ރޭޕްގެ މައްސަލަތަކުގައި ސާމްޕަލް ނެގުމަށް ދޭ ރުހުން ލިޔުމުން ހޯދުމަށް ޕީޖީ އޮފީހުން ލަފާ ދީފި

ރޭޕްގެ އަނިޔާ ލިބޭ މީހާގެ ސާމްޕަލް ނެގުމަށް އޭނާ ނުވަތަ އޭނާގެ ބެލެނިވެރި ފަރާތް ދޭ ރުހުމަކީ ލިޔުމުން ދޭ ރުހުމެއް ކަމަށް ލާޒިމު ކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ލަފާދެއްވައިފިއެވެ.

ބުދަ ދުވަހު ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ޤާނޫނު ނަމްބަރު 17/2014 ޖިންސީ ކުށުގެ ޤާނޫނަށް އިސްލާޙު ގެނައުމުގެ ބިލާ ގުޅޭގޮތުން ވަނީ މަޝްވަރާ ކޮށްފައެވެ. އެގޮތުން މި އިސްލާޙަކީ އެފަދަ މައްސަލަތަކުގައި ސާމްޕަލް ނަގާއިރު، "ރޭޕް އެވިޑެންސް ސާމްޕަލް ކަލެކްޝަން ކިޓް" ބޭނުން ކޮށްގެން ކުށުގެ ޝިކާރައަކަށްވީ ފަރާތުގެ ސާމްޕަލް ނަގައި ތަހުލީލު ކުރުން ލާޒިމް ކުރަން ޖިންސީ ކުށުގެ ގާނޫނަށް ހުށައަޅާފައިވާ އިސްލާޙެކެވެ.

މި އިސްލާޙާ ގުޅޭގޮތުން މަޝްވަރާ ކުރުމަށް ބުދަ ދުވަހުގެ ކޮމިޓީ ބައްދަލުވުމަށް ވަޑައިގެން ޕީޖީ އޮފީހުގެ ޕަބްލިކް ޕްރޮސެކިއުޓަރ ވިދާޅުވީ، މިބާވަތުގެ ކުށުގެ ޒާތަށް ބަލާއިރު ސާމްޕަލް ނެގުމަށް ލިއުމުން ރުހުން ދޭ ގޮތަށް އޮންނަ ނަމަ އެ ހެކި ބަލައިގަންނާނެކަން ކަށަވަރުވުމުގައި އެހީއަކަށް ވެގެންދާނެ ކަމަށެވެ.

އޭނާ ވިދާޅުވީ، ގިނަ ޖިނާއީ މައްސަލަތަކުގައި ޝަރީއަތުގެ މަރުޙަލާއަށް ދާއިރު، އަނިޔާ ލިބޭ މީހުން ރުހުން ދޭން ދެކޮޅު ހަދާ ފަހަރު އަންނަ ކަމަށެވެ.

އޭގެ އިތުރުން، މިހާރު އަމަލު ކުރަމުންދާ ގޮތަށް އަލިއަޅުވާލައްވާ އޭނާ ވިދާޅުވީ، ހަމައެކަނި އަނިޔާލިބޭ މިހާގެ ބަހަށް ރިއާޔަތް ކުރާނަމަ، ފަހުން ޝަރީއަތުގެ މަރުޙަލާގައި އެކަމަށް ދެކޮޅު ހަދާ ޙާލަތްތަކުގައި ވެސް ރުހުން ދިންކަން ސާބިތު ކުރެވޭނެ ގޮތެއް ނޯންނަ ކަމަށެވެ.

ޖިންސީ ކުށުގެ ޤާނޫނަށް ހުށައެޅިފައިވާ އިސްލާޙާ ގުޅޭގޮތުން މީގެ ކުރިންވެސް ކޮމިޓީން ވަނީ ކަމާބެހޭ ފަރާތްތަކާއެކު މަޝްވަރާ ބައްދަލުވުންތައް ބާއްވާފައެވެ. އެގޮތުން އެކަމާ ގުޅޭގޮތުން ވާހަކަ ދައްކަވަމުން އޭޑީކޭގެ ޑޮކްޓަރ އަބްދުﷲ ނިޔާފް ވިދާޅުވީ، ކޮންސެންޓް (ރުހުން އޮތްކަން) އާ ގުޅޭ ކަންކަން ޤާނޫނުގައި ބަޔާންވެފައި އޮތް ނަމަވެސް، ޖިންސީ ކުށުގެ ޤާނޫނަށް އިސްލާޙު ގެނައުމުގެ ބިލު ފުރިހަމަވެގެން އަންނައިރު އެކަން ތަފްސީލުކުރުން މުހިއްމު ކަމަށެވެ. އެގޮތުން މީހެއްގެ ޖިންސީ ގުނަވަނަކުން އޭނާގެ ރުހުމަކާ ނުލައި ސާމްޕަލް ނެގުމަކީވެސް ޖިންސީ ހާނިއްކައެއްކަމަށް ޑރ ނިޔާފް ވިދާޅުވިއެވެ.

ކޮންސެންޓާ ގުޅޭގޮތުން ވާހަކަ ދައްކަވަމުން ޑޮކްޓަރުން އިތުރަށް ވިދާޅުވީ، ކުޑަކުދިން ނުވަތަ ޚާއްސަ އެހީއަށް ބޭނުންވާ މީހުން ހިމެނޭ ޙާލަތްތަކުގައި ކޮންސެންޓް ދޭނީ ކާކުކަން ނުވަތަ އަނިޔާ ދިން މީހާ ކޮންސެންޓް ދޭ މީހާގެ ގޮތުގައި ހުރިނަމަ ދެން އަމަލު ކުރާނެ ގޮތްވެސް ބަޔާން ކޮށްފައި އޮންނަން ޖެހޭ ކަމަށެވެ.

އެކަން ބުދަ ދުވަހު އޮތް ކޮމިޓީ ބައްދަލުވުމުގައި ބައިވެރިވެވަޑައިގަތް ޕީޖީ އޮފީހުގެ އޮފިޝަލުވެސް ފާހަގަ ކުރެއްވިއެވެ. އެގޮތުން އޭނާ ވިދާޅުވީ، ކުޑަކުދިންނާ ގުޅޭ މައްސަލަތަކުގައި ރުހުން ދޭނީ ކާކުކަން ކަނޑައަޅާއިރު، ކުއްޖާގެ މަސްލަޙަތު ހިމާޔަތް ކުރާ މީހުންނަކީ ކޮބައިކަން ޤާނޫނުގައި ތަފްސީލުވެގެން އަންނަންޖެހޭ ކަމަށެވެ.

ޖިންސީ ކުށުގެ ޤާނޫނަށް އިސްލާޙު ހުށައެޅުއްވީ ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިންއެވެ.