އިމާޖިންގ ލީޑަރ އޮފް ދި އިޔަރ މުޣުނީ އަށް

ބައިނަލްއަގްވާމީ އެވޯޑެއް ކަމަށްވާ، "އިމާޖިންގ ލީޑަރ އޮފް ދި އިޔަރ" ގެ އެވޯޑް ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ އަށް ލިބިވަޑައިގެންފިއެވެ.

މިއީ މި އެވޯޑް ދިވެހި ކުންފުންޏެއްގެ އެމްޑީ އަކަށް ލިބިވަޑައިގެންނެވި ފުރަތަމަ ފަހަރެވެ. މި އެވޯޑް މުޣުނީ އަށް ލިބިވަޑައިގެންނެވީ، ކުންފުނީގެ މުވައްޒަފުންގެ ކަންކަން ފުރިހަމަކޮށް ގެންދިއުމުގެ އިތުރުން ކުންފުންޏާއި މެދު ކަސްޓަމަރުންގެ މެދުގައި އޮންނަ އިތުބާރާއި، ތަސައްވަރު އިތުރަށް ރަނގަޅު ކުރުމަށްޓަކައި ކުރައްވަމުން ގެންދަވާ އަދި ކުރެއްވުމަށް ރާވާފައިވާ ކަންކަމުގެ މައްޗަށެވެ.

އެގޮތުން ކަސްޓަމަރުންނަށް ލުއި ފަސޭހަ ގޮތްތަކެއް ހޯއްދަވައި ދެއްވާ އެންމެ ފަހުގެ ޓެކްނޮލޮޖީތައް ތައާރަފް ކުރައްވަން ކުރައްވާ މަސައްކަތްތަކުގެ ތެރެއިން، ސްމާޓް މީޓަރިން ތައާރަފް ކުރުމާއި، ކަރަންޓު ކެނޑިއްޖެ ހާލަތެއްގައި އަވަސް މިނެއްގައި ކަރަންޓު ދިނުމަށްޓަކައި ޒަމާނީ ސްކާޑާ ސިސްޓަމެއް ގާއިމް ކުރުމާއި، ކަރަންޓުގެ ގައުމީ ވިއުގައެއް ގާއިމް ކުރުމަށް ހިންގާ އިންޓަރކަނެކްޝަން ޕްރޮޖެކްޓް ހިމެނޭ ކަމަށް ސްޓެލްކޯ އިން މައުލޫމާތުދެއެވެ.

އޭގެ އިތުރުންވެސް ކަސްޓަމަރުން ކަރަންޓަށް ކުރާ ހޭދަ ކުޑަ ކުރުމުގެ ގޮތުން ގްރީންލައިފް އިނިޝިއޭޓިވްގެ ނަމުގައި ޕްރޮގްރާމެއް ފަށައި، ކުޑަ އަގެއްގައި ސޯލާ ޕެނަލް ލިބޭނެ އިންތިޒާމްތައް ހަމަޖެއްސެވުމާއި، ތިމާވެއްޓާއި ރައްޓެހި ޓެކްނޮލޮޖީތައް ތައާރަފް ކުރުމާއި، ކުންފުނީގެ ހަރަދުތައް ކުޑަ ކުރުމަށް ގެންގުޅުއްވާ ސިޔާސަތުތައް ހިމެނެ އެވެ. މިއީ މި އެވޯޑް ދިވެހި ކުންފުންޏެއްގެ އިސްވެރިއަކަށް ލިބުނު ފުރަތަމަ ފަހަރުކަން ވެސް ފާހަގަކޮށްލެވެއެވެ.

އޮންލައިންކޮށް ބޭއްވި މި އެވޯޑް ހަފްލާގައި އެވޯޑް ލިބިވަޑައިގަތުމުން މުޣުނީ ވަނީ 70 އަހަރުގެ ދިގު މާޒީއެއް އޮތް ސްޓެލްކޯ މިފަދަ ޝަރަފުވެރި އެވޯޑެއް ލިބުމަކީ އެ ކުންފުންޏަކީ މަސައްކަތް ކުރުމަށް ޑްރީމް ކޮމްޕެނީ އަށް ހެދުމަށް ކުރާ މަސައްކަތްތައް ވާރލްޑް އެޗްއާރުޑީ ކޮންގްރެސް ފަދަ ބަޔަކު ބަލައިގަތުން ކަމަށާއި، އެކަމަށްޓަކައި އުފާ ކުރައްވާ ކަމަށް ވިދާޅުވެފަ އެވެ.

އަދި ސްޓެލްކޯ އަކީ އެންމެ ރަނގަޅު ކުންފުންޏަށް ހެދުމަށްޓަކައި ސްޓެލްކޯގެ ކުރީގެ މުވައްޒަފުންނާއި މިހާރުގެ މުވައްޒަފުން ކުރައްވަމުން ގެންދަވާ މަސައްކަތްތަކަށް ވަރަށް ބޮޑަށް ޝުކުރު ދަންނަވާފައެވެ.

އެ ހިސާބަށް ވަޑައިގެންނެވުމުގައި ރައީސް އިބްރާހިމް މުހައްމަދު ސޯލިހު ދެއްވި ފުރުސަތާއި ކުރައްވާ އިތުބާރަށްޓަކައި މުޣުނީ ވަނީ ރައީސަށް ހާއްސަ ޝުކުރެއް ދަންނަވާފައެވެ.

މުޣުނީ އަށް "އިމާޖިންގ ލީޑަރ އޮފް ދި އިޔަރ" ގެ އެވޯޑް ލިބިވަޑައިގެންނެވި އިރު، މުޣުނީ ޑިގްރީއާއި، މާސްޓާސް ވެސް ހާސިލް ކުރައްވާފައިވަނީ އެމެރިކާ އިން ނެވެ.

ވާރލްޑް އެޗްއާރުޑީ ކޮންގްރެސް އަކީ ހިއުމަން ރިސޯސަސް ދާއިރާގައި މަސައްކަތް ކުރާ ފަރާތްތަކަށް ހާއްސަ ކޮށްގެން ބާއްވާ އެންމެ ބޮޑު އެއް ކޮންގްރެސް އެވެ. މި އެވޯޑަށް އޭޝިއާ ސަރަހައްދުގެ 30ށްވުރެ ގިނަ ގައުމުގެ ކުންފުނިތަކުން ވަނީ ވާދަކޮށްފައެވެ.