ފިރިހެން ކުއްޖަކާއެކު ގަދަކަމުން ޖިންސީގުޅުން ހިންގި މީހަކު ވޭމަންޑޫން ހައްޔަރުކޮށްފި

ފިރިހެން ކުއްޖަކާއެކު ގަދަކަމުން ޖިންސީ ގުޅުން ހިންގި މީހަކު ތ. ވޭމަންޑޫ އިން ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލް ވިދާޅުވީ ކުޑަކުއްޖަކާއެކު އެއްޖިންސުން ގުޅުން ހިންގި ކަމަށް ތުހުމަތު ކުރެވޭ މައެްސަލައަކާ ގުޅިގެން ހުކުރު ދުވަހު ވޭމަންޑޫން މީހަކު ހައްޔަރުކޮށްފައިވާ ކަމަށެވެ.

މައުލޫމާތު ލިބިފައިވާ ގޮތުގައި މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 44 އަހަރުގެ ފިރިހެނެކެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެ މީހާ ހައްޔަރުކުރީ އުމުރުން 15 އަހަރުގެ ކުއްޖަކާ ގަދަކަމުން ޖިންސީ ގުޅުން ހިންގި ކަމަށް އެ ރަށުގެ ރައްޔިތުން ރިޕޯޓްކުރި މައްސަލައަކާ ގުޅިގެންނެވެ. އަދި އެ ކުއްޖާއާއެކު ތަކުރާރުކޮށް ގަދަކަމުން ޖިންސީ ގުޅުން ހިންގާފައިވާ ކަމުގެ ތުހުމަތު އެ މީހާގެ މައްޗަށް ކުރެވެއެވެ.

މި މައްސަލައާ ގުޅިގެން ހައްޔަރުކުރި މީހާގެ ބަންދާ މެދު ގޮތެއް ނިންމުމަށް ތ. މަޑިފުށީ ކޯޓަށް ހާޒިރުކުރުމުން، ހޯމް މިނިސްޓްރީއިން ކަނޑައަޅާތަނެއްގައި ބަންދުކޮށްގެން ތަހުގީގު ކުރިއަށް ގެންދިއުމަށް، 15 ދުވަހުގެ ބަންދުގެ މުއްދަތެއް ވަނީ ޖަހައިދީފަ އެވެ.