ގެސްޓް ހައުސް އެސޯސިއޭޝަންގެ އިސް މަގާމުތަކަށް ކުރިމަތިލުމަށް ހުޅުވާލައިފި
18 އޮކްޓޯބަރު 2020 | އާދީއްތަ 10:24ރައީސް އާއި ނައިބުރައީސްގެ އިތުރުން ސެކްރެޓަރީ ޖެނެރަލް އާއި ކޯޕަރޭޓް އެފެއާޒް އަދި އެކްސްކޯ މެންބަރުގެ ދެ މަގާމަށް ކުރިމަތިލުމަށް ހުޅުވާލާފައިވޭ
ގެސްޓް ހައުސް އެސޯސިއޭޝަން އޮފް މޯލްޑިވްސް (ގޭމް)އިން މިއަހަރު ބޭއްވި އަހަރީ ބައްދަލުވުމުގެ ތެރެއިން
ގެސްޓްހައުސް އެސޯސިއޭޝަން އޮފް މޯލްޑިވްސް، (ގޭމް)ގެ އިސް މަގާމުތަކަށް ކުރިމަތިލުމަށް ހުޅުވާލައިފިއެވެ.
ގޭމްއިން ނެރެފައިވާ ނޫސްބަޔާނެއްގައި ބުނެފައިވަނީ، އެ ޖަމިއްޔާގެ ރައީސް އާއި ނައިބު ރައީސްގެ އިތުރުން ސެކްރެޓަރީ ޖެނެރަލް އާއި ކޯޕަރޭޓް އެފެއާޒް އަދި އެކްސްކޯ މެންބަރުގެ ދެ މަގާމަށް ކުރިމަތިލުމަށް ހުޅުވާލައިފައެވެ.
އެ ނޫސްބަޔާނުގައި ބުނެފައިވާ ގޮތުން، އެ މަގާމުތަކަށް ކުރިމަތިލެވޭނީ މިދިޔަ ސެޕްޓެމްބަރު މަހުގެ ނިޔަލަށް އެ އެސޯސިއޭޝަންގެ ގޯލްޑް މެންބަރޝިޕް ރަޖިސްޓްރީކޮށް އަހަރީ ފީ ދައްކާފައިވާ ފަރާތްތަކަަށެވެ. އަދި އެ އެސޯސިއޭޝަން ތަމްސީލް ކުރުމަށް ރަޖިސްޓްރީ ކޮށްފައިވާ ފަރާތަކަށްވުމާއި، 18 އަހަރު ވެފައިވާ ދިވެއްސަކަށެވެ. މީގެއިތުރުން ތަމްސީލް ކުރާ ގެސްޓްހައުސްގެ މުއްދަތު ހަމަނުވާ ޓޫރިޒަމް ލައިސަންސައެއް އޮތުމަކީ ގެސްޓް ހައުސް އެސޯސިއޭޝަންގެ އިސް މާގަމަށް ކުރިމަތި ލުމަށް އޮތް ޝަރުތުތަކުގެ ތެރޭގައި ހިމެނޭ ޝަރުތެކެވެ. މީގެ އިތުރުން ޖިނާއި ކުށެއް ސާބިތުވެ، ހުކުމެއް ތަންފީޒު ކުރާ ފަރާތަކަށް އެ މަގާމުތަކަށް ކުރިމަތި ނުލެވޭނެ ކަމަށް ވެސް އެ އެސޯސިއޭޝަނުން ބުނެއެވެ.
އެ މަގާމުތަކަށް ކުރިމަތިލުމުގެ ފުރުސަތު މި އޮކްޓޯބަރު މަހުގެ 18 ވަނަ ދުވަހަށް ކުރިން އޮތް ނަމަވެސް މިހާރު އެ އެސޯސިއޭޝަނުން ވަނީ މި މަހުގެ 20 ވަނަ ދުވަހުގެ ނިޔަލަށް އިތުރު ކޮށްފައެވެ.
ގެސްޓް ހައުސް އެސޯސިއޭޝަނުން ބުނީ، އެ އެސޯސިއޭޝަންގެ އިސް މަގާމު ތަކަށް މެމްބަރުން އައްޔަން ކުރުމަށްޓަކައި ބާއްވާ، ބައި އިލެކްޝަން އޮންނާނީ މި މަހުގެ 31 ވަނަ ދުވަހު ކަމަށެވެ.
ރާއްޖޭގައި ގެސްޓް ހައުސް އެސޯސިއޭޝަނެއް ހިންގަމުންދާއިރު، ގެސްޓް ހައުސް ވިޔަފާރި އަކީ ރާއްޖޭގައި ފުޅާ ދާއިރާއެއްގައި ކުރިއަރަމުން އަންނަ ފަތުރުވެރިކަމުގެ ސިނާއަތުގެ މުހިއްމު ދާއިރާ އެކެވެ.
ކޮވިޑް-19 އާގުޅިގެން ރާއްޖޭގެ ބޯޑަރު މިއަހަރުގެ މާރޗު 27 ގައި ބަންދު ކުރުމަށްފަހު އަލުން ބޯޑަރު ހުޅުވާލީ ޖުލައި މަހުގެ 15 ވަނަ ދުވަހު އެވެ. އަލުން ބޯޑަރު ހުޅުވާލައި ބައެއް ރިސޯޓްތައް ހުޅުވި ނަމަވެސް، ގެސްޓް ހައުސް ވިޔަފާރިތަކަށް ފަތުރުވެރިން އައުމުގެ ހުއްދަ ދީފައިވަނީ މި އޮކްޓޯބަރު މަހުގެ 15 ވަނަ ދުވަހުއެވެ.
