އާސެނަލަށް ވަފާތެރިވުމުން ލިބުނު ފައިދާއެއް ނެތް: އޮޒިލް

އާސެނަލަށް ވަފާތެރިވެގެން ލިބުނު ފައިދާއެއް ނެތް ކަމަށް ޖަރުމަނުގެ މިޑްފީލްޑަރު މެސުޓް އޮޒިލް ބުނެފިއެވެ.

އުމުރުން 31 އަހަރުގެ އޮޒިލް މިހެން ބުނީ މި ސީޒަނުގެ އިނގިރޭސި ޕްރިމިއާ ލީގާއި ޔުއެފާ ޔޫރޮޕާ ލީގަށްވެސް އާސެނަލުން އެކުލަވާލި ސްކޮޑުން އޭނާއަށް ޖާގައެއް ދީފައިނުވާތީއެވެ. މި ފަހަކަށް އައިސް އާސެނަލުން އޮޒިލަށް ފުރުސަތު ދީފައި ނުވާއިރު، އެންމެ ފަހުން އޮޒިލް އާސެނަލަށް މެޗެއް ކުޅެދިނީ މީގެ ހަތް މަސް ކުރިންނެވެ.

ސޯޝަލް މީޑިއާގައި ހިއްސާކުރި މެސެޖެއްގައި އޮޒިލް ބުނީ އާސެނަލުގެ އައު އެއްބަސްވުމުގައި 2018 ވަނަ އަހަރު ސޮއިކުރީ އެ ކުލަބަށް އޮތް ލޯތްބާއި ވަފާތެރިކަމުގެ ސަބަބުން ކަމަށެވެ. އެކަމަކު ކުލަބުން އޭގެ ބަދަލުގައި އޭނާއާ މެދު ކަންތައްތައް ކުރާ ގޮތުން މިހާރު އެކަމާ ހިތާމަކުރަން ޖެހިފައިވާ ކަމަށްވެސް ބުންޏެވެ. އަދި އޮޒިލް ވަނީ ވަފާތެރިކަމުގެ ހެޔޮ ބަދަލެއް ހޯދުމަކީ މިހާރު އުނދަގޫ ކަމެއްކަން ވިސްނިއްޖެ ކަމަށްވެސް ބުނެފައެވެ.

އޮޒިލް އިތުރަށް ބުނީ އޭނާ ޕްރިމިއާ ލީގުގައި ވާދަކުރާ އާސެނަލް ޓީމުގައި ރަޖިސްޓަރީ ނުކުރުމަކީ ލިބުނު ބޮޑު ހިތާމައެއް ކަމަށާއި، ކޮވިޑް-19 ގެ ސަބަބުން މިދިޔަ ސީޒަން މެދުކަނޑާލުމުގެ ކުރިން އޭނާ ހުރީ ވަރަށް ރަނގަޅު ފެންވަރެއްގައި ކަމަށެވެ. އަދި އޭރު ޓީމުގެ ކޯޗު މިކޭލް އާޓެޓާގެ ދަށުން ކުލަބުން ހޯދަމުން އައި ކުރިއެރުމުގައި އޭނާގެ ހިއްސާވެސް އޮތް ކަމަށާއި، އޭނާ ހީނުކުރާ ފަދަ ގޮތަކަށް ކަންކަން ނިމިގެން ދިޔަ ނަމަވެސް، އޭނާގެ އުއްމީދުތަކަށް ބަދަލެއް ނާންނަ ކަމަށްވެސް ބުންޏެވެ.

މީގެ ކުރިން އޮޒިލް ވަނީ އާސެނަލާ ދެމެދު މައްސަލަ ޖެހުނު ސަބަބު ސާފުކޮށްދީފައެވެ. އޮޒިލް އޭރު ބުނީ އޭނާ އާއި އާސެނަލާ ދެމެދު މައްސަލަ ޖެހުނީ ކޮވިޑް-19 ގެ ސަބަބުން ކުޅުންތެރިންގެ މުސާރަ ކުޑަކުރުމަށް ބުނުމުން، އެކަމަށް ދެކޮޅު ހެދި ހިސާބުން ކަމަށެވެ. އަދި އެކަމަށް ދެކޮޅު ހެދީ އާސެނަލަށް އޭނާ ކުރިމަތިކުރި ސުވާލުތަކަށް ކުލަބުން ޖަވާބުދާރީ ނުވުމުން ކަމަށްވެސް އޮޒިލް ބުންޏެވެ.

އާސެނަލުގެ ސްކޮޑުން އޮޒިލް ބާކީކުރި ނަމަވެސް، އޮޒިލް އާސެނަލް ދޫކޮށްލާނީ އެއްބަސްވުން ހަމަވުމުން އަންނަ އަހަރުގެ ހޫނު މޫސުމުގައި ކަމަށް ރިޕޯޓުތައް ބުނެއެވެ. އޮޒިލް މި ސީޒަނުގެ ނިޔަލަށް އާސެނަލުގެ އެއްބަސްވުމުގައި ހުރީ ހަފުތާއަކު 350،000 (ތިން ލައްކަ ފަންސާސް ހާސް) ޕައުންޑް ލިބޭ ގޮތަށެވެ. އޭނާ އަކީ އާސެނަލުގެ އެންމެ މުސާރަ ބޮޑު ކުޅުންތެރިޔާއެވެ.

ރެއާލް މެޑްރިޑް ދޫކޮށް 2013 ވަނަ އަހަރު އާސެނަލަށް ބަދަލުވި އޮޒިލް ވަނީ އާސެނަލަށް މިހާތަނަށް ކުޅެދިން 254 މެޗުގައި 44 ލަނޑު ކާމިޔާބުކޮށްފައެވެ. އަދި ވަނީ އާސެނަލާއެކު އެފްއޭ ކަޕް ތިން ފަހަރު އަދި ކޮމިއުނިޓީ ޝީލްޑް އެއް ފަހަރު ކާމިޔާބުކޮށްފައެވެ.