ޖޯންސަންސް އަދި އެސްޓްރަޒެނެކާ ވެކްސިންގެ ޓްރަޔަލްތައް ކުރިއަށް ގެންދަން ހުއްދަ ލިބިއްޖެ

ޖޯންސަންސް އެންޑް ޖޯންސަންސް އަދި އެސްޓްރަޒެނެކާ އިން ކޮވިޑް-19 އަށް ތައްޔާރުކުރަމުން އަންނަ ވެކްސިންގެ ޓްރަޔަލްތައް އަލުން ފެށުމުގެ ހުއްދަ ލިބިއްޖެ ކަމަށް އެ ދެ ކުންފުނިން ބުނެފިއެވެ.

މި ދެ ކުންފުނިން ތައްޔާރު ކުރަމުން އަންނަ ދެ ވެކްސިންގެ ހިއުމަން ޓްރަޔަލްގެ ފޭސް ތިނެއްގެ މަސައްކަތް އަލުން އެމެރިކާގައި ކުރިއަށް ގެންދިއުމުގެ ހުއްދަ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަންއިން ދީފައި ވަނީ ހުކުރު ދުވަހުއެވެ.

މި ދެ ވެކްސިންގެ ޓްރަޔަލްތައް ވެސް ކުރިއަށް ގެންދިއުން ހުއްޓާލާފައި ވަނީ ވެކްސިންގެ ޓްރަޔަލްތަކުގައި ބައިވެރިވި މީހުން ބަލިވުމާ ގުޅިގެންނެވެ.

އެގޮތުން ސެޕްޓެމްބަރ ހަ ވަނަ ދުވަހު އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން ތައްޔާރުކުރަމުން އަންނަ ވެކްސިންގެ ޓްރަޔަލްތައް މެދުކަނޑާލާފައިވާ އިރު، މި ވެކްސިންގެ ޓްރަޔަލްތައް ޔޫކޭ، ބްރެޒިލް އަދި ސައުތު އެފްރިކާގެ އިތުރުން ޖަޕާން ގައި ވަނީ އަލުން ފަށާފައެވެ.

ބްރެޒިލްގައި މި ވެކްސިންގެ ޓްރަޔަލްގައި ބައިވެރިވި މީހެއް މަރުވެފައިވީ ނަމަވެސް، އޭނާ މަރުވެފައި ވަނީ ވެކްސިންގެ ސަބަބުން ނޫން ކަމުން ވެކްސިންގެ ޓްރަޔަލްތައް ހުއްޓާނުލާ ކުރިއަށް ގެންދާނެ ކަމަށް އެ ގައުމުން ވަނީ ބުނެފައެވެ. އަދި އޮކްސްފޯޑްއިން ވެސް ވަނީ މިކަމުގެ ސަބަބުން ވެކްސިންގެ ޓްރަޔަލްތައް މެދުކަނޑާ ނުލާނެ ކަމަށް ބުނެފައެވެ.

ޖޯންސަންސް އެންޑް ޖޯންސަންގެ ވެކްސިން ޓްރަޔަލްތައް ފާއިތުވި ހަފްތާގައި ހުއްޓާލާފައިވާ އިރު، އެ ކުންފުނިން ވަނީ އަލުން ޓްރަޔަލްތައް ފެށުމަށް ވާންޖެހޭ ތައްޔާރީތައް ވަމުން އަންނަ ކަމަށް ބުނެފައެވެ. ވެކްސިންގެ ޓްރަޔަލްގައި ބައިވެރިވެ ބަލިވި މީހުން ބަލިވެފައި ވަނީ ސީދާ ވެކްސިންގެ ސަބަބުން ކަން އެނގެން ނެތް ކަމަށްވެސް ޖޯންސަންސްއިން ވަނީ ބުނެފައެވެ.

ޖޯންސަންސްއިން ދަނީ އެމެރިކާގެ އިތުރުން އެހެން ގައުމުތަކުގައި ވެސް ވެކްސިންގެ ޓްރަޔަލްތައް އަލުން ފެށުމަށް މަޝްވަރާތައް ކުރަމުންނެވެ.