރޯންގެ ސިފަ ޝައިތާނާގެ ސިފައާ ވަނީ އެއްވައްތަރުކޮށްފައެވެ. މުޒާހަރާގެ ބައިވެރިން ވަނީ ފްރާންސްގެ ޕްރޮޑަކްޓްތައް ބޮއިކޮޓް ކުރަން ވެސް ގޮވާލާފައެވެ.