އެމްޑީޕީގައި ފެކްޝަނެއް އޮތް ކަމަށް އިދިކޮޅުން ބުނަނީ ފިތުނަ އުފައްދަން: އިންތި
1 ނޮވެމްބަރު 2020 | އާދީއްތަ 04:24މަޑުއްވަރީ ދާއިރާގެ މެންބަރު އާދަމް ޝަރީފް ވަނީ އެމްޑީޕީގައި ދެ ފެކްޝަނެއް އޮތް ކަމަށް ވިދާޅުވެފައި
އިމްތިޔާޒް ފަހުމީ، އަދި ރައީސް ޞާލިހާއި ރައީސް ނަޝީދު
ވެރިކަންކުރާ މައި ޕާޓީ އެމްޑީޕީގައި ފެކްޝަނެއް އޮތް ކަމަށް ބުނެ، އިދިކޮޅުން އެވާހަކަ ދައްކަނީ ސަރުކާރާއި ޕާޓީގެ އާންމު މެންބަރުންގެ މެދުގައި ފިތުނަ ފަސާދަ އުފެއްދުމުގެ މަގްސަދުގައި ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.
އިމްތިޔާޒް މިހެން ވިދާޅުވިއިރު، މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވަނީ ފާއިތުވި ހަފްތާގައި ގާނޫނޫއަސާސީ އަށް ހުށަހަޅާފައިވާ އިސްލާހަށް ބަހުސް ކުރައްވަމުން އެމްޑީޕީގައި ދެ ފެކްޝަނެއް އޮތް ކަމަށް ދޭހަވާ މޭރުމަކުން ވާހަކަ ދައްކަވާފައެވެ. އަދި އެކަމާއި ގުޅިގެން އެމްޑީޕީގެ އިނގުރައިދޫ ދާއިރާގެ މެންބަރު ހަސަން އަހުމަދު ވަނީ ނިޒާމީ ނުކުތާއެއް ނަންގަވާ އެކަމަށް ރައްދު ދެއްވާފައެވެ.
ރާއްޖެޓިވީގެ "ސިޔާސީ ދުނިޔެ" ޕްރޮގްރާމުގައި ވާހަކަ ދައްކަވަމުން އިމްތިޔާޒް ވިދާޅުވީ، އެޕްޑީޕީ ބަލިކަށި ކުރުމަށްޓަކައި ރައްޔިތުންނަށް ވަސްވާސް ދީގެން އެ ޕާޓީގެ އެތެރޭގައި ފެކްޝަނެއް އޮންނަ ކަމަށް ދޭހަވާގޮތަށް ވާހަކަ ދެއްކުމަކީ އިދިކޮޅު ޕާޓީތަކުގައި މަސައްކަތް ކުރާ ފަރާތްތަކުން ވަރަށް ބޭނުންވާނެ ކަމެއް ކަމަށެވެ. އަދި އެގޮތަށް ވާހަކަ ދެއްކި ނަމަވެސް، އެބޭފުޅުން ބޭނުންވާ މަގްސަދު ހާސިލް ނުވާނެ ކަމަށް އިމްތިޔާޒް ވިދާޅުވިއެވެ.
އިމްތިޔާޒް ވިދާޅުވީ ރައީސް އިބްރާޙީމް މުހައްމަދު ޞާލިހާއި، ރައީސް މުހައްމަދު ނަޝީދަކީ ރައްޔިތުންނަށް ދެރަ ގޮތެއް ހައްދަވާނެ ދެ ބޭފުޅުން ނޫން ކަމަށެވެ. އަދި ހަމަ އެއާއެކު އެޕްޑީޕީއަކީ އެތަކެއް ބައިވަރު މެންބަރުންނަކާއެކު، އެތައް ގުރުބާނީތަކެއް ވެގެން މިހިސާބަށް އައިސްފައިވާ ޕާޓީއަކަށްވާއިރު، އެޕާޓީން މި ގައުމުގު އެއްވެސް ރައްޔިތަކަށް ދެރައެއް ދިނުމަށް ނޭދޭނެ ކަމަށެވެ. އިމްތިޔާޒް ވިދާޅުވީ، މިވަގުތުވެސް ރާއްޖޭގެ ރައްޔިތުންނަށް އޮތް ހަމައެކަނި އުންމީދަކީ އެމްޑީޕީ ކަމަށެވެ.
އިދިކޮޅު ފަރާތްތަކުން އަންނަނީ ރައީސް ނަޝީދާއި، ތުޅާދޫ ދާއިރާގެ މެންބަރު ހިސާން ހުސައިން ޖޭއެސްސީގައި އިންނަވާ އިންނެވުމަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަމުންނެވެ. އެކަމާއި ގުޅިގެން އިމްތިޔާޒް ވިދާޅުވީ އެފަރާތްތަކުން އެގޮތަށް ވާހަކަ ދައްކަނީ ގާނޫނޫ އަސާސީ ރަނގަޅަށް ނޭނގޭތީ ކަމަށެވެ. އަދި ރައީސް ނަޝީދާއި ހިސާން އެ މަގާމުގައި ތިއްބަވަނީ ގާނޫނޫ އަސާސީން އެގޮތަށް ލާޒިމްކޮށްފައި އޮތުމުން ކަމަށެވެ.
އިމްތިޔާޒް ވިދާޅުވީ ރައީސް މުހައްމަދު ނަޝީދު ޖޭއެސްސީގައި އިންނެވި ނަމަވެސް އިންސާފުން ބޭރުން ވަކި ފަރާތަކަށް ވަކި ގޮތަކަށް ހުކުމް ކުރުމަކަށް އެދިވަޑައި ނުގަންނަވާނެ ކަމަށެވެ. އަދި ހަމަ އެހެންމެ އެއްވެސް ރައްޔިތަކަށް ދެރަގޮތެއް ވުމަށް ރައީސް ނަޝީދު މަސައްކަތް ނުކުރައްވާނެ ކަމަށް ވެސް އިމްތިޔާޒް ވިދާޅުވިއެވެ.
އިމްތިޔާޒް ވަނީ އިދިކޮޅު ފަރާތްތަކުގެ ޓީވީ ޗެނަލަކުން ރާއްޖޭގެ ރައްޔިތުންގެ މެދުގައި ފިތުނަ އުފެއްދުމަށް ކުރުމުންދާ މަސައްކަތް ކުއްވެރިކޮށް، އެކަންކަން ހަމަ މަގަށް އެޅުވުމަށް ގޮވާލައްވާފައެވެ.
