ރަސްފަންނު ޕެވިލިއަން މިރޭ ހުޅުވަނީ

"ރަސްފަންނު" ބީޗްގައިގައި ހަދާފައިވާ ޕެވިލިއަންގެ މަސައްކަތް ނިމި ހޯމަ ދުވަހުގެ ރޭ ހުޅުވާ ގޮތަށް ނިންމައިފިއެވެ.

ހޯމަ ދުވަހުގެރޭ 20:00 ގައި ހުޅުވުމަށް ނިންމާފައިވާ ޕެވިލިއަންގައި ގާއިމްކޮށްފައި ވަނީ އޮސްޓްރޭލިއާގެ މަޝްހޫރު ފްރެންޗައިޒް ކޮފީ ހައުސްއެއް ކަމަށްވާ "ގްލޯރިއާ ޖީންސް ކޮފީސް" ގެ އައުޓްލެޓެކެވެ. މިއީ ރާއްޖޭގައި ގްލޯރިއާ ޖީންސް ކޮފީސް ބްރޭންޑްގެ އައުޓްލެޓެއް ހުޅުވާ ފުރަތަަމަ ފަހަރެވެ. ރަސްފަންނު ޕެވިލިއަން ތަރައްގީކުރަނީ އެތަނުގެ ފުރަތަމަ ފަންގިފިލާގައި ކެފޭ އޭރިއާ ހެދުމަށް ފަހު އެތަނުގެ ގްރައުންޑް ފްލޯގައި ފެންވެރޭ ގޮތަށް ފާހާނާތަކަކާއި ކާއެއްޗެތި ވިއްކާ ހާއްސަ ފިހާރައެއް ހިމެނޭ ގޮތަށެވެ. މީގެ އިތުރުން މަގުގެ އަނެއް ފަރާތުން ޕެވިލިއަންގެ ފަސްޓް ފްލޯއަށް ދެވޭ ގޮތަށް އޯވަހެޑް ބުރިޖަކުން ވަނީ ގުޅާލާފައެވެ.

މި ޕެވިލިއަންގައި ރެސްޓޯރަންޓް އަދި ކެފޭތައް ހުންނާނީ މަތީ ދެ ބުރީގައެވެ.

ޕެވިލިއަންގައި ފްރެންޗައިޒްއެއް އައުޓްލެޓެއް ހުޅުވާ އިރު އިތުރު އެހެން ބައެއް ބްރޭންޑްތައް ވެސް ދަނީ ހުޅުވަމުންނެވެ. އެގޮތުން ފާއިތުވި ހަފުތާގައި އަމީނީ މަގުގައި ހުންނަ ގާކޮށި ފްލެޓްގެ ތިރީގައި ޕިއްޒާ ހަޓްގެ އައުޓްލެޓެއް ހުޅުވާފައިވާ އިރު އެ ތަނުގައި ކޭއެފްސީގެ އައުޓްލެޓެއް ހުޅުވުމަށް ދަނީ ތައްޔާރުވަމުންނެވެ. އަދި ހުޅުމާލެ ޓީމިނަލްގައި ދަ ކޮފީ ކްލަބާއި ކޭއެފްސީގެ އައުޓްލެޓެއް ހުޅުވުމުގެ މަސައްކަތް ވެސް ދަނީ ކުރަމުންނެވެ.