ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ ކުއަލިޓީ ސްޓޭންޑެޑެއް ޤާއިމްކުރުމުގެ ގޮތުން ކޮމްޕްލަޔަންސް އޮފިސަރ ޓްރެއިނިން ޕްރޮގްރާމެއް ހިންގަން ނިންމައިފިއެވެ.
މިއީ މިނިސްޓްރީ އޮފް ޓުއަރިޒަމްއާއި ޔޫރަޕިއަން އޮގަނައިޒޭޝަން ފޯ އެކްސްޕޯޓް ކޮމްޕްލަޔަންސް (އެއިފެކް) އާއި ދިވެހިރާއްޖޭގެ ޤައުމީ ޔުނިވަރސިޓީ ގުޅިގެން ކުރިއަށްގެންދާ ޓްރެއިނިން ޕްރޮގްރާމެކެވެ.
މި ޓްރެއިނިން ޕްރޮގްރާމް އިފްތިތާޙް ކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ ކޮވިޑްގެ މިހާލަތުގައި މިފަދަ ޕްރޮގްރާމެއް ފެށުމަކީ ވަރަށް މުހިއްމު ކަމެއް ކަމަށާއި އަދި މިއީ މުހިއްމު ކަމެއްގެ ފެށުން ކަމަށެވެ. އަދި މިއީ ފަތުރުވެރިކަމަށް ދިމާވެފައިވާ ގޮންޖެހުމުން އަރައިގަންނަން ލިބުނު ރަނގަޅު ފުރުޞަތެއް ކަމަށާއި ރިސޯޓް، ގެސްޓްހައުސް އަދި ސަފާރީތަކުންވެސް ބައިނަލްއަޤްވާމީ ފެންވަރެއްގެ ސެޓްފިކެޓެއް ހޯދުމަކީ އެފަރާތްތަކުން ފަތުރުވެރިންނަށް ދެވޭ ޚިދުމަތުގައި އިތުބާރު ދެމެހެއްޓިގެންދާނެ ކަމެއް ކަމަށް މިނިސްޓަރ ވިދާޅުވިއެވެ.
ފަތުރުވެރިކަމުގެ ޚިދުމަތް ދޭ ތަންތަނުގެ ކުއަލިޓީ ސްޓޭންޑެޓް އޮތުމަކީ ދުނިޔޭގެ ފަތުރުވެރިކަމަށް ރާއްޖެ ހުޅުވާލާއިރު ލިބިގެންދާނެ ވަރަށް ބޮޑު ކުރިއެރުމެއް ކަމަށްވެސް ޑރ. މައުސޫމް ވަނީ ފާހަގަކުރައްވާފައެވެ.
ޔޫރަޕަށް އެބަ އަންގައިދޭންޖެހޭ ރާއްޖޭގެ ފަތުރުވެރިކަމުގެ ކުއަލިޓީ. މިހާރުވެސް ރާއްޖޭގެ ފަތުރުވެރިކަން މުޅި ދުނިޔެއިން ވަނީ ބަލައިގެންފައި. މިއީ ފަތުރުވެރިން އަންނަ އެންމެ ސޭފް ތަނުގައި ގޮތުގައި ވަނީ ލިސްޓްކޮށްފައި. ޔޫއަރޕިއަން އިންސްޓިޓުއަކާއި ގުޅިގެން މިފަދަ ޕްރޮގްރާމެއް މިދަނޑިވަޅުގައި ކުރިއަށް ގެންދެވޭ ކަމީ ވަރަށް މުހިއްމު ކަމެއް. ފަތުރުވެރިކަމުގެ ދާއިރާގެ ހުރިހާ ފަރާތްތަކުން މި ސެޓްފިކެޓް ހޯދުން މުހިއްމު.ޓުއަރިޒަމް މިނިސްޓަރ ޑރ. އަބްދުﷲ މައުސޫމް
މި ޓްރެއިނިން ޕްރޮގްރާމްގައި 830 މީހުންނަށް ބައިވެރިވުމުގެ ފުރުޞަތު ހުޅުވާލާފައިވާއިރު އޭގެ ތެރެއިން 630 ޖާގަ ހުސްކޮށްފައިވަނީ ގެސްޓްހައުސްތަކަށެވެ. އަދި ބާކީ 200 ޖާގަ ހުސްކޮށްފައިވަނީ ކައުންސިލްތަކަށެވެ.
މި ޕްރޮގްރާމް ފެށުމަށްޓަކައި ވާން ޖެހޭ ތައްޔާރީތައް އާދިއްތަ ދުވަހުން ފެށިގެން ކުރިއަށްދާނެ ކަމަށް ޓުއަރިޒަމް މިނިސްޓްރީން ވަނީ މައުލޫމާތުދީފައެވެ. އެގޮތުން ކައުންސިލްތަކުންނާއި ގެސްޓްހައުސްތަކުން މިޕްރޮގްރާމްގައި ބައިވެރިވުމަށްޓަކައި އެފަރާތްތަކަށް ދައުވަތު ދެވޭނެ ކަމަށް މިނިސްޓްރީން ބުންޏެވެ. އޮންލައިންކޮށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމް ކުރިއަށްދަނީ އެއިފެކްއާއި ޔުނިވަރސިޓީ އޮފް ޓިއުރިންއާއި އަދި އެމްއެންޔޫ ގުޅިގެންނެވެ.
ކޮންމެ ދުވަހަކު ދެ ގަޑިއިރަށް، ފަސް ދުވަހުގެ މުއްދަތަށް ކުރިއަށްގެންދާ މިޓްރެއިނިން ޕްރޮގްރާމް ފެށުމަށް ގަސްތުކޮށްފައިވަނީ އޮކްޓޯބަރ 20 ވަނަ ދުވަހުއެވެ. މުޅިން ހިލޭ ކުރިއަށް ގެންދާ ޓްރެއިނިން ޕްރޮގްރާމް ނޮވެމްބަރ 2 ގެ ނިޔަލަށް ކުރިއަށްގެންދާ މިޕްރޮގްރާމް ނިމުމުން ބައިވެރިންނަށް އެއިފެކްގެ ސެޓްފިކެޓެއް ލިބޭނެއެވެ.
މި ތަމްރީނު ޕްރޮގްރާމަށްފަހު މި އޮފިސަރުން މެދުވެރިކޮށް ރިސޯޓް، ގެސްޓްހައުސް އަދި ސަފާރީތަކުގެ ކޮލިޓީ ސްޓޭންޑަޑް ބެލޭނެ ކަމަށާއި އެއަށްފަހު އެފަރާތަތަށް ސްޓޭމްޕް ދެވޭނެ ކަމަށް ޓުއަރިޒަމް މިނިސްޓްރީ ބުންޏެވެ. މިސްޓޭޕްގެ ސަބަބުން ޙިދުމަތްދޭ ތަންތަނާއި މެދު ޚިދުމަތް ހޯދާ ފަރާތްތަކުގެ އިތުބާރު ބޮޑުވެގެންދާނެއެވެ. އަދި އެފަދަ ފަރާތްތަކުން ދެވޭ ޚިދުމަތުގައި މައްސަލައެއް އުޅޭ ކަމަށްވާނަމަ އެއިފެކްއަށް ކޮމްޕްލަޔަންސްގެ ގޮތުގައި ޚިދުމަތް ހޯދާ ފަރާތުން މައްސަލަ ހުށަހެޅޭނެއެވެ.
އެއިފެކްގެ ޑިރެކްޓަރ ޖެނެރަލް ޗާލްސް ޖަކޯމާ ވިދާޅުވީ މިއީ ޔޫރަޕްގެ ގައުމު ތަކަކީ ރާއްޖެއަށް އެންމެ ގިނައިން ފަތުރުވެރިން އަންނަ ސަރަހައްދު ކަމަށްވެފައި ފަތުރުވެރިކަމުގެ ދާއިރާގެ ކުއަލިޓީ ސްޓޭންޑަޑް ހިފެހެއްޓުމަށް މިފަދަ ފުރުޞަތެއް ލިބުމުން އެއީ އެ ދާއިރާއަށް ލިބޭނެ ވަރަށް ބޮޑު ކާމިޔާބީ އެއް ކަމަށެވެ. އަދި މިހާތަނަށް ކުއަލިޓީ ސްޓޭމްޕް ހޯދާފައިވާ ފަރާތްތަކުގެ ތެރެއިން އެންމެންވެސް އެއް ހަމައެއްގައި މިންގަނޑުތަކާއި ޤަވާއިދުތަކުގެ ތެރޭގައި ތިބުމަށް މަސައްކަތް ކުރާ ކަމަށް ފާހަގަކުރެވިފައިވާ ކަމަށެވެ.
ޔޫރަޕިއަސް އޮގަނައިޒޭޝަން ފޯ އެކްސްޕޯޓް ކޮމްޕްލަޔަންސްއަކީ ބައިނަލްއަޤްވާމީ ސަލާމަތަށް ނުރައްކާ ކުރިމަތި ކުރުވާ ނިއުކްލެއަރ، ބަޔޮލޮޖިކަލް އަދި ކެމިކަލް ހަތިޔާރު އިތުރުވެގެން ވެޕަންސް އޮފް މާސް ޑިސްޓްރަކްޝަން (ޑަބްލިއުއެމްޑީ) ފިޔަވަޅު އެޅުން ފަދަ ކަންކަމާއި ގުޚޭ ގޮތުން އަމަލުކުރަންޖެހޭ ބައިނަލްއަޤްވާމީ މިންގަނޑުތައް ކަނޑައަޅާ އޮގަނައިޒޭޝަނެކެވެ.
