ޖިނާއީ އަދުލުގެ ނިޒާމުގެ އިދާރާތަކުގެ ގުޅުން ރަނގަޅު ކުރުމަށް ރައީސްގެ އެދިވަޑައިގަތުމެއް ޕީޖީއަށް!
1 ނޮވެމްބަރު 2020 | އާދީއްތަ 07:11ޕީސީސީއާރު އިން ރައީސަށް ރިކޮމެންޑޭޝަން ރިޕޯޓެއް ހުށައަޅާފައިވޭ
އާދިއްތަ ދުވަހު ރާއްޖެޓީވީގެ \"ފަށާއިރު\" ޕްރޮގްރާމްގައި ޕީޖީ ޝަމީމް ވާހަކަ ދައްކަވަނީ
ޖިނާއީ އަދުލުގެ ނިޒާމުގައި ހިމެނޭ މުއައްސަސާތަކުގެ ގުޅުން ރަނގަޅު ކުރުމަށް ކުރަންޖެހޭ މަސައްކަތްތައް ކުރެއްވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމްއާއި ޙަވާލު ކުރައްވައިފިއެވެ.
އާދިއްތަ ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުން ޕީޖީ ވިދާޅުވީ، ކުރީގެ ސަރުކާރުގައި ހިންގި ޚިޔާނާތްތައް ބަލަން ރައީސް އިބްރާހިމް މުހައްމަދު ސޯލިހް އުފެއްދެވި އެސެޓް ރިކަވަރީ ކޮމިޝަން (ޕީސީސީއާރު) އިން ރައީސަށް ރިކޮމެންޑޭޝަން ރިޕޯޓެއް ހުށައަޅާފައިވާ ކަމަށެވެ. އަދި ޖިނާއީ ޢަދުލުގެ ނިޒާމުގައި ހިމެނޭ މުއައްސަސާތަކުގެ ގުޅުން ރަނގަޅު ކުރަންޖެހޭ ކަމަށް ފެންނަ ކަމަށް ކޮމިޝަނުގެ ރިޕޯޓުގައި ބަޔާން ކޮށްފައިވާ ކަމަށް ޕީޖީ ވިދާޅުވިއެވެ.
ޕީޖީ އިތުރަށް ވިދާޅުވީ، ޤާނޫނު އަސާސީގެ 115 ވަނަ މާއްދާއިން ދައުލަތުގެ މުއައްސަސާތައް ހިނގަނީ އެންމެ ރަނގަޅަށްތޯ ކަށަވަރު ކުރުމަށް އަޅުއްވަން ޖެހޭ ފިޔަވަޅުތައް އެޅުއްވުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށެވެ. އަދި އެގޮތުގެ މަތިން ރައީސްގެ ސިޓީފުޅެއް ލިބިވަޑައިގެންފައިވާ ކަމަށް ޕީޖީ ޝަމީމް ވިދާޅުވިއެވެ.
ޤާނޫނު އަސާސީގެ 115 ވަނަ މާއްދާގައި ބަޔާން ކޮށްފައިވަނީ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކެވެ. އެގޮތުން އެ މާއްދާގެ (ށ) ގައި ބުނެފައި ވަނީ ސަރުކާރުގެ އިދާރާތައް ގުޅިގެން ހިންގުންތެރިކަމާއެކު މަސައްކަތް ކުރޭތޯ ބެއްލެވުމަކީ ރައީސުލްޖުމްހޫރިއްޔާގެ މަސްއޫލިއްޔަތެއް ކަމަށެވެ.
ޕީޖީ ވިދާޅުވީ، އޭގެ ނަތީޖާއެއްގެ ގޮތުން ތަހުޤީޤީ އިދާރާތަކާއި ގުޅިގެން ބޮޑެތި މައްސަލަތައްވެސް ދެބަސްވުމެއް ނުވަތަ ޙިޔާލު ތަފާތުވުމެއް ނެތި ކޯޓަށް ހުށައެޅި ޝަރީއަތްތައް ކުރިއަށްދާނެ ކަމަށެވެ. އަދި ރައީސްގެ ވެސް އެދިވަޑައިގަތުމަކީ އެއީކަން ޕީޖީ ފާހަގަ ކުރެއްވިއެވެ.
އޭގެ އިތުރުން، މަޤާމުގެ ޒިންމާއާ ޙަވާލުވެވަޑައިގެން، ފުރިހަމަ ކުރެއްވުމަށް ކަނޑައަޅާފައިވާ ލަނޑުދަނޑިތައް ހާސިލު ކުރެވޭނެ ކަމުގެ ފުރިހަމަ ޔަޤީންކަން އެބަ އޮތް ކަމަށްވެސް ޝަމީމް ވިދާޅުވިއެވެ.
