މެނޭޖްމަންޓް ސޮފްޓްވެއަރ ގަނެފައި ވާނީ މާލިއްޔަތު ގާނޫނާ އެއްގޮތަށް: އައިޖީއެމްއެޗް
14 ފަރާތަކުން ބީލަމަށް ރަޖިސްޓްރީ ކުރި
އިންދިރާ ގާންދީ މެމޯރިއަލް ހޮސްޕިޓަލް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ގަނެފައިވާ މެނޭޖްމަންޓް ސޮފްޓްވެއަރއާ ގުޅިގެން މީސް މީޑިއާގައި ދައުރުވަމުން ދަނީ ހަގީގަތާ ހިލާފު ވާހަކަތަކެއް ކަމަށް އެ ހޮސްޕިޓަލުން ބުނެފިއެވެ.
މިކަން ހާމަކޮށް އައިޖީއެމްއެޗުން ނެރެފައިވާ ނޫސް ބަޔާނެއްގައި ބުނެފައި ވަނީ، ޑުބާއީގެ ކުންފުންޏަކުން ގަނެފައިވާ ހޮސްޕިޓަލް މެނޭޖްމަންޓް ސޮފްޓްވެއަރއަކީ ފިނޭންސް މިނިސްޓްރީގެ ނެޝަނަލް ޓެންޑަރ ބޯޑު މެދުވެރިކޮށް ބައިނަލްއަޤްވާމީ ބީލަމަށް ހުޅުވާލައި، ބީލަމުގެ އެންމެހާ ކަންތައްތަކެއް ދައުލަތުގެ މާލިއްޔަތުގެ ޤާނޫނާއި ޤަވައިދާއި އެއްގޮތަށް ކުރިއަށް ގެންގޮސް، ގަނެފައިވާ ސޮފްޓްވެއަރއެއް ކަމަށެވެ.
މި ނޫސް ބަޔާނުގައި އިތުރަށް ބުނެފައި ވަނީ، އައިޖީއެމްއެޗުން ހުޅުވާލި ބީލަމާއި ބެހޭ މައުލޫމާތު 29 ސެޕްޓެމްބަރު 2019 ގައި އާންމުކޮށް، 14 ފަރާތަކުން ބީލަމަށް ރަޖިސްޓްރީ ކުރި ކަމަށެވެ. ނަމަވެސް ބީލަން ހުށަހަޅާފައި ވަނީ 9 ފަރާތަކުން ކަމަށް މި ނޫސް ބަޔާނުގައި ބުނެފައިވެއެވެ. އަދި "ތްރީ-ޓަޔަރ އެންވެލޯޕް" އުސޫލުން ކުރިއަށްގެންދިޔަ ބީލަން ކާމިޔާބުކޮށްފައިވާ ފަރާތް ހޮވާފައި ވަނީ މި އަހަރުގެ ޖެނުއަރީ މަހުގެ 20 ވަނަ ދުވަހު ކަމަށް އައިޖީއެމްއެޗުން ބުނެއެވެ.
މީގެ އިތުރުން އައިޖީއެމްއެޗުން ބުނެފައި ވަނީ މެނޭޖްމެންޓް ސޮފްޓްވެއަރގެ ބީލަމުގައި ދިގު މުއްދަތެއްގެ ޕްރޮޑަކްޓް ސަޕޯޓް އެއްބަސްވުމެއް ހިމެނޭ ކަމަށާއި އަދި ހޮސްޕިޓަލްގެ މުވައްޒަފުން ސޮފްޓްވެއަަރއަށް ތަމްރީން ކުރުމުގެ ޕްރޮގްރާމަކާ އެކު ސޮފްޓްވެއަރ ބޭނުންކުރަން ފެށުމަށް ކުރަންޖެހޭ މަސައްކަތްތައް ހަލުވި ދުވެލީގައި ކުރިއަށްދާ ކަމަށެވެ.
އައިޖީއެމްއެޗުން ވަނީ އެ ހޮސްޕިޓަލުން ގަނެފައިވާ ސޮފްޓްވެއަރގެ ޓެކްނިކަލް ގާބިލްކަމާ މެދު ފުރިހަމަ ޔަގީންކަން ރައްޔިތުންނަށް ދޭ ކަމަށް ބުނެފައެވެ.
