ވިލިމާލޭގައި ގަސް އިންދަން ވަކި ބިމެއް ހަމަޖައްސައިފި
14 އޮކްޓޯބަރު 2020 | ބުދަ 08:22ހުސް ބިންތަކުގައި ގަސް އިންދާ މައްސަަލަ ވަނީ ބޮޑުވެފައި
ވިލިމާލޭގެ ހުސްބިން ތަކުގައި ގަސް އިންދާ މައްސަލާގައި ކައުންސިލުން ބޭއްވި ކުއްލި ބައްދަލުވުމުގެ ތެރެއިން
ވިލިމާލޭ ގައި ގަސް އިންދަން ބޭނުންވާ ފަރާތްތަކަށް ހާއްސަ ކޮށްގެން ބިމެއް ހަމަޖައްސައިފައިވާ ކަމަށް މާލެ ސިޓީ ކައުންސިލުން ބުނެފިއެވެ.
ވިލިމާލޭ ހުސް ބިންތަކުގައި ގަސް އިންދާ މައްސަަލަ ބޮޑުވެ އެ ތަންތަން ނަގަން ފަށައި ބިންތައް ހުސް ކުރަން ސިޓީ ކައުންސިލުން ވަނީ ފަށާފައެވެ. އެކަމާއި ދެކޮޅަށް ގަސް އިންދަމުން އައި މީހުންގެ ވަނީ ކަންބޮޑުވުން ވެސް ފާޅު ކޮށްފައެވެ. ރައްޔިތުންގެ ޝަކުވާތަކާއި ގުޅިގެން ވިލިމާލެ ކައުންސިލަރު ހަމްނާ ވަހީދު ހިމެނޭ ގޮތަށް ވަނީ ކައުންސިލްގެ ކުއްލި ބައްދަލުވުމެއް ހޯމަ ދުވަހު ބާއްވާފައެވެ.
ބައްދަލުވުމާއި ގުޅޭ ގޮތުން އަންގާރަ ދުވަހު ''ރާއްޖެ.އެމްވީ'' އާ ވާހަކަ ދައްކަވަމުން ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވީ، ވަގުތީ ގޮތުން ގަސް އިންދަން ބިމެއް ދޫކޮށްފައިވާ ކަމަށެވެ. ގަސް އިންދަން ދޫކުރި ބިމަކީ ވިލިމާލޭ ބޭންކް އޮފް މޯލްޑިވްސް ސަރަހައްދުގައި އޮންނަ ބިމެކެވެ.
ޝިފާ ވިދާޅުވީ، ވިލިމާލޭ ގައި ދިރިއުޅޭ ރައްޔިތުންނަށް ގަސް ހެއްދުމުގެ އިތުރުން އެހެން މަސައްކަތްތައް ކުރަން މަގު ފަހިކޮށް ދިނުމުގެ މަސައްކަތް ކުރަމުންދާ ކަމަށެވެ. އަދި އެކަމާއި ދެކޮޅަށް އަބަދުވެސް ވަކާލާތު ކުރައްވަމުން ގެންދަވާ ކަމަށް ވިދާޅުވިއެވެ. ހުސް ބިންތަކުގައި އިންދާފައި ހުރި ގަސްތައް ނަގަން ކައުންސިލުން ދީފައިވާ މުއްދަތު ހަމަވާނީ އަންނަ މަހުގެ ހަތް ވަނަ ދުވަހުއެވެ. ޝިފާ ވިދާޅުވީ، ގަސް އިންދުމުގެ އުސޫލެއް އެކުލަވާލުމުގެ މަސައްކަތް ކުރައްވަމުން ގެންދަވާ ކަމަށާއި، އެކަން ނިމުމުން އުސޫލު އާއްމު ކުރައްވާނެ ކަމަށެވެ.
ވިލިމާލެ އަށް ދިމާވެފައިވާ އެންމެ ބޮޑު މައްސަލަ ތަކުގެ ތެރޭގައި ގަސް އިންދުމުގެ އުސޫލެއް ކަނޑައެޅިފައި ނެތުންކަން ކައުންސިލުން ވަނީ މީގެ ކުރިން ވެސް ފާހަގަކޮށްފައެވެ. ރައްޔިތުންގެ ކަންބޮޑުވުންތަކާއި ގުޅިގެން ވިލިމާލޭގެ ކައުންސިލަރު ވިދާޅުވެފައިވަނީ ރައްޔިތުން ކުރަމުން އަންނަ ކަންތައްތަކަށް ހުރަސް އެޅުން އެއީ ސަރުކާރުގެ ނުވަތަ ކައުންސިލުން ގެންގުޅޭ ވިސްނުމެއް ނޫން ކަމަށެވެ.
