79 ދުވަސް ފަހުން އެކްޓިވް ކޭސްތަކުގެ އަދަދު 1000 އިން ދަށަށް
19 އޮކްޓޯބަރު 2020 | ހޯމަ 18:02ޕޮޒިޓިވްވި މީހުންގެ ޖުމްލަ އަަދަދު ވަނީ 11،232
ކޮވިޑް-19 އަށް ސާމްޕަލް ނަގަނީ
ރާއްޖެއިން ކޮވިޑް-19 އަށް އިތުރު 22 މީހަކު ޕޮޒިޓިވް ވެއްޖެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން ދީފައިވާ ކޮވިޑްގެ އަދާހަމައަށް ބަލާއިރު، ހޯމަ ދުވަހު ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 18 މީހަކާއި އަތޮޅުތެރެއިން ޕޮޒިޓިވްވި ހަތަރު މީހެކެވެ. ޕޮޒިޓިވްވި މީހުންގެ ތެރޭގައި ހިމެނެނީ 17 ދިވެހިންނާއި ފަސް ބިދޭސީންނެވެ. އެއާއި އެކު ޕޮޒިޓިވްވި މީހުންގެ ޖުމްލަ އަަދަދު ވަނީ 11،232 އަށް އަރާފައެވެ.
ފާއިތުވި 24 ގަޑިއިރުގެ ތެރޭގައި ޓެސްޓް ކުރެވިފައިވާ ސާމްޕަލްގެ އަދަދަށް ބަލާއިރު، 1338 ސާމްޕަލް ވަނީ ޓެސްޓް ކޮށްފައެވެ. މި ވަގުތު އެކްޓިކް ކޭސްތަކުގެ އަދަދު 987 އަށް ތިރިވެފައިވާ އިރު، ރިކަވަރވީ މީހުންގެ އަދަދުތައް ވަނީ 10،201 އަށް އަރާފައެވެ.
އައިސޮލޭޝަން ފެސިލިޓީތަކާއި ހޮސްޕިޓަލްތަކަށް ބަލާއިރު، އައިސޮލޭޝަން ފެސިލިޓީތަކުގައި ތިބި މީހުންގެ އަދަދަކީ 354 އެކެވެ. އަދި ހޮސްޕިޓަލުގައި އެޑްމިޓް ކޮށްގެން ފަރުވާ ދެމުން ދަނީ 39 މީހަކަށެވެ. ރާއްޖެއިން މި ބަލީގައި މަރުވީ މީހުންގެ ޖުމްލަ އަދަދަކީ 37 އެވެ.
ޕޮޒިޓިވް ކޭސްތައް މަދުވަމުން ދިޔަ ނަމަވެސް ރައްކާތެރިކަމުގެ ގޮތުން އަޅާފައިވާ ފިޔަވަޅު ތަކަށް ސަމާލުކަން ދިނުމަށް އެޗްޕީއޭއިން އިލްތިމާސް ކުރެއެވެ. އެގޮތުން އެޗްޕީއޭގެ ގައިޑްލައިންތަކާއި އެއްގޮތަށް އަމަލު ކުރުމަށާއި، ސާފުތާހިރު ކަމަށް ޚާއްސަ ސަލާމުކަމެއް ދިނުމަށް ވެސް ވަނީ އިލްތިމާސް ކޮށްފައެވެ.
