ޅ. ހިންނަވަރު އިޖުތިމާޢީ މަރުކަޒުން އިސްނަގައިގެން އެ ރަށުގެ އަންހެނުންގެ މެދުގައި ބޭއްވި "އެޗްސީސީ ވިމެންސް ވޮލީބޯލް ޗެމްޕިއަންޝިޕް 2020" ގެ ޗެމްޕިއަންކަން ހޯޕް އެޗްޕީއެސްއިން ހޯދައިފިއެވެ.

މި މުބާރާތުގެ ޗެމްޕިއަންކަން ހޯޕް އެޗްޕީއެސް ހޯދީ ހުކުރު ދުވަހުގެރޭ ކުޅުނު ފައިނަލް މެޗުގައި ޅ. އަތޮޅު ތަޢުލީމީ މަރުކަޒު ބަލިކޮށްގެންނެވެ. މުބާރާތުގެ ފައިނަލުން ހޯޕް އެޗްޕީއެސް ޖާގަ ހޯދީ ކުޅުނު ހަތަރު މެޗުން 12 ޕޮއިންޓް ހޯދައިގެންނެވެ. އަދި ފައިނަލުގެ ޖާގައެއް ޅ. އަތޮޅު ތަޢުލީމީ މަރުކަޒުން ހޯދީ ކުޅުނު ހަތަރު މެޗުން ނުވަ ޕޮއިންޓް ހޯދައިގެންނެވެ.

ހިންނަވަރު ވޮލީބޯޅަ ކޯޓުގައި ކުރިއަށްދިޔަ މި މުބާރާތުގެ ފައިނަލް މެޗު ހޯޕް އެޗްޕީއެސްއިން ކާމިޔާބުކުރީ 3-1 ސެޓުންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ހޯޕް އެޗްޕީއެސްގެ ޖާޒީ ނަމްބަރު ހަތަރެއް ހަލީމާ މުޙައްމަދެވެ.

މުބާރާތުގެ އެންމެ މޮޅު ހަ ކުޅުންތެރިންނަކީ ހޯޕް އެޗްޕީއެސްގެ ދުންޔާ އަލީ އާއި، ޒަމީރާ އަބްދުލް ކަރީމާއި، ހަލީމާ މުޙައްމަދާއި، ޅ. އަތޮޅު ތަޢުލީމީ މަރުކަޒުގެ ސާޖިދާ އަދުނާނާއި، އައިޝަތު ތޯމާ ވާސިފް އަދި ޓީމު އެލާޓުގެ އައިޝަތު ޔޫސުފެވެ.

މުބާރާތުގެ އެންމެ އުންމީދީ ކުޅުންތެރިޔަކަށް ހޮވިފައިވަނީ ސްކޯޕިއަންސްގެ ހަލީމާތު ޝުހާ ހުސެއިނެވެ.

ހިންނަވަރުގެ އަންހެނުންނަށް ހުޅުވާލެވިގެން ބޭއްވި މި މުބާރާތުގައި ފަސް ޓީމެއް ވަނީ ވާދަކޮށްފައެވެ. އެއީ ޓީމު އެލާޓާއި، ޅ. އަތޮޅު ތަޢުލީމީ މަރުކަޒާއި، ސްކޯޕިއަންސް އާއި، ހޯޕް އެޗްޕީއެސް އަދި ޓީމު ގޯގޯއެވެ.

ހިންނަވަރު އިޖުތިމާޢީ މަރުކަޒުން އިންތިޒާމުކޮށްގެން އެ ރަށުގެ އަންހެނުންނަށް ވޮލީބޯޅަ މުބާރާތެއް ބޭއްވިއިރު، އެ މަރުކަޒުން އަންނަނީ ރަށު ފެންވަރުގައި ގިނަ މުބާރާތްތަކެއް ބާއްވަމުންނެވެ. އެގޮތުން މިދިޔަ މަހު ވަނީ "އެޗްސީސީ ފުޓްސަލް ޗެލެންޖް 2020" ކާމިޔާބުކަމާއެކު ނިންމާލާފައެވެ.