މާފުށީ ޖަލުގައި ޓީބީ ފެތުރޭތީ ގައިދީންނާއި ޖަލު އޮފިސަރުން ޓެސްޓް ކުރަން ފަށައިފި

މާފުށީ ޖަލުގައި ޓިއުބާކްލޯސިސް (ޓީބީ) ފެތުރޭތީ ގައިދީން ޓެސްޓް ކުރަން ފަށައިފި އެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި މިހާތަނަށް މާފުށީ ޖަލުގައި ހުކުމް ތަންފީޒް ކުރަމުންދާ ފަސް ގައިދީއެއްގެ ގައިން ޓީބީ ވަނީ ފެނިފަ އެވެ. އަދި ޖަލު ބަލަހައްޓާ އޮފިސަރުންތަކެއްގެ ގައިން ވެސް ބަލި ފެނުނު ކަމަށް މައުލޫމާތު ލިބިފައި ވެއެވެ. ޖަލުގައި ޓީބީ ފެތުރޭ ކަމަށް ވާހަކަ ދެކެވޭތާ ދުވަސްތަކެއް ވެއްޖެއެވެ.

މައުލޫމާތު ލިބިފައިވާ ގޮތުގައި ގައިދީންގެ ގައިން ޓީބީ ފެންނަމުންދާތީ މާފުށީ ޖަލުގައި ހުކުމް ތަންފީޒްކުރަމުންދާ ގައިދީންނާއި ޝަރީއަތް ނިމެންދެން ބަންދުކޮށްފައި ތިބި ހުރިހާ އެންމެން ޓީބީއަށް ޓެސްޓް ކުރުމުގެ މަސައްކަތް މޯލްޑިވްސް ކަރެކްޝަނަލް ސާވިސް (އެމްސީއެސް) އިން ވަނީ ފަށާފަ އެވެ. ގައިދީންގެ އިތުރުން ޖަލު ބަލަހައްޓާ އޮފިސަރުން ވެސް ދަނީ ޓެސްޓް ކުރަމުންނެވެ.

ކަރެކްޝަނުގެ މީޑިއާ އޮފިޝަލް ވެސް ވަނީ ގައިދީން ޓީބީއަށް ޓެސްޓް ކުރަމުންދާކަން ރާއްޖެއެމްވީއަށް ކަށަވަރުކޮށްދެއްވާފަ އެވެ. ނަމަވެސް އެކަމާ ގުޅޭ އިތުރު ތަފްސީލެއް އޭނާ ނުދެއްވަ އެވެ.

މައުލޫމާތު ލިބިފައިވާ ގޮތުގައި ޓީބީއަށް ޓެސްޓް ކުރި ފަރާތްތަކުގެ ތެރޭގައި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިން ވެސް ހިމެނެ އެވެ. ނަމަވެސް، އެ ބައްޔަށް އޭނާ ޕޮޒިޓިވް ވެފައި ނުވެ އެވެ. މުހުތާޒްގެ އިތުރުން ސްޕެޝަލް ޕްރޮޓެކްޝަން ޔުނިޓްގައި ބަންދުކޮށްފައިވާ އެހެނިހެން ފަރާތްތައް ވެސް ޓެސްޓް ކޮށްފައި ވެއެވެ.

ރާއްޖެ އިން ޓީބީ ނައްތާލުމަށް މަސައްކަތްތަކެއް ކުރަމުން ދިޔަ ނަމަވެސް ދޭތެރެ ދޭތެރެއިން ޓީބީ ގިނަ ވެއެވެ. ހާއްސަކޮށް ބިދޭސީންގެ ތެރޭގައި ވެސް ޓީބީ ފެތުރޭ ކަމުގެ އަޑުތަކެއް މީގެ ކުރިން ފެތުރިފައި ވެއެވެ. ނަމަވެސް އެކަމާ ބެހޭ ގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެއްވެސް މައުލޫމާތެއް އާންމުކޮށްފައެއް ނުވެއެވެ.