ޅޮހީގައި މި ވަގުތު އޮތް ބަނދަރުގެ ކުޑަވުމުން ލަފާފުރުމަށް ދަތިވޭ: ކައުންސިލް
14 އޮކްޓޯބަރު 2020 | ބުދަ 18:07އެ ރަށަކީ ކަންނެލީގެ މަސްވެރިކަން ކުރާ ރަށެއް
އެންމެ ބޮޑު އުންމީދަކީ ބަނދަރު މަޝްރޫއުގެ މަސައްކަތް އަވަހަށް ފެށިގެން ދިޔުން
ނ. ޅޮހީގައި މިވަގުތު އޮތީ ވަރަށް ކުޑަ ބަނދަރެއް ކަމަށާ އޭގެ ސަބަބުން ލަފާފުރުމަށް ނުހަނު ގިނަ ގޮންޖެހުންތަކެއް ދަނީ ކުރިމަތި ވަމުން ކަމަށް އެރަށު ކައުންސިލުން ވިދާޅުވެއްޖެއެވެ.
އެރަށު ބަނދަރު އަޕްގްރޭޑް ކުރުމުގެ މަޝްރޫއުއާ ބެހޭ މައުލޫމާތު ރާއްޖެއެމްވީއާ ހިއްސާ ކުރައްވަމުން އެ ރަށު ކައުންސިލްގެ ނައިބު ރައީސް ފާތިމަތު ނައީމާ ވިދާޅުވީ މި މަޝްރޫއު އަކީ މިހާރު ރައްޔިތުން ދެކެމުން އަންނަ އެންމެ ބޮޑު އެއް ހުވަފެން ކަމަށާ މިހާރު ރަށުގައި އޮތް ބަނދަރުން ރައްޔިތުންނަށް އެތަކެއް ދަތި ތަކާ ކުރިމަތި ވާކަމަށެވެ.
އެގޮތުން މިހާރު ރަށުގައި އޮތީ ވަރަށް ކުޑަ ބަނދަރެއް ކަމަށާ މިކަމުގެ ސަބަބުން ލަފާފުރުމަށް ތަފާތު އެތަކެއް އުނދަގޫތަކަކާ ކުރިމަތި ވާކަމަށް އޭނާ ވިދާޅުވިއެވެ. އަދި ބަނދަރު ވަނީ ވަރަށް ބޮޑަށް ހަލާކު ވެފައި ކަމަށާ އަދި މިހާރު ބޭނުން ކުރަން އެކަށީގެން ނުވާކަމަށްވެސް ނައީމާ އިތުރަށް ވިދާޅުވިއެވެ.
މީގެ އިތުރުން އެރަށަކީ ކަންނެލީގެ މަސްވެރިކަން ކުރާ ރަށެއް ކަމަށާ މަސްވެރިކަން ކުރާ 6 ދޯނި މިހާރުވެސް އޮންނަ ކަމަށް އޭނާ ވަނީ ވިދާޅުވެފައެވެ. މި ހުރިހާ ދޯނިތައް އެއްފަހަރާ ރަށަށް އަތުވެއްޖެ ނަމަ މި ދޯނިތައް އެޅޭނެ ޖާގައެއް ބަނދަރު ގައި ނޯންނަ ކަމަށްވެސް އޭނާ ވިދާޅުވިއެވެ.
އައިސް ޕްލާންޓް އެރަށުގައި ހުރުމާއެކު ރަށުން ބޭރުގެ ގިނަ އަދަދެއްގެ އުޅަނދު ފަހަރު ވެސް އެރަށަށް އަންނަ ކަމަށާ އެހެނަސް ފަޅުގައި ޖާގަ ނޯންނަ މައްސަލަ ދިމާވާ މައްސަލަ ވެސް ނައީމާ ހިއްސާކުރެއްވިއެވެ.
މިހާރު ރައްޔިތުންގެ އެންމެ ބޮޑު އުންމީދަކީ މި މަޝްރޫއުގެ މަސައްކަތް އަވަހަށް ފެށިގެން ދިޔުމާއެކު އަވަހަށް މިކަން ނިމި ރައްޔިތުންނަށް ދިމާވާ އުނދަގޫތަކަށް ހައްލެއް ލިބިގެން ދިޔުން ކަމަށްވެސް އޭނާ ވިދާޅުވިއެވެ. އަދި އަލަށް ގާއިިމް ކުރެވިގެންދާ ބަނދަރަކީ ރަށަށް އެކަށީގެންވާ ބަނދަރެއް ކަމަށް އުއްމީދު ކުރެވޭކަމަށްވެސް އޭނާ ވަނީ ވިދާޅުވެފައެވެ.
މިހާރު މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން މި މަޝްރޫއުގެ ޕްރިލިމިނަރީ ކޮންސެޕްޓަށް ކައުންސިލްގެ ފަރާތުން ލިބިފައިވާ ކޮމެންޓްތަށް ރިވިއު ކުރުމަށްފަހު ބަދަލު ގެނައުމުގެ މަރުހަލާ ވަނީ ފަށާފައެވެ. އަދި ބުދަ ދުވަހު ސަރވޭގެ މަސައްކަތް ވަނީ ނިންމާލާފައެވެ.
މިއީ ދިވެހި ސަރުކާރުގެ ބަޖެޓުން ފަންޑުކުރާ މަޝްރޫއު އަކަށް ވީއިރު 2020 ވަނަ އަހަރަށް މި މަޝްރޫއު އަށް ކަނޑައަޅާފައިވަނީ 3،850،000 ދިވެހި ރުފިޔާއެވެ.
