ބައިޑަން ވޯޓު ލައްވައިފި

އެމެރިކާގައި ކުރިއަށް އޮތް ރިޔާސީ އިންތިޚާބުގައި ޑިމޮކްރަޓިކް ކެންޑިޑޭޓްގެ ގޮތުގައި ވާދަކުރައްވާ ޖޯ ބައިޑަން އަރލީ ވޯޓިންގ ނުވަތަ ކުރިން ވޯޓުލުމުގެ މަރުހަލާގައި ވޯޓު ދެއްވައިފިއެވެ.

ބުދަ ދުވަހު ބައިޑަން އާއި އަނބިކަނބަލުން ޖިލް ވޯޓު ލައްވާފައިވަނީ ވިލްމިންގޓަންގަ އެވެ. މިހާތަނަށް އެގައުމުގެ 74 މިލިއަން މީހުން ވަނީ ކުރިން ވޯޓުލުމުގެ މަރުހަލާގައި ވޯޓުލާފައެވެ.

ބައިޑަން ވަނީ ވިލްމިންގޓަންގައި ކޮވިޑް-19 ކޮންޓްރޯލްކުރުމަށް އަޅާނެ ފިޔަވަޅުތަކާއި މިކަމުން އެމެރިކާ އަރައިގަތުމަށް ގެންގުޅޭނެ ސިޔާސަތުތަކާއި ގުޅޭގޮތުން ވާހަކަދައްކަވާފައެވެ.

އެމެރިކާގައި އަނެއްކާވެސް ކޮވިޑް-19ގެ ކޭސްތައް އިތުރު ވެފައިވާއިރު އިންތިޚާބުގައި ދެން ވާދަކުރައްވާ އެގައުމުގެ ރައީސް ޑޮނަލްޑް ޓްރަމްޕް ގެންދަވަނީ ކޭސްތައް އިތުރުވަމުންދާ ސަރަހައްދުތަކުގައިވެސް ކެމްޕެއިންގެ ގިނަ އިވެންޓްތަކެއް ބާއްވަވަމުންނެވެ. ޓްރަމްޕް ވަނީ ހޮނިހިރު ދުވަހު ފްލޮރިޑާގައި ވޯޓު ލައްވާފައެވެ.

މި ފަހަރުގެ އިންތިޚާބު ވެގެންދާނީ އެމެރިކާގައި ފާއިތުވި ގަރުނުގެ ތެރޭގައި އެންމެ ގިނަ މީހުން ވޯޓުލާނެ އިންތިޚާބު ކަމަށް ތަފާސް ހިސާބުތަކުން ދައްކައެވެ. ނޮވެމްބަރ މަހުގެ 3 ވަނަ ދުވަހު ރިޔާސީ އިންތިޚާބު އޮންނައިރު މިހާރު ވޯޓުލާފައިވާ އަދަދުތަކަށް ބަލާއިރުވެސް 2016 ވަނަ އަހަރުގެ އިންތިޚާބުގައި ވޯޓުލި މީހުންނަށްވުރެ ގިނަ މީހުން ވޯޓުލާފައިވާކަން ވަނީ އެނގިފައެވެ.

ނެގެމުންދާ ޕޯލްތަކުން ބައިޑަން އުޅުއްވަނީ ޓްރަމްޕަށް ވުރެ ކުރީގައެެވެ. އެހެންނަމަވެސް ކޮވިޑް-19 ގެ ހާލަތު އެންމެ ގޯސް ސަރަހައްދުތަކުގައި ދެ ކެންޑިޑޭޓުންގެ ދެމެދުގައިވާ ފަރަގު ކުޑަކަމަށް ރިޕޯޓްތައް ބުނެއެވެ.