ކޮވިޑް ޖެހިގެން 80 އަހަރުގެ ދިވެއްސަކު ނިޔާވެއްޖެ
ނިޔާވީ 80 އަހަރުގެ ދިވެހި ފިރިހެނެއް
އެމީހާ ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުންދަނިކޮށް
ކޮވިޑް-19 ޖެހިގެން ރާއްޖެއިން އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ނިޔާވެފައިވަނީ އުމުރުން 80 އަހަރުގެ ދިވެހި ފިރިހެނެއް ކަމަށެވެ. އޭނާ ނިޔާވެފައިވަނީ އާދިއްތަ ދުވަހުގެ 3:50 ހާއިރު، ހުޅުމާލެ މެޑިކަލް ފެސިލިޓީގައި ފަރުވާދެމުން ދަނިކޮށް ކަމަށް އެޗްޕީއޭއިން މައުލޫމާތު ދެއެވެ.
މިއީ ކޮވިޑް ޖެހިގެން ރާއްޖެއިން ނިޔާވި 37 ވަނަ މީހާއެވެ. އަދި މިއީ ރާއްޖޭގައި ދުވަސްތަކެއް ފަހުން ޖެހިޖެހިގެން ދެ ދުވަހު މި ބަލީގައި ބަޔަކު ނިޔާވެގެން ރިޕޯޓް ކުރެވުނު ފަހަރު ކަން ފާހަގަކޮށްލެއެވެ. ހޮނިހިރު ދުވަހު ހެނދުނުގެ ވަގުތެއްގައި ނިޔާވީ 67 އަހަރުގެ ދިވެހި ފިރިހެނެކެވެ.
ހޮނިހިރު ދުވަހު އެޗްޕީއޭއިން އާންމުކޮށްފައިވާ އަދަދުތަކަށް ބަލާއިރު، 24 ގަޑިއިރުގެ ތެރޭގައި މި ބައްޔަށް ޕޮޒިޓިވްވެފައިވަނީ 24 މީހެކެވެ. އަދި މިއާއެކު ރާއްޖެއިން މި ބަލި ޖެހުނު މީހުންގެ އަދަދު ވަނީ 11،178 އަށް އަރާފައެވެ. މި ވަގުތު އެކްޓިކް ކޭސްތަކުގެ އަދަދު 1038 އަށް ތިރިވެފައިވާ އިރު، ރިކަވަރވީ މީހުންގެ އަދަދުތައް ވަނީ 10،097 އަށް އަރާފައެވެ.
