ނެގެޓިގް ޕީސީއާރް ޓެސްޓް މަޖުބޫރު ކުރީ އެންމެ ރަނގަޅު ވަގުތުގައި: ޑރ. ނައުޝާދު
23 އޮކްޓޯބަރު 2020 | ހުކުރު 01:10ރަށްތަކުގައި ފަތުރުވެރިކަން ހުޅުވާލުމަށް ރައްޔިތުން ތައްޔާރުކުރުމުގެ ގޮތުން ގިނަ މަސައްކަތްތަކެއް ކުރެވުނު
ރާއްޖެ އަންނަ ހުރިހާ ގައުމެއްގެ ފަތުރުވެރިން ވެސް ކޮވިޑް ނެގެޓިވް ޓެސްޓް ހުށައަޅަން ޖެހޭ
ރާއްޖެއަށް އަންނަ ހުރިހާ ފަތުރުވެރިން ނެގެޓިވް ޕީސީއާރް ޓެސްޓް ހުށައަޅަން ޖެހޭ ގޮތަށް ނިންމީ އެންމެ ރަނގަޅު ވަގުތުގައި ކަމަށް ޓޫރިޒަމް މިނިސްޓްރީގެ ނައިބު ޑރ. ނައުޝާދު މުހައްމަދު ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުޙީ" ޕްރޮގްރާމްގައި ވާހަކަ ދައްކަވަމުން ޑރ. ނައުޝާދު ވިދާޅުވީ، ރާއްޖެއިން އެ ނިންމުން ނިންމި އިރު ދުނިޔޭގެ ގިނަ ގައުމުތަކަކުން އެހެން އެކަން ކުރަން ނިންމާފައިވާ ކަމަށެވެ. އަދި މިހެން ވުމުގެ ސަބަބުން އެ ނިންމުމާ ގުޅިގެން ރާއްޖެއަށް އަންނަ ފަތުރުވެރިންގެ އަދަދަށް މާ ބޮޑު އަސަރެއް ނުކުރާ ކަމަށް ވިދާޅުވިއެވެ.
ނައުޝާދު އިތުރަށް ވިދާޅުވީ، މިއީ ގެސްޓް ހައުސްތައް ހުޅުވާލުމުގެ ކުރިން އެޅިގެން ދިޔަ މުހިއްމު އަދި ބޭނުންތެރި ފިޔަވަޅެއް ކަމަށެވެ. އަދި މީހުން ދިރިއުޅޭ ރަށްތައް ފަތުރުވެރިންނަށް ހުޅުވާލުމުގެ ކުރިން އެންމެ ރަނގަޅު ގޮތަކީ ވެސް މިއީ ކަމަށް ވިދާޅުވިއެވެ.
އެގޮތުން އެންމެ ފުރަތަމަ ހުޅުވާލި ޓޫރިސްޓު ރިސޯޓްތަކަށް އަންނަ ފަތުރުވެރިން އެއާޕޯޓުން ސީދާ ރިސޯޓައް ދަތުރުކުރާތީ އެމީހުންގެ މޫވްމެންޓް މޮނިޓަރ ކުރަން ވަރަށް ފަސޭހަ ކަމަށް ނައުޝާދު ވިދާޅުވިއެވެ. ނަމަވެސް ގެސްޓްހައުސްތަކަކީ މީހުން ދިރިއުޅޭ ރަށްރަށުގައި ހުންނަ ތަންތަނަށް ވެފައި، މޫވްމަންޓް މޮނިޓަރ ކުރަން އެހާ ފަސޭހަ ނުވާނެ ކަމަށް ވިދާޅުވިއެވެ.
ރާއްޖޭގެ ބޯޑަރުތައް ހުޅުވާލުމާ މިކަމާ ގުޅުވާ ނައުޝާދު ވިދާޅުވީ ރާއްޖޭގެ ފަތުުރުވެރިކަން ހުޅުވާލަން ޖެހުނީ ވަރަށް ބަލައިގެން ކަމަށާއި ފުރަތަމަ ރިސޯޓްތައް ހުޅުވާލުމަށް ފަހު އޭނގެ ފަހުން ގެސްޓްހައުސްތައް ހުޅުވާލަން ނިންމީ ވެސް އެހެން ވެގެން ކަމަށެވެ. އެގޮތުން ބަލި މެނޭޖް ކުރެވޭނީ ކިހާ ވަރަކަށްތޯ ކުރިން ބެލިފައިވާ ކަމަށް ވިދާޅުވިއެވެ.
ނައުޝާދު އިތުރަށް ވިދާޅުވީ، ރަށަށް ފަތުރުވެރިން ގެނައުމުގައި ރައްޔިތުންގެ ހުރި ކަންބޮޑުވުންތަކަށް ހައްލެއް ލިބިފައިވާ ކަމަށެވެ. އަދި ސަރުކާރުގެ ފަރާތުން އަޅާފައިވާ ހުރިހާ ފިޔަވަޅެއް އެޅުމުގައި ވެސް އެންމެ އިސްކަމެއް ދީފައި ވަނީ ރައްޔިތުންގެ ރައްކާތެރިކަން ކަށަވަރު ކުރުމަށް ކަމަށް ވިދާޅުވިއެވެ.
އޮކްޓޫބަރު މަހުގެ 15 އިން ފެށިގެން ގެސްޓް ހައުސްތައް އޮޕަރޭޓް ކުރުމަށް ހުއްދަ ދީފައިވާ އިރު، ގެސްޓް ހައުސްތައް ހުރި ރަށްރަށަށް ހުއްދަ ދެވިގެން ދަނީ ޓޫރިޒަމް މިނިސްޓްރީން ކަނޑައަޅާފައިވާ ޝަރުތުތައް ފުރިހަމަ ކޮށްގެންނެވެ.
