ކާބުލްގެ އެޑިއުކޭޝަން ސެންޓަރަށް ދިން ބޮމުގެ ހަމަލާގައި 18 މީހުން މަރުވެއްޖެ

އަފްގާނިސްތާނުގެ ވެރި ރަށް ކާބުލްގެ އެޑިއުކޭޝަން ސެންޓަރަކަށް ދިން ބޮމުގެ ހަމަލާގައި 57 މީހުންނަށް އަނިޔާވެ 18 މީހަކު މަރުވެއްޖެއެވެ.

އަފްގާނިސްތާނުގެ މީޑިއާތަކުން ރިޕޯޓް ކޮށްފައިވާ ގޮތުގައި މި ހަމަލާގައި މަރުވި މީހުންގެ ތެރޭގައި އެޑިއުކޭޝަން ސެންޓަރުގައި ކިޔަވައިދޭ ލެކްޗަރާއިންގެ އިތުރުން ދަރިވަރުން ހިމެނޭ ކަމަށެވެ. އަދި މި ބޮމުގެ ހަމަލާގައި އަނިޔާވި މީހުންގެ ތެރޭގައި ސީރިއަސް އަނިޔާތަކެއްވި މީހުން ހިމެނޭ ކަމަށެވެ. އެހެންކަމުން މަރުވި މީހުންގެ އަދަދު އިތުރުވުން އެކަށީގެންވާ ކަމަށް މީޑިއާ ރިޕޯޓްތައް ބުނެއެވެ.

އަފްގާނިސްތާނު އޮފިޝަލަކު މަންޒަރު ދުށް ފަރާތަކާއި ހަވާލާދީ ބުނީ މި ހަމަލާއަކީ ޖާނުން ފިދާވުމުގެ ހަމަލާއެއް ކަމަށާއި، އެޑިއުކޭޝަން ސެންޓަރުގެ ސެކިއުރިޓީ ބަލަހައްޓާ މީހުން އެކަން ކަށަވަރު ކޮށްދީފައިވާ ކަމަށެވެ.

ޖާނުން ފިދާވުމުގެ ހަމަލާތައް އަފްގާނިސްތާނުގައި އާންމުކޮށް ހިނގި ނަމަވެސް ފާއިތުވެ ދިޔަ ހަ މަސް ދުވަހު މި ހަމަލާތަކުގެ އަދަދު ވަނީ ދަށަށް ގޮސްފައެވެ. އެކަމަކު މި ހަމަލާއަކީ މި ހަފްތާގައި އަފްގާނުގައި ދިން މި ފަދަ ދެވަނަ ހަމަލާއެވެ. މި ހަމަލާގެ ޒިންމާ މިހާތަނަށް އަދި އެއްވެސް ފަރާތަކުން ނަގައިފައި ނުވެއެވެ.