ނައިޖީރިއާގައި ކުރަމުންދާ މުޒާހަރާތަކުގައި 69 މީހުން މަރުވެއްޖެ
23 އޮކްޓޯބަރު 2020 | ހުކުރު 19:12މަރުވި މީހުންގެ ތެރޭގައި އާންމުންނާއި ފުލުހުންގެ އިތުރުން ސިފައިން ވެސް ހިމެނޭ
ނައިޖީރިއާގައި ކުރަމުން އަންނަ މުޒާހަރާގެ ތެރެއިން
ނައިޖީރިއާގެ ކުރަމުންދާ މުޒާހަރާގައި 69 މީހުން މަރުވެފައިވާ ކަމަށް އެ ގައުމުގެ ރައީސް މުހައްމަދު ބުހާރީ ވިދާޅުވެއްޖެއެވެ.
ބުހާރީ މިހެން ވިދާޅުވީ އެ ގައުމުގެ އިދިކޮޅު ލީޑަރުންނާއިއެކު ބޭއްވި ކުއްލި ބައްދަލުވުމަށް ފަހު ވާހަކަ ދައްކަވަމުންނެވެ. ނައިޖީރިއާ ރައްޔިތުން މުޒާހަރާ ކުރަމުން އަންނަނީ އެ ގައުމުގެ ފުލުހުންގެ އަނިޔާވެރިކަން ހުއްޓުވުމުގައި އެ ގައުމުގެ އިދާރާތަކާއި ފުލުހުންގެ މުއައްސަސާ ފެއިލްވެފައިވާ ކަމަށް ބުނެއެވެ.
އެ ގައުމުގެ ބޮޑެތި ސިޓީތަކުގައި ކުރިޔަށްދާ މުޒާހަރާތަކުގައި އާންމުންގެ އިތުރުން ފުލުހުންނާއި ސިފައިންގެ މީހުން މަރުވެފައިވާ ކަމަށް ރިޕޯޓް ކޮށްފައި ވެއެވެ.
އިދިކޮޅު ލީޑަރުންނާއި އެކު ބުހާރީ ބޭއްވި ބައްދަލުވުމުގައި އެ މަނިކުފާނު ވަނީ އިސްލާހީ މަސައްކަތް ފައްޓަވަން ނިންމަވައިފައިވާ ކަމަށް ވިދާޅުވެފައެވެ. އެކަމަކު އެކަން ކުރަނީ ގާނޫނީ އިމުގެ ތެރެއިން ކަމަށް އެ މަނިކުފާނު ވިދާޅުވިއެވެ. އަދި މުޒާހަރާ ކުރިޔަށް ގެންދިއުން އެންމެ ރަނގަޅު ކަމަށާއި، އެކަމަކު މުޒާހަރާގައި ޓެރެރިޒަމްގެ އަމަލުތައް ހިންގާ ނަމަ ފިޔަވަޅު އަޅާނެ ކަމަށް އެ މަނިކުފާނު ވަނީ ވިދާޅުވެފައެވެ.
ނައިޖީރިއާގައި ކުރަމުންދާ މުޒާހަރާތަކުގައި މުޒާހަރާގެ ބައިވެރިން ވަނީ ބުހާރީގެ އިސްތިއުފާއަށް ވެސް ގޮވާލާފައެވެ. އަދި ގައުމު ހަމަ މަގުން ގެންދެވޭނީ އިދިކޮޅު ލީޑަރުންނަށް ކަމަށް މުޒާހަރާގެ ބައިވެރިން އަންނަނީ ގޮވަމުންނެވެ.
