މާޝަލް އައިލޭންޑްސްއިން ފުރަތަމަ ފަހަރަށް ކޮވިޑްގެ ކޭސް އެއް ފެނިއްޖެ
29 އޮކްޓޯބަރު 2020 | ބުރާސްފަތި 17:30އެގައުމުން ވަނީ ދެ މީހަކު ކޮވިޑަށް ޕޮޒިޓިވްވެފައި
މާޝަލް އައިލޭންޑްގެ ގޮނޑުދޮށުގެ މަންޒަރެއް
ފަތުރުވެރިކަމަށް ބަރޯސާވެފައިވާ މާޝަލް އައިލޭންޑްސްއިން ފުރަތަމަ ފަހަރަށް ކޮވިޑް-19ގެ ކޭސް އެއް ފެނިފައިވާ ކަމަށް ރިޕޯޓް ކޮށްފިއެވެ.
ރިޕޯޓްތައް ބުނާ ގޮތުން މާޝަލް އައިލޭންޑްސްއިން ކޮވިޑްގެ ކޭސް އެއް ފެނިފައިވަނީ ބުދަ ދުވަހު އެވެ. 55،000 މީހުންގެ އާބާދީއެއް އޮންނަ އެ ގައުމުން ކޮވިޑްގެ ފުރަތަމަ ކޭސް ރިޕޯޓްކޮށްފައިވާއިރު، އެގައުމުގެ ސަރުކާރުން ބުނީ ޕޮޒިޓިވްވެފައިވަނީ އެގައުމުގައި ހުންނަ އެމެރިކާގެ ބޭސް ގައި މަސައްކަތް ކުރަމުން އަންނަ ދެ ސިފައިން ކަމަށެވެ.
ކޮވިޑްގެ ފުރަތަމަ ކޭސް ރިޕޯޓް ކުރުމާއިއެކު މާޝަލް އައިލޭންޑްސްއިން ވަނީ ރައްކާތެރިކަމުގެ ފިޔަވަޅު އެޅުމުގެ ގޮތުން އެގައުމުގެ ބޯޑަރުތައް ބަންދުކޮށްފައެވެ.
މާޝަލް އައިލޭންޑްގެ ސަރުކާރު ކަމަށްވާ ރިމޯޓް ޕެސިފިކް އާޗިޕެލްގޯ އިން ބުނީ އެގައުމުން ޕޮޒިޓިވްވި ދެ މީހުން މިވަގުތު ތިބީ ކަރަންޓީނުގައި ކަމަށާއި، އެ ދެ މީހުންގެ ކޮންޓެކްޓް ޓްރޭސިންގގެ މަސައްކަތް ކުރަމުން އަންނަކަމަށެވެ.
މިއަހަރު ކުރީ ކޮޅު މާޝަލް އައިލޭންޑްސްގެ ބޯޑަރުތައް ބަންދުކުރި ނަމަވެސް އެގައުމުން ވަނީ ޖޫން މަހު ބޯޑަރު ހުޅުވާލާފައެވެ. މާޝަލް އައިލޭންޑްސްގެ ބޯޑަރުތައް ހުޅުވާލަން އެގައުމުން ނިންމީ އެގައުމުގައި މަސައްކަތް ކުރާ އެމެރިކާގެ ބޭސްގެ ސިފައިންގެ ބޭނުންތަކަށް ކަމަށް ރިޕޯޓްތައް ބުނެއެވެ.
