ލޯންޗެއްގައި ދަތުރުކުރަމުން ދަނިކޮށް، ފިޓް ޖެހުނު މީހާ ކޯސްޓުގާޑުގެ އެހީތެރިކަމާއެކު އައިޖީއެމްއެޗަށް ގެންގޮސްފި
އެމީހާ ހުކުރު ދުވަހުގެ 10:50 ހާއިރު މާލެ ގެނެސް އައިޖީއެމްއެޗްގައި ދަނީ ފަރުވާ ދެމުން
އެމްއެންޑީއެފްގެ ކޯސްޓްގާޑުގެ އުޅަނދެއް: ރާއްޖޭގެ މޫސުން މިދުވަސްވަރު ގޯސްކޮށް އުޅޭތީ ދަތުރުފަތުރުކުރާ ފަރާތްތަކުން ސަމާލުވުމަށް ކަމާބެހޭ އިދާރާތަކުން ވަނީ އަންގާފައި
ދަތުރުކުރަމުންދިޔަ ލޯންޗެއްގައި ހުރި ފިރިހެނަކަށް ފިޓް ޖެހުމުގެ ސަބަބުން ސިއްހީ ހާލަތު ގޯސްވުމުން އެމްއެންޑީއެފްގެ ކޯސްޓްގާޑުގެ އެހީތެރިކަމަށް އެދި ރިޕޯޓް ކުރުމާއެކު، ކޯސްޓްގާޑު ގޮސް، އެމީހާ އައިޖީއެމްއެޗަށް ގެނެގޮސް ފަރުވާދޭން ފަށައިފި އެވެ.
އެމްއެންޑީއެފުން ބުނީ، ކ. ފިހާޅޮހި އައިލެންޑް ރިސޯޓު ކައިރިން ދަތުރު ކުރަމުންދިޔަ ލޯންޗެއްގައި ހުރި 36 އަހަރުގެ ފިރިހެނަކަށް ކުއްލި ހިއްސީ މައްސަލައެއް ދިމާވެގެން، އެ މީހާއަށް އަވަސް ފަރުވާ ދިނުމަށްޓަކައި އެމްއެންޑީއެފް ކޯސްޓްގާޑަށް ގުޅުމުން، މާލެ އޭރިއާގެ ކޯސްޑްގަޑު ސްކޮޑްރަން އިން އެމީހާއަށް އެހީތެރިކަން ފޯރުކޮށްދީފައިވާ ކަމަށެވެ.
އެމްއެންޑީއެފުން ބުނީ، މިހާތަނަށް ލިބުނު މައުލޫމާތުން އެމީހާއަށް ފިޓް ޖެހުނީ ކަމަށާއި، އަދި އެމީހާ ހުކުރު ދުވަހުގެ 10:50 ހާއިރު މާލެ ގެނެސް އައިޖީއެމްއެޗްގައި ފަރުވާ ދެމުންދާ ކަމަށެވެ.
ރާއްޖޭގެ މޫސުމާބެހޭ ގައުމީ އިދާރާއިން ބުނެފައިވާ ގޮތުގައި، މިދުވަސް ވަރަކީ ރާއްޖޭގެ މޫސުން ގޯސް ދުވަސްވަރެއް ކަމަށެވެ.
މޫސުން ގޯސްވެ ށ. އަތޮޅުން ތ. އަތޮޅަށް ޔެލޯ އެލަރޓް ނެރެެ, އުދަ އަރާފާނެ ކަމަށް ލަފާކޮށް ސަމާލުވުމަށްވެސް ހުކުރު ދުވަހު މޫސުމާބެހޭ ގައުމީ އިދާރާއިން ނެރެފައިވާ އެލާރޓްގައި ވެސް ބުނެފައި ވެއެވެ.
މޫސުމާއި ބެހޭ ގައުމީ އިދާރާއިން ބުނީ ށ. އަތޮޅުން ތ. އަތޮޅަށް ބޯކޮށް ވާރޭވެހުމާއެކު ގަޑިއަކު 25 މޭލާއި 30 މޭލާއި ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ގަދަވާނެ ކަމަށެވެ.
ށ. އަތޮޅުން ފެށިގެން ތ. އަތޮޅަށް އެލަރޓް ނެރިފައިވަނީ ހުކުރު ދުވަހުގެ ހެނދުނު 11:00ން ފެށިގެން މެންދުރުފަހު 3:00އާ ހަމައަށެވެ. ސެޓްލައިޓް ފޮޓޯތައް ދައްކާ ގޮތުން ރާއްޖޭގެ މަތީގައި ގިނަ އަދަދެއްގެ ވިއްސާރަ ވިލާ ވަނީ އުފެދިފައެވެ.
