ގާސިމްގެ މައްޗަށް ކޮށްފައިވަނީ އެއްވެސް އަސާސެއް ނެތް ތުހުމަތުތަކެއް: ޖޭޕީ

ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ މައްޗަށް ކޮށްފައިވަނީ އެއްވެސް އަސާސެއް ނެތް ތުހުމަތުތަކެއް ކަމަށް ޖުމްހޫރީ ޕާޓީން ބުނެފިއެވެ.

ގާސިމް އިބްރާހިމް ބުރާސްފަތި ދުވަހުގެ ރޭ ހައްޔަރުކޮށްގެން ގެންދިއުމުން އެޕާޓީން ނެރުނު ނޫސްބަޔާނުގައި ބުނެފައިވަނީ ގާސިމް އިބްރާހިމް ކުއްލިގޮތަކަށް ހައްޔަރު ކޮށްފައިވަނީ މީގެ ކުރިންވެސް އެމަނިކުފާނުގެ މައްޗަށް އެއްވެސް އަސާސެއް ނެތް ތުހުމަތުތަކެއް ކުރައްވާފައިވާ މައްސަލައަކާއި ގުޅޭ، އެފަދަ އެހެން މައްސަލައެއްގައިކަމަށެވެ.

ޤާސިމް އިބްރާހިމް މިފަހަރު ވެސް އޮންނެވީ ކުރިންވެސް އޮންނެވި ގޮޅީގައި ކަމަށާއި އެ ގޮޅިޔަކީ ވައި ދައުރުނުވާ ގޮތަށް ހުރި ގޮޅިއެއް ކަމަށް ވުމުން އެކަން ރަނގަޅުކުރުމަށް ކްރިމިނަލް ކޯޓުން ފުލުހުންނަށް އަމުރު ކުރިކަމަށް ޖޭޕީގެ ބަޔާނުގައި ބުނެފައިވެއެވެ. އެކަން ރަނގަޅުނުކޮށް އެ ގޮޅީގައި ބެހެއްޓުމަކީ އެޕާޓީން ނުހަނު ކަންބޮޑުވާކަމެއްކަމަށް ބަޔާނުގައި ވެއެވެ.

ގާސިމް ހައްޔަރުކޮށްގެން ގެންދިޔައިރު އެމަނިކުފާނުގެ ގާނޫނީ ޓީމާއި އާއިލާގެ އެއްވެސް މީހަކާއި ބައްދަލުކުރަން ފުރުސަތު ދީފައި ނުވާތީ ހިތާމަކުރާކަމަށްވެސް ޖޭޕީގެ ބަޔާނުގައި ބުނެފައިވެއެވެ.

އަދި މީގެ އިތުރުން ރާއްޖޭގެ ރައްޔިތުންގެ އިތުބާރާއި ތާއީދު ލިބިފައިވާ ސިޔާސީ ލީޑަރުން ރާއްޖޭގެ ރައްޔިތުންގެ ލާބަޔާއި މަންފާއަށްޓަކައި ފައްޓާފައިވާ މަސައްކަތްތައް ހުއްޓާލުމުގެ ބޭނުމުގައި ސަރުކާރުގެ ބޭރުން ކުރަމުންދާ ނޭދެވޭ ކަންކަމާމެދު މި ޕާޓީން ކަންބޮޑުވާކަމަށެވެ.

ގާސިމް ހައްޔަރުކުރުމަށް ނެރުނު ކޯޓު އަމުރުގައި ބުނެފައިވަނީ، އެ މައްސަލަތަކަކީ މިހާރު ތަހުޤީޤްކުރަމުންގެންދާ މައްސަލަތަކަކަށްވާއިރު، ޤާސިމް އިބްރާހިމް މުޖުތަމައުއަށް ދޫކޮށްފައި ބެހެއްޓުމަކީ މައްސަލައިގެ ތަހުޤީގަށް ހުރަސްއެޅޭނެކަމެއް ކަމަށެވެ. އަދި ޤާސިމް އިބްރާހިމް މުޖުތަމައުއަށް ދޫކޮށްފައި ބަހައްޓިފިނަމަ ނަމަ ހެކި ފޮރުވުމަށް މަސައްކަތްކޮށް، ހެކިދޭންތިބި މީހުންނަށް ނުފޫޒު ފޯރުވުމަށް މަސައްކަތްކޮށްފާނެ ކަމަށެވެ. އޭގެއިތުރުން ޤާސިމް އިބްރާހިމް މުޖުތަމައުއަށް ދޫކޮށްފައި ބެހެއްޓުމަކީ މުޖުތަމައުގެ ސަލާމަތަށް ހުރި ނުރައްކަލެއް ކަމަށް ކޯޓު އަމުރުގައި ބުނެފައިވެއެވެ.