ވައިރަސް ކޮންޓްރޯލް ކުރުމުގައި ކުރިއަށް އޮތީ އުނދަގޫ ދުވަސްތަކެއް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ޑިރެކްޓަރު ޖެނެރަލް ޓެޑްރޯސް އަދަނޮމް ގެބްރެޔެސުސް ވިދާޅުވެއްޖެއެވެ.
އޭނާ މިހެން ވިދާޅުވީ ޖެނީވާގައި ބޭއްވި ވާޗުއަލް ޕްރެސް ކޮންފަރެންސެއްގައި ވާހަކަފުޅު ދައްކަވަމުންނެވެ. މީގެ އިތުރުން އޭނާ ވިދާޅުވެފައި ވަނީ މީގެ ތެރެއިން ބައެއް ގައުމުތަކުގައި ކޭސްތައް އިތުރުވަމުން ގޮސް ހޮސްޕިޓަލްތަކާއި އައިސީޔޫގެ ޖާގަތައް ފުރެމުން ދާކަމަށެވެ.
ކޮވިޑް-19 އާ ދެކޮޅަށް ކުރާ ހަނގުރާމައިން ފެންނަނީ އެންމެ އެދެވޭ މަންޒަރެއް ނޫން ކަމަށް ވިދާޅުވެ ޑަބްލިއުއެޗްއޯ އިން ބުނީ ގިނަ ގައުމުތަކުގައި ވައިރަސްގެ ހާލަތު ގޯސްވަމުން ދާކަމަށެވެ. އަދި މި ބަލިން ރައްކާތެރިވުމަށް އިތުރު ފިޔަވަޅު އެޅުމަށް ދުނިޔޭގެ ލީޑަރުންނަށް އެ އިދާރާއިން ވަނީ ގޮވާލާފައެވެ.
މިކަމާ ގުޅިގެން ވާހަކަ ދައްކަވަމުން ޑަބްލިއުއެޗްއޯގެ ކޮވިޑް-19 ޓެކްނިކަލް ގްރޫޕުގެ ވެރިޔާ މާރިއާ ވެން ކާކޯވް ވިދާޅުވީ ޔޫރަޕުގައި މި ބަލި ފެތުރިފައި އޮތީ ކަންބޮޑުވާން ޖެހޭ ފަދަ ހާލަތެއްގައި ކަމަށެވެ.
އެގޮތުން ވޭތުވެދިޔަ 24 ގަޑިއިރު ތެރޭ ދުނިޔެ އިން ރިޕޯޓްކުރި ކޭސްތަކުގެ ދެބައިކުޅަ އެއްބަޔަކީ ޔޫރަޕުން ބަލި ޖެހުނު މީހުންކަމަށާ ޔޫރަޕުގެ ސިޓީތަކުން ކޭސްތައް އިތުރުވުމުގެ އިތުރުން އައިސީޔޫގެ ކެޕޭސިޓީ ވެސް ދަނީ ފުރެމުން ކަމަށް އޭނާ ވަނީ ވިދާޅުވެފައެވެ.
