ސަސްއިން ފަރިތަކުރުންތައް ފަށައިފި، އައު ތަޖުރިބާއަކަށް ނާދު ތައްޔާރު

ކުރިއަށް އޮތް ފުޓްބޯޅަ ސީޒަނަށް ތައްޔާރުވުމަށް ފުރަތަމަ ޑިވިޝަނުގައި އަލަށް ވާދަކުރާ ސުޕަ ޔުނައިޓެޑް ސްޕޯޓްސް (ސަސް) އިން ފަރިތަކުރުންތައް ފަށައިފިއެވެ.

ފަރިތަކުރުންތައް ފެށުމުގެ ހުއްދަ ފުރަތަމަ ޑިވިޝަނުގެ ކުލަބުތަކަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މި މަހުގެ ކުރީކޮޅު ދީފައިވާއިރު، ސަސްއިން ފަރިތަކުރުންތައް ފެށީ އަންގާރަ ދުވަހުގެ ހަވީރުއެވެ.

މިދިޔަ ސީޒަނުގެ ދެވަނަ ޑިވިޝަނުގެ ރަނަރަޕްކަން ހޯދާ މުޅިން އަލަށް ފުރަތަމަ ޑިވިޝަނުގައި ވާދަކުރުމަށް ސަސްއިން ތައްޔާރުވަމުން އަންނައިރު، އައު ސީޒަނަށް އެ ޓީމުން ކުރިމަތިލާނީ ތަޖުރިބާކާރު ކޯޗު އަޙްމަދު ނާޝިދު (ނާދު) އާ އެކުގައެވެ.

އެފްއޭއެމް ޓާފް ދަނޑުގައި އަންގާރަ ދުވަހުގެ ހަވީރު ކުރިއަށްގެންދިޔަ ފަރިތަކުރުންތަކުގެ ތެރެއިން "ރާއްޖެޓީވީ" އަށް ދިން އިންޓަވިއުއެއްގައި ނާދު ބުނީ ސަސްއާއެކު އައު ތަޖުރިބާއެއް ކުރާއިރު، ރަނގަޅު ހިސާބަކަށް ޓީމު ގެންދެވޭނެ ކަމުގެ އުންމީދު އެބައޮތް ކަމަށެވެ. އަދި ފުރަތަމަ ކަމަކަށް ޓީމުގެ އަމާޒަކީ ގަދަ ހަޔަކަށް ވަނުން ކަމަށާއި، އެކަމަކު އެއަށްވުރެވެސް މައްޗަށް ދިޔުމަށް ބޭނުންވާ ކަމަށްވެސް ނާދު ބުންޏެވެ.

ނާދު އިތުރަށް ބުނީ ސަސްގައި މިހާރު އޮތް ސްކޮޑާ ދޭތެރޭ ފުދޭވަރަކަށް ހިތްހަމަޖެހޭ ކަމަށާއި، އަދި މި ސްކޮޑަށް ބޭރުގެ ކުޅުންތެރިން ގުޅުމާއެކު ޓީމު އިތުރަށް ވަރުގަދަ ވެގެންދާނެ ކަމަށެވެ. އަދި ޓީމުގައި ޒުވާން ރަނގަޅު ކުޅުންތެރިންތަކެއް ތިބި ކަމަށްވެސް ނާދު ފާހަގަކުރިއެވެ.

އައު ސީޒަނަށް ސަސްއިން ވަނީ ފުރަތަމަ ޑިވިޝަނުގައި ގިނަ އަހަރުތަކެއް ވަންދެން ކުޅެފައިވާ ތަޖުރިބާކާރު ޑިފެންޑަރުން ކަމަށްވާ އަޙްމަދު ޝާފިއު (ޝާފީ)، އަބްދުﷲ ހަނީފް (ބެންޖޯ) އަދި ޓީސީ ސްޕޯޓްސް ކުލަބުގެ ކެޕްޓަން އަޙްމަދު ފައްރާހު (ފައްރަ) ގެ ސޮއިހޯދާފައެވެ. އަދި ކުރިން ޓީސީ އާއި ދެވަނަ ޑިވިޝަނުގެ ޓީމުތަކަށް ކުޅެފައިވާ ޒުވާން ކުޅުންތެރިޔާ އަޙްމަދު އައިހަމް ސަސްއަށް ސޮއިކުރިއިރު، ސަސްއަށް މިދިޔަ އަހަރުތަކުގައި ކުޅުނު އަޙްމަދު ފަރުހާން (ގައްބެ) ވެސް ވަނީ އެ ޓީމާއެކު ހަދާފައިވާ އެއްބަސްވުން އާ ކޮށްފައެވެ. މީގެ އިތުރުން އައު ސީޒަނަށް ބިދޭސީ ހަތަރު ކުޅުންތެރިއަކު ސަސްއާ ގުޅޭނެ ކަމަށް އެ ކުލަބުން މައުލޫމާތުދެއެވެ.

އަންގާރަ ދުވަހުގެ ހަވީރު ކުރިއަށްގެންދިޔަ ފަރިތަކުރުންތަކުގެ ތެރެއިން "ރާއްޖެޓީވީ" އަށް އިންޓަވިއު ދެމުން ސަސްގެ ގޯލްކީޕަރު ޓްރޭނަރު ހަސަން ހަމީދު (ޑަކޭ) ބުނީ ފުރަތަމަ ޑިވިޝަނަށް ޕްރޮމޯޓުވި ހިސާބުން ކުޅުންތެރިން ހޯދުމުގެ މަސައްކަތް ކުރަމުން އައި ކަމަށާއި، އެކަމުގައި ވަރަށް އުނދަގޫ ދުވަސްތަކެއް ހޭދަކުރަން ޖެހުނު ކަމަށެވެ. އެކަމަކު ކުރި ބުރަ މަސައްކަތުން ރަނގަޅު ކުޅުންތެރިންތަކެއް ލިބި، އެ ކުޅުންތެރިންނާއެކު ކުރިއަށް އޮތް ސީޒަނުގައި ރަނގަޅު ޓީމެއް ބިނާކުރެވޭނެ ކަމަށްވެސް އޭނާ ބުންޏެވެ.

ކުރިއަށް އޮތް ފުޓްބޯޅަ ސީޒަން ޑިސެމްބަރު މަހުގެ އަށްވަނަ ދުވަހު ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މިހާރު ނިންމާފައިވާއިރު، މިހާތަނަށް ހަތަރު ޓީމަކުން ވަނީ އައު ސީޒަނަށް ތައްޔާރުވުމަށް ފަރިތަކުރުންތައް ފަށާފައެވެ. އެއީ ސަސްގެ އިތުރުން ކުލަބު ވެލެންސިއާ، ކުލަބު ގްރީން ސްޓްރީޓްސް އަދި މާޒިޔާ ސްޕޯޓްސް އެންޑް ރެކްރިއޭޝަނެވެ.

ކުރިއަށް އޮތް ފުޓްބޯޅަ ސީޒަން އެފްއޭ ޗެރިޓީ ޝީލްޑް މެޗުން ޑިސެމްބަރު މަހުގެ އަށްވަނަ ދުވަހު ފަށާއިރު، ދިރާގު ދިވެހި ޕްރިމިއާ ލީގުގެ ކުޅުން ފެށުމަށް ތާވަލުކޮށްފައިވަނީ ޑިސެމްބަރު މަހުގެ 13 ވަނަ ދުވަހަށެވެ. ލީގުގައި ސަސްއިން ކުޅޭ ފުރަތަމަ މެޗުގައި ޑިސެމްބަރު މަހުގެ 13 ވަނަ ދުވަހުގެރޭ ނުކުންނާނީ ކުލަބު އީގަލްސްއާ ދެކޮޅަށެވެ.