ސިފައިންގެ ދެ އޮފިސަރަކަށް ކާނަލްގެ މަޤާމް ދެއްވައިފި
4 އެޕްރީލު 2017 | އަންގާރަ 17:09ކާނަލްގެ މަޤާމް ދެއްވީ އަހުމަދު ޤިޔާސް އާއި ޑޮކްޓަރ ޢަލީ ޝާހިދު މުޙައްމަދަށް
ދެ އޮފިސަރުންނަށް ކުރިއެރުން ދެއްވި ރަސްމިއްޔާތުގެ ތެރެއިން
ސިފައިންގެ ދެ އޮފިސަރަކަށް ކާނަލްގެ މަގާމް އަންގާރަ ދުވަހު ދެއްވައިފިއެވެ.
ބަންޑާރަކޮށީގައި ބޭއްވި ޚާއްސަ ރަސްމިއްޔާތުގައި ކާނަލްގެ މަޤާމަށް ބަދަލުކުރައްވާފައިވަނީ ލެފްޓިނަންޓް ކާނަލްގެ މަޤާމުގައި ތިއްބެވި ދެ ބޭކަލުންކަމުގައިވާ އަހުމަދު ޤިޔާސް އާއި ޑޮކްޓަރ ޢަލީ ޝާހިދު މުޙައްމަދެވެ.
މި ދެ ބޭކަލުންނަށް މަޤާމުގެ ކުރިއެރުން ހަވާލުކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް އުމަރެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމް އާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙުމަދު ޝާހިދު އާއި ނޭޝަނަލް ކައުންޓަރ ޓެރަރިޒަމްގެ ޑިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންޞޫރު ބައިވެރިވެވަޑައިގެންނެވި ކަމަށް އެމްއެންޑީއެފް އިން މައުލޫމާތު ދީފައިވެއެވެ.
