ވާރޗުއަލްކޮށް ޖަލްސާ ބޭއްވުމަށް އެންގުމުން ޝުޖާއު "ރަތަށް"!
1 ނޮވެމްބަރު 2020 | އާދީއްތަ 10:54ޝުޖާއު ވިދާޅުވީ އިދިކޮޅު ކޯލިޝަނުން ތިބީ، މިގޮތަށް ވާރޗުއަލްކޮށް ކަންކަން ކުރުމަށް، ފަސް އަހަރުގެ ދައުރެއް ނިންމަން ދޭގޮތަކަށް ނޫން ކަމަށް
ޕީއެންސީގެ ނައިބު ރައީސް އިބްރާހިމް ޝުޖާއު، އިދިކޮޅު ކޯލިޝަނުން ދާދިފަހުން ބޭއްވި އެއްވުމެއްގެ ތެރެއިން
އިދިކޮޅު ކޯލިޝަން ޕީޕީއެމް/ޕީއެންސީ އިން އަންގާރަ ދުވަހު މާލޭގައި ބޭއްވުމަށް ހަމަޖައްސާފައިވާ ޖަލްސާ ވާޗުއަލްކޮށް ބޭއްވުމަށް ހެލްތު ޕްރޮޓެކްޝަން އެޖެންސީން (އެޗްޕީއޭ) އެންގުމާ ގުޅިގެން، އިދިކޮޅު ކޯލިޝަނުން ހިތްހަމަ ނުޖެހުން ފާޅުކޮށްފި އެވެ.
ނޮވެމްބަރު 3 ފާހަގަކުރުމަށް "ބަޑި ބުރާސްފަތި" ގެ ނަމުގައި އިދިކޮޅުން ބާއްވަން ބޭނުންވި ޖަލްސާއާ ގުޅޭގޮތުން އެޗްޕީއޭ އަށް ފޮނުވި ސިޓީގެ ޖަވާބުގައި އެ ޖަލްސާ ވާޗުއަލްކޮށް ބޭއްވުމަށް އަންގާފައިވާ ކަމަށް ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވިއެވެ. އަދި ޖަލްސާ ބޭއްވުމަށް ކާނިވާ ސަރަހައްދަށް އެދުމުން އެ ހުއްދަ ދެވެން ނެތް ކަމަށް މާލޭ ސިޓީ ކައުންސިލުން އަންގާފައިވާ ކަމަށް ވެސް ޝުޖާއު ވިދާޅުވި އެވެ.
"ރާއްޖެއެމްވީ"އަށް މައުލޫމާތު ދެއްވަމުން ޝުޖާއު ވިދާޅުވީ، އިދިކޮޅު ކޯލިޝަނުން ޖަލްސާއެއް ނުވަތަ އެއްވުމެއް ބާއްވާއިރަށް އެޗްޕީއޭއަށް ވަރަށް ކަންބޮޑުވާ ކަމަށެވެ. އަދި ސަރުކާރުގެ އިސްވެރިންނާއި ސަރުކާރު ކުންފުނިތަކުގެ ވެރިން ކޮވިޑް-19 ނެތް ރަށްރަށަށް އަރަމުންދާއިރު، އެކަމަށް އެޗްޕީއޭއަށް އެއްވެސް ފިޔަވަޅެއް އެޅޭތަނެއް ނުފެންނަ ކަމަށެވެ.
ޝުޖާއު ވިދާޅުވީ، އުތީމުުގައި މިއަހަރުގެ ގައުމީ ޖަލްސާ ބޭއްވުމަށް އެރަށަށް ސަރުކާރުގެ އިސްވެރިން ހިމެނޭ ގޮތަށް މާލެއިން ގިނަ ބަޔަކު ވަޑައިގެންނެވިއިރު، އެރަށަކީ ކޮވިޑް-19ގެ ކަންކަން ވަރަށް ރަނގަޅަށް މެނޭޖް ކުރަމުންދާ ރަށެއް ކަމަށެވެ. އަދި އެރަށަަށް ގިނަ ބަޔަކު ދިއުމާ ގުޅިގެން ރަށުގެ ރައްޔިތުންގެ ހިތްހަމަ ނުޖެހުން ހުރިކަމަށްވެސް ޝުޖާއު ވިދާޅުވި އެވެ.
މީގެއިތުރުން ޝުޖާއު ވިދާޅުވީ، އިދިކޮޅި ކޯލިޝަނުގެ ޖަލްސާ ވާރޗުއަލްކޮށް ބޭއްވުމަށް އެޗްޕީއޭއިން އެންގިއިރު، އެމްޓީސީސީއާއި ފެނަކަ ކޯޕަރޭޝަންގެ އިސްވެރިން އިރުއިރުކޮޅާ ކޮންމެވެސް ރަށަކަށް ވަޑައިގެންނަވާއިރު، އެބޭފުޅުން ކުރައްވާ ކަންކަން ވާރޗުއަލްކޮށް ކުރުމަށް އެޗްޕީއޭއިން އެންގުމަށް ގޮވާލައްވާ ކަމަށެވެ.
ޝުޖާއު ވިދާޅުވީ، އެޗްޕީއޭއިން ދައްކާ ވާހަކަ ދިމާނުވާ ކަމަށާއި، އިދިކޮޅު ކޯލިޝަނުން ޖަލްސާއެއް ބާއްވަން ނުވަތަ ކަމެއްކުރަން ރާވާއިރަށް ވާރޗުއަލްކޮށް އެކަމެއް ކުރަން އެޗްޕީއޭއިން އެންގުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ. އަދި މިގޮތަށް ވާރޗުއަލްކޮށް ކަންކަން ބޭއްވުމަށް ފަސް އަހަރުގެ ދައުރެއް ނިންމަން ދޭގޮތަށް އިދިކޮޅު ކޮލިޝަނުން ބަލަހައްޓައިގެން ނުތިބޭނެ ކަމަށްވެސް ޝުޖާއު ވިދާޅުވި އެވެ.
ޝުޖާއު ވިދާޅުވީ، އެމްޑީޕީގެ ކަލަންޑުގައި 3 ނޮވެމްބަރު ނެތް ނަމަވެސް ކުރީގެ ރައީސް އަބްދުﷲ ޔާމީންގެ ފިކުރުގެ މީހުންގެ ކަލަންޑުގައި އެ ދުވަސް އޮންނާނެ ކަމަށާއި އެ ތާރީހު ފާހަގަކުރަން ރައްޔިތުންގެ ތާއީދާއެކީގައި ވީ ހާލެއްގައި ޖަލްސާ ބާއްވާނެ ކަމަށްވެސް ޝުޖާއު ވިދާޅުވިއެވެ. އަދި އެ ޖަލްސާ ދެން ބާއްވާނީ ޕީޕީއެމް އޮފީހުގެ ކުރިމަތީގައި ކަމަށް ވެސް ޝުޖާއު ވިދާޅުވިއެވެ.
