ހޮސްޕިޓަލްގައި އެޑްމިޓްކޮށް ކޮވިޑް-19 އަށް ފަރުވާ ހޯދުމުން ދިޔަ ބްރެޒިލްގެ ހެލްތު މިނިސްޓަރ އެޑުއާޑޯ ޕަޒުއެލޯއަށް އިތުރު ފަރުވާ ދިނުމަށް ފަހު ހޮސްޕިޓަލުން ދޫކޮށްލައިފިއެވެ.

އެޑުއާޑޯ ކޮވިޑް-19 ޕޮޒިޓިވްވެފައިވާ ކަމަށް އޮކްޓޫބަރ މަހުގެ 21 ވަނަ ދުވަހު އިއުލާންކޮށްފައިވާއިރު، އެ މަނިކުފާނަށް އިތުރު ފަރުވާ ދިނުމަށް އެ ގައުމުގެ އަސްކަރީ ހޮސްޕިޓަލްގައި އެޑްމިޓްކޮށްފައި ވަނީ އޮކްޓޫބަރ މަހުގެ 31 ވަނަ ދުވަހުއެވެ. ޕަޒުއެލޯގެ ހަށިގަނޑުން ވަރަށް ބޮޑަށް ފެން މަދުވުމުގެ ސަބަބުން މީގެ ކުރިންވެސް ހޮސްޕިޓަލްގައި އެޑްމިޓްކޮށް ފަރުވާ ހޯއްދަވާފައިވެއެވެ.

ޕަޒުއެލޯ ސިއްހީ ވުޒާރާއާ ހަވާލުވެވަޑައިގެންނެވީ ކުރިން އެ މަގާމުގައި ތިއްބެވި ވަޒީރުންނާ އެ ގައުމުގެ ރައީސްއާ ހިޔާލު ތަފާތުވުން އުފެދި، މަގާމުން އިސްތިއުފާދެއްވުމާ ގުޅިގެންނެވެ.

ދުނިޔޭގައި ކޮވިޑް ބަލީގެ ހާލަތު އެންމެ ގޯސް ގައުމުތަކުގެ ތެރޭގައި ހިމެނޭ ބްރެޒިލްގެ ރައީސް ޖައީރް ބޮލްސޮނާރޯ އާއި އެ މަނިކުފާނުގެ އަބިކަނބަލުންގެ އިތުރުން ކެބިނެޓްގެ 23 ވަޒީރުންނާއި މުވައްޒަފުން ވަނީ ކޮވިޑް ބަލި ޖެހުނެވެ.

ބްރެޒިލްގައި މިހާތަނަށް 5,545,705 މީހުން ބްރެޒިލްގައި ކޮވިޑަށް ޕޮޒިޓިވްވެފައިވާއިރު، އެ ގައުމުން ބަލި ޖެހުނު 160,104 މީހުން ވަނީ މަރުވެފައެވެ.