މިރޭ 11:00 ހާއިރު މީޑިއާނެޓްގެ ހިދުމަތްތައް ލިބޭނެ
ޚިދުމަތަށް ބުރޫ އެރީ ކަރަންޓު ކެނޑުމާ ގުޅިގެން
ފައިލް ފޮޓޯ: މީޑިއާނެޓުން ގިނަ ޗެނަލްތަކުގެ ޚިދުމަތް ކަސްޓަމަރުންނަށް ފޯރުކޮށްދޭ
މާލެސިޓީން ކަރަންޓު ކެނޑުމާއި ގުޅިގެން މީޑިއާނެޓަށް ދިމާވި މައްސަލަ މިރޭ ހައްލު ކުރެވޭނެ ކަމަށް އެ ކުންފުނިން ބުނެފިއެވެ.
ރާއްޖެއެމްވީއަށް މީޑިއާ ނެޓްގެ ޗީފް އޮޕަރޭޓިން އޮފިސަރ އަހުމަދު ނަބާހް ވިދާޅުވީ ހުކުރު ދުވަހު މާލެ ސިޓީން ކަރަންޓު ކެނޑުމާއި ގުޅިގެން މާލެ އަދި ވިލިމާލެގެ ބައެއް ގެތަކުން މީޑިއާނެޓްގެ ޚިދުމަތް މެދުކެނޑިފައިވާ ކަމަށެވެ.
ނަބާހް ވިދާޅުވީ ބައެއް ގެތަކަށް ޚިދުމަތް ނުލިބޭ ކަން ފާހަގަ ކުރެވުނީ ހުކުރު ދުވަހުގެ މެންދުރުފަހު 2:00 ހާއިރު ކަމަށާއި، އެ ވަގުތުން ފެށިގެން މައްސަލަ ހައްލު ކުރުމުގެ މަސައްކަތް ފަށާފައިވާ ކަމަށެވެ. އެގޮތުން މިރޭ 11:00 ހާއިރު ހުރިހާ ގެއަކަށް ޚިދުމަތް ލިބި، މައްސަލަ ހައްލު ކުރެވޭނެ ކަމަށް ނަބާހް ވިދާޅުވިއެވެ.
މީގެ އިތުރުން ނަބާހް ވިދާޅުވީ އިރުއިރުކޮޅާ ކަރަންޓު ކެނޑި ކުއްލިއަކަށް ކަރަންޓު އައުމާ ގުޅިގެން މީޑީއާ ނެޓްގެ ޚިދުމަތަށް ވެސް ބުރޫ އެރީ ކަމަށެވެ. އަދި އެއީ އިލެކްޓްރިކަލް ޕަވަރ ފެއިލިއަރ ކަމަށް ނަބާހް ވިދާޅުވިއެވެ.
މިކަމާ ގުޅިގެން މީޑިއާ ނެޓްއިން ވަނީ ރައްޔިތުންގެ ކިބައިން މައާފަށް އެދިފައެވެ.
