ދެވަނަ ޑިވިޝަން ފުޓުބޯޅަ މުބާރާތް: މަހިބަދޫން ފެށުން ރަނގަޅުކޮށްފި

އެމްޓީސީސީ ދެވަނަ ޑިވިޝަން ފުޓުބޯޅަ މުބާރާތުގައި ސްޕޯޓްސް ކްލަބް މެކާނޯ ބަލިކުރުމަށްފަހު މަހިބަދޫ ސްޕޯޓްސް ކްލަބުން ފެށުން ރަނގަޅުކޮށްފިއެވެ.

މުބާރާތުގައި ކުޅުނު ފުރަތަމަ މެޗު މެކާނޯއާ ވާދަކޮށް މަހިބަދޫ އިން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

މުބާރާތް ހުޅުވައިދެއްވީ ދެވަނަ ޑިވިޝަންގެ ސްޕޮންސަރުންނެވެ. މީގެއިތުރުން މުބާރާތް ހުޅުވުމުގެ ކުރިން މުބާރާތުގެ އެންމެ ފަހުގެ ޗެމްޕިއަން ކްލަބް ގްރީން ސްޓްރީޓުން ވަނީ މުބާރާތުގެ ތަށި އެފްއޭއެމްއާ ހަވާލުކޮށްފައެވެ. އެފްއޭއެމްގެ ފަރާތުން ތައްޓާ ހަވާލުވީ ޖެނެރަލް ސެކެޓްރީ ހުސެއިން ޖަވާޒް (ޖަވާ) އެވެ.

މާފަންނު ޓާފް ދަނޑުގައި ކުޅުނު މި މެޗު ފެށިގެން ހަ ވަނަ މިނެޓުގައި މަހިބަދޫ އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އިސްމާއިލް ނަޒީރް އެވެ. އޭނާ މި ލަނޑު ކާމިޔާބުކުރީ އޯވާހެޑް ކިކަކުންނެވެ.

މި ލަނޑަށްފަހުވެސް މަހިބަދޫއަށް ވަނީ ލީޑު ފުޅާކުރުމަށް ގިނަ ފުރުސަތުތަކެއް ލިބިފައެވެ. މީގެއިތުރުން މެކާނޯއަށްވެސް މެޗުގެ ނަތީޖާ ހަމަހަމަ ކުރުމަށް ގިނަ ފުރުސަތުތަކެއް ވަނީ ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއަކުން މެކާނޯގެ މައްޗަށް މަހިބަދޫ ކުރީގައި އޮވެގެންނެވެ.

ދެވަނަ ހާފް ފެށިގެން ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، 82 ވަނަ މިނެޓުގައި އިއްޒަތު އަބްދުލް ބާރީ ކާމިޔާބުކުރި ލަނޑުން މަހިބަދޫ އިން ވަނީ މެޗުގެ ލީޑު ފުޅާކޮށްފައެވެ.

މުބާރާތުގައި އާދީއްތަ ދުވަހުވެސް މެޗެއް ކުޅޭނެއެވެ. އާދީއްތަ ދުވަހު ކުޅޭ މެޗުގައި ބައްދަލުކުރާނީ ދަ ގްރާންޑޭ އަމީގޯސް ނިއު ޖެނެރޭޝަން ސްޕޯޓްސް ކްލަބް އަދި ޖޭޖޭ ސްޕޯޓްސް ކްލަބެވެ.