އައިލެންޑްސް.އެމްވީ ޕޯޓަލް މިނިސްޓްރީ އޮފް ޓޫރިޒަމްއާ ހަވާލުކޮށްފި
މި ޕޯޓަލްއިން ގެސްޓްހައުސް ފަތުރުވެރިކަން އިތުރަށް ޕްރޮމޯޓް ވެގެންދާނެ
އައިލެންޑްސް.އެމްވީ, މިނިސްޓަރ އޮފް ޓޫރިޒަމް އަބްދުﷲ މައުސޫމްއާއި ހަވާލު ކުރެއްވުން
ރަށު ފަރުތުވެރިކަމަށް ހާއްސަކޮށްގެން ޑިވެލޮޕް ކޮށްފައިވާ އައިލެންޑްސް.އެމްވީ ޕޯޓަލް ޓޫރިޒަމް މިނިސްޓްރީއާ ހަވާލުކޮށްފިއެވެ.
ނޭޝަނަލް ސެންޓަރ ފޯރ އިންފޮމޭޝަން ޓެކްނޮލޮޖީގެ ސޮފްޓްވެއަރ ޑިވޮލޮޕްމަންޓް ޓީމްއިން އުފައްދާފައިވާ ޕޯޓަލް ޓޫރިޒަމް މިނިސްޓަރ ޑރ. އަބްދުﷲ މައުސޫމްއާ ހަވާލުކޮށްދެއްވީ ކޮމިއުނިކޭޝަންސް މިނިސްޓަރު މަލީހު ޖަމާލެވެ.
މި ރަސްމިއްޔާތުގައި ވާހަކަ ދައްކަވަމުން މަލީހު ވިދާޅުވީ ކޮވިޑް19 ގެ މި ހާލަތުން ރާއްޖެ އަރައިގަތުމަށްޓަކައި، ހާއްސަ ގޮތެއްގައި ގެސްޓްހައުސް ފަތުރުވެރިކަން އިތުރަށް ޕްރޮމޯޓްކުރުމަށްޓަކައި މިނިސްޓްރީ އޮފް ޓޫރިޒަމް އާއި ހަވާލުކުރެވި ރަށްރަށުގެ ގެސްޓްހައުސްތަކަށް ފަތުރުވެރިން ގެނެވޭ ގޮތް ވުމަކީ ރާއްޖޭގެ ޓޫރަޒިމް މިހާރަށްވުރެން މުޅިން އާ ހަރުފަތަކަށް ގެންދެވޭނެ ކަމެއްކަން ފާހަގަކުރައްވާފައެވެ.
މަލީޙް އިތުރަށް ވިދާޅުވީ އުއްމީދަކީ މި ޕްރޮޖެކްޓްއަކީ ކާމިޔާބު ޕްރޮޖެކްޓަކަށްވެ، ރާއްޖެއިން ބޭރުގައި ބައިވެރިވާ އެކިއެކި ފެއަރ ތަކުގައި އައިލެންޑްސް.އެމްވީ ޕްރޮމޯޓް ކުރެވި ރާއްޖޭގެ ގެސްޓްހައުސްތަކާއި، އަތޮޅުތަކުގައި ހުރި ރެސްޓޯރަންޓުތައް އަދި އެހެނިހެން ޓޫރިޒަމް އާއި ގުޅުންހުރި ވިޔަފާރިތައް މި ޕޯޓަލްގެ އެހީގައި ބޮޑު މަންފާއެއް ކުރުން ކަމަށް ވިދާޅުވިއެވެ.
މި ހަފްލާގައި ވާހަކަ ދައްކަވަމުން މިނިސްޓަރ އޮފް ޓޫރިޒަމް އަބްދުﷲ މައުސޫމް ވިދާޅުވީ މި ވެބްސައިޓް މީގެ އެންމެ ފުރިހަމަ ގޮތުގައި ފައިދާ މުޅި ރާއްޖެއަށް ލިބޭނެ ގޮތަށް މަސައްކަތް ކުރުމުގެ ފުރުސަތު ތަނަސްވެގެންދާނެ ކަމާއި، މިހާރު ރާއްޖޭގައި ހުޅުވިފައި ހުރި 95 އިންސައްތަ ގެސްޓްހައުސްގެ މައުލޫމާތު މި ޕޯޓަލްގައި ހިމެނިފައިވާ ކަމާއި، މުސްތަޤުބަލުގައި މި ވެބްސައިޓް ވެގެންދާނީ ދިވެހިރާއްޖޭގެ ވާހަކަ ކިޔައިދޭ ސައިޓެއް ކަމަށެވެ.
ރާއްޖޭގެ ކޮންމެ ރަށެއްގެ ރައްޔިތުންނަކީ ތަފާތު ދިރިއުޅުމެއް އުޅޭ ރަށަކަށްވެފައި، ފަތުރުވެރިން ގަޔާވާ ކަހަލަ ކަންތައްތައް ކޮންމެ ރަށަކުން ލިބެން އެބަހުރި ކަމާއި، މި ވެބްސައިޓް މެދުވެރިކޮށް މުޅި ދުނިޔެއަށް މި މައުލޫމާތު ފޯރުކޮށްދެވި، ކޮންމެ ރަށަކީ ބްރޭންޑަކަށް ހެދުމުގެ ފުރުސަތު ލިބިގެންދާނެ ކަމަށް މިނިސްޓަރ ވިދާޅުވިއެވެ.
އައިލެންޑްސް.އެމްވީ ޕްރޮޖެކްޓަކީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙްގެ ވައުދުތަކުގެ ތެރޭގައި ހިމެނޭ ވައުދެކެވެ. ރައީސް ސޯލިހު މި ވެބްސައިޓް ލޯންޗްކޮށްދެއްވީ ނިމިދިޔަ އަހަރުގެ މާރޗު މަހުގެ ތެރޭގައެވެ.
