ކޮވިޑް ކޭސްތައް އިތުރުވުމާއި ގުޅިގެން ކޮލަމްބޯ ތިންދުވަހަށް ލޮކްޑައުން ކޮށްފި
31 އޮކްޓޯބަރު 2020 | ހޮނިހިރު 07:40ކޮލަމްބޯއާއި ކޮލަމްބޯއާއި އިންވެގެން އޮންނަ ދެ ޑިސްޓްރިކްޓެއްގައި ތިން ދުވަހުގެ މުއްދަތަކަށް ލޮކްޑައުން ކުރަން މިހާރުވަނީ ފަށާފަ
ލަންކާގެ މަގުތައް ޑިސްއިންފެކްޓް ކުރުމުގެ މަސައްކަތް ކުރަނީ
ސްރީލަންކާގައި ކޮވިޑް-19ގެ ކޭސްތައް އިތުރުވެ ވެރިރަށް ކޮލަމްބޯ ތިންދުވަހަށް ލޮކްޑައުން ކުރުމަށް ނިންމައިފިއެވެ.
ސްރީލަންކާއިން މިހާތަނަށް ޖުމްލަ 10،424 މީހަކު ކޮވިޑަށް ޕޮޒިޓިވްވެފައިވާއިރު، އެ ގައުމުގެ ހާލަތު ގޯސްވަމުން ދާތީ ވެރިރަށް ކޮލަމްބޯއާއި ކޮލަމްބޯއާއި އިންވެގެން އޮންނަ ދެ ޑިސްޓްރިކްޓެއްގައި ތިން ދުވަހުގެ މުއްދަތަކަށް ލޮކްޑައުން ކުރަން މިހާރުވަނީ ފަށާފައެވެ.
އެ ގައުމުގެ ސިއްހީ ވުޒާރާއާއި ހަވާލާދީ ބައިނަލްއަގްވާމީ މީޑިއާ ރިޕޯޓްތައް ބުނާގޮތުން، ލޮކްޑައުން ފެށުމާއެކު ކޮންމެހެން ފުއްދަންޖެހޭ ޒަރޫރީ ބޭނުންތައް ފުއްދުމަށް ނޫންގޮތަކަށް ބޭރުތެރެއަށް ނުކުމެ އުޅުން އެ ތިން ސަރަޙައްދުގައި ދިރިއުޅޭ މީހުންނަށް މަނާވާނެއެވެ.
ލަންކާއިން ފުރަތަމަ ކޮވިޑްގެ ކޭސްއެއް ފެނުމާއި އެކު، މާރޗު މަހުން ފެށިގެން ޖޫން މަހުގެ ނިޔަލަށް ހަރުކަށި ލޮކްޑައުންއެއް ޤާއިމްކޮށް ބަލި ކޮންޓްރޯލްކުރުމުގައި ގިނަ ކާމިޔާބީތަކެއް ހޯދާފައިވެއެވެ. ބައިނަލްއަގްވާމީ މަޝްރަހުގައި ބަލި ކޮންޓްރޯލްކުރުމަށް އަޅާފައިވާ ފިޔަވަޅުތަކުގެ ނަތީޖާއިން މިސާލު ދައްކަމުން އައިއިރު އެގައުމުން ވަނީ ކޭސްތައް މަދުވުމާއި ގުޅިގެން އަޅާފައިވާ ފިޔަވަޅުތަކަށް ލުއި ދީފައެވެ.
އެކަމުގެ ނަތީޖާއެއްގެ ގޮތުން، އޮކްޓޯބަރ މަހުގެ ކުރީކޮޅުގައި ބަލިޖެހޭ މީހުންގެ ޢަދަދު އިތުރުވެ، ފާއިތުވި ތިން ހަފްތާގައި، ހެދުން އުފައްދާ ކާރުޚާނާއެއްގައި މަސައްކަތްކުރާ ގިނަ އަދަދެއްގެ މަސައްކަތްތެރިންނަށްވަނީ ބަލިޖެހިފައެވެ. އެންމެ ފަހުގެ ތަފާސްހިސާބުތައް ދައްކާގޮތުން، ފާއިތުވި 24 ގަޑީއިރުތެރޭގައި އެ ގައުމުން ވަނީ 633 އައު ކޭސް ރިޕޯޓުކޮށްފައެވެ.
