ކޮވިޑްގެ ނުރައްކާ ބޮޑުވެ ނޮވެމްބަރު މަހުގެ 5 ވަނަ ދުވަހުން ފެށިގެން އިނގިރޭސިވިލާތުން ލޮކްޑައުންއަކަށް ދިއުމަށް ނިންމާފައިވާކަމަށް އެގައުމުގެ ބޮޑުވަޒީރު ބޮރިސް ޖޯންސަން ވިދާޅުވެއްޖެއެވެ.
ހޮނިހިރު ދުވަހު ގައުމާއި މުހާތަބު ކުރައްވާ ޖޯންސަން ވިދާޅުވީ އަންނަ ބުރާސްފަތި ދުވަހުން ފެށިގެން ލޮކްޑައުންއަކަށް ދިއުމަށް އެގައުމުން ނިންމާފައިވާ ކަމަށާއި، އެހެންކަމުން ރެސްޓޯރެންޓުތަކާއި ފިހާރަތަކުގެ އިތުރުން ގައުމުގެ ބޯޑަރުވެސް ކުރިއަށް އޮތް ހަތަރު ހަފްތާއަށް ބަންދުވާނެ ކަމަށެވެ. އަދި މި ދުވަސްތަކުގައި އެއްވެ އުޅުން މަނާވާނެ ކަމަށާއި ގެއިން ބޭރަށް ނުކުމެ ހެދޭނީ ހަމައެކަނި ޒަރޫރީ ބޭނުންތަކަށް ކަމަށް ޖޯންސަން ވިދާޅުވިއެވެ. ނަމަވެސް ކެފޭ ރެސްޓޯރެންޓްތައް އަދި ފިހާރަތަކުން ޑެލިވަރީގެ ހިދުމަތް ދެވޭނެކަމަށް ޖޯންސަން ވިދާޅުވިއެވެ.
ޖޯންސަން ވިދާޅުވީ އިނގިރޭސިވިލާތައް ކޮވިޑްގެ ދެވަނަ ރާޅު ބިންދާލާފައިވާ ކަމަށާއި، މިހާލަތުގައި ރައްކާތެރިކަމުގެ ފިޔަވަޅު ވަރުގަދަ ނުކޮށްފިނަމަ އޭގެ ގެއްލުން ރައްޔިތުންގެ އިތުރުން ގައުމަށްވެސް ކުރާނެ ކަމަށެވެ. އަދި އިނގިރޭސިވިލާތުން އަބަދުވެސް އިސްކަމެއް ދެއްވަމުން އަންނަނީ އެގައުމުގެ ރައްޔިތުންގެ ސިއްހަތަށް ކަމަށް ޖޯންސަން ވިދާޅުވިއެވެ. ޖޯންސަން އިތުރަށް ވިދާޅުވީ މި ނިންމުން ނިންމީ އެގައުމުގެ ސިއްހީ މާހިރުންނާއި، ކަމާބެހޭ ފަރާތްތަކާއިއެކު ބޭއްވި ބައްދަލުވުންތަކަށްފަހު ކަމަށެވެ.
ޖޯންސަން ވިދާޅުވީ މި ނިންމުންތަކަށް ބުދަ ދުވަހު އެގައުމުގެ މަޖިލީހުގައި ވޯޓަށް އަހާނެ ކަމަށާއި، އުންމީދަކީ މަޖިލީހުން މި ނިންމުންތައް ފާސްވެގެން ދިއުން ކަމަށެވެ.
އިނގިރޭސިވިލާތަކީ މުޅި ދުނިޔެއިން 9 ވަނަ އަށް އެންމެ ގިނަ މީހުން ކޮވިޑް-19 އަށް ޕޮޒިޓިވްވެފައިވާ ގައުމެވެ. އެގައުމުން މިހާތަނަށް 1،011،660 މީހުން ވަނީ ކޮވިޑަށް ޕޮޒިޓިވްވެފައެވެ. ފާއިތުވެދިޔަ 24 ގަޑީއިރުތެރޭ އެކަނިވެސް އެގައުމުން ވަނީ 21،915 މީހުން ބައްޔަށް ޕޮޒިޓިވްވެފައެވެ.
