މެކްރޯންގެ ބަސްމަގު ބަދަލުވެ، މުސްލިމުންނަށް ކުރެވޭ އިހްސާސްތައް ދެނެވަޑައިގަންނަވާ ކަމަށް ވިދާޅުވެއްޖެ

ކީރިތި ރަސޫލާ އަށް ފުރައްސާރަކޮށް ކާޓުން ކުރެހުމަކީ މުސްލިމުންނަށް އޭގެ އަސަރުކުރާ ކަމެއް ކަމަށާއި، ނަމަވެސް ހަރުކަށި ފިކުރުގެ މުސްލިމުންނާއި ދެކޮޅަށް ހަނގުރާމަ އަށް ނިކުންނަނީ އެ މީހުންނަކީ ހުރިހާ އެންމެންނަށް އޮތް ނުރައްކަލަކަށް ވާތީ ކަމަށް، ރަސޫލާގެ ކާޓުން ކުރެހި މީހުން ދިފާއުކޮށް އިސްލާމްދީނަށް ފާޑު ވިދާޅުވި ފްރާންސްގެ ރައީސް އެމެނުއަލް މެކްރޯން ވިދާޅުވެއްޖެއެވެ.

އެމަނިކުފާނު އެހެން ވިދާޅުވީ، އަލްޖަޒީރާ އަށް ދެއްވި އިންޓަވިއުއެއްގައެވެ.

ކާޓުން ކުރެހި މައްސަލާގައި މުސްލިމް ގައުމުތަކާއި ފްރާންސްއާ ދެމެދު ވަނީ ނުތަނަވަސްކަން އުފެދިފައެވެ. މެކްރޯން ވިދާޅުވީ، ކީރި ރަސޫލާ އަށް ފުރައްސާރަކޮށް ކާޓުން ކުރެހުމުން މުސްލިމުންނަށް ކުރެވޭ އިހްސާސްތައް ދެނެވަޑައިގަންނަވާ ކަމަށެވެ.

ކީރިތި ރަސޫލާގެ ކާޓުން ކުރެހުމަކީ ފްރާންސުން ފަށައިގަނެގެން އުޅޭ ކަމެއް ކަމަށް ބުނާ ބުނުމަށް މެކްރޯން ވަނީ ރައްދު ދެއްވާފައެވެ. އެމަނިކުފާނު ވިދާޅުވީ، ކާޓުން ކުރެހުމަކީ ފްރާންސް ސަރުކާރުން ކުރާ ކަމެއް ނޫން ކަމަށާއި، އެކަން ކުރަނީ އަމިއްލަ މިނިވަން ނޫސްތަކުން ކަމަށެވެ.

މިއަދުގެ ދުނިޔޭގައި އިސްލާމްދީނުގެ ނަމުގައި ކަމަށްބުނެ އެތައް ބަޔަކު ގަތުލުއާއްމު ހިންގަމުންދާ ކަމަށާއި، ހަރުކަށި ފިކުރަށް ޖާގަ ދިނުމަށް ފުރުސަތު ނުދެއްވާނެ ކަމަށާއި، ޔޫރަޕުން އޮތީ މުސްލިމް ގައުމުތަކާއި ގުޅިގެން ދީނުގައި ދިމާވާ މައްސަލަތަކަށް މަޝްވަރާ ކުރަން ތައްޔާރަށް ކަމަށް ވިދާޅުވިއެވެ.

މުސްލިމުންނަށް ކުރެވޭ އިހްސާސްތައް އެނގިވަޑައިގަންނަވާ ކަމަށް ފްރާންސުގެ ރައީސް ވިދާޅުވެފައިމިވަނީ، މުސްލިމް ގައުމުތަކުގެ ފިއްތުން އިންތިހާ އަށް އިތުރުވެ ފްރާންސުން އުފައްދާ ތަކެތި ބޮއިކޮޓް ކުރުމަށް ގޮވާލާ މުސްލިމުން މުޒާހަރާތައް ފަށާފައި ވަނިކޮށެވެ.