ހުސް ބިންތަކުގައި ގަސް އިންދުމުގެ ހުއްދަ އެއް ނުދެން: ވިލިމާލެ ކައުންސިލަރު

ވިލިމާލޭ ހުސް ބިންތަކުގައި ގަސް އިންދަނީ, އެ އަވަށުގެ ކައުންސިލަރު ހަމްނާ ވަހީދުގެ ހުއްދައާ އެކު ކަމަށް ބުނާ ވާހަަކަތައް އޭނާ ދޮގު ކުރައްވައިފިއެވެ.

ވިލިމާލޭ ގައި އޮންނަ ދައުލަތުގެ ހުސް ބިންތަކުގައި ގަސް އިންދާ މައްސަލަ ބޮޑުވެ އެ ތަން ހުސްކުރަން ސިޓީ ކައުންސިލުން ވަނީ ހޮނިހިރު ދުވަހު މަސައްކަތް ފަށާފައެވެ. އެކަމާއި ނުރުހުން ފާޅުކޮށް އެ ތަނުގައި ގަސް އިންދާ، ގަސް ވިއްކައިގެން އާމްދަނީ ހޯދާ ފަރާތްތަކުން ވަނީ ޝަކުވާ ކޮށްފައެވެ. އެ ތަނުގައި ގަސް އިންދަމުންދާ ބައެއް މީހުން ބުނާ ގޮތުން، ގަސް އިންދުމުގެ ހުއްދަ ދީފައިވަނީ ވިލިމާލޭ ކައުންސިލަރ ހަމްނާ އެވެ.

ނަމަވެސް އެ ވާހަކަތަކާއި ގުޅިގެން ''ރާއްޖެ.އެމްވީ'' އާއި ވާހަކަ ދައްކަވަމުން ހަމްނާ ވިދާޅުވީ، ހުސް ބިންތަކުގައި ގަސް އިންދަން ރަސްމީ ގޮތުން އެއްވެސް ބަޔަކަށް ހުއްދަ ދީފައި ނުވާނެ ކަމަށާއި، އެހެން އެކަން ނުކުރުމަށް ތަކުރާރުކޮށް އެތައް ފަހަރެއްގެ މަތިން އަންގާފައިވާނެ ކަމަށެވެ.

ހަމްނާ ވިދާޅުވީ، ވިލިމާލޭގެ ސާފުތާހިރުކަން ދެމެހެއްޓުމަށްޓަކައި ހުސް ބިންތަކަކީ މުހިއްމު ތަންތަނަށް ވާއިރު އެ ތަންތަނުގައި މަދިރި އުފެދުމުގެ ޖާގަވެސް އޮތުމާއި އެކު އެ ބިންތަކުގައި ގަސް އިންދުން އެއީ އިޖްތިމާއި ގޮތުންވެސް މައްސަލަތަކެއް ދިމާވާ ކަމެއް ކަމަށެވެ.

އޭނާ ވިދާާޅުވީ، ރައްޔިތުން ކުރަމުން އަންނަ ކަންތައްތަކަށް ހުރަސް އެޅުން އެއީ ސަރުކާރުގެ ނުވަތަ ކައުންސިލުން ގެންގުޅޭ ވިސްނުމެއް ނޫން ކަމަށެވެ. އޭގެ ބަދަލުގައި އެކަން އެއަށްވުރެ ރަނގަޅު ކުރުމަށް ޖާގަ ދިނުމުގެ ގޮތުން ގަސް އިންދުމުގެ އުސޫލެއް ހެދުމުގެ މަސައްކަތް ކުރެވެމުންދާ ކަމަށް ވިދާޅުވިއެވެ. ހުސް ބިންތަކުގައި ގަސް އިންދަން ވެގެން ހަދާފައިވާ ނެޓްތަކާއި ބިތްތަކާއި، ފުޅި ބުރިތަކުގެ އިތުރުން ހަންބުރިތައް ނެގުމުގެ މަސައްކަތް ކައުންސިލުން ވަނީ ހޮނިިހިރު ދުވަހު ފަށާފައެވެ.

އިންދާފައިވާ ގަސްތައް ނެގުމަށް، ކުރިއާލާ ކައުންސިލުން ވަނީ 30 ދުވަހުގެ މުއްދަތެއް ދީފައެވެ. ހަމްނާ ވިދާޅުވީ، 30 ދުވަހުގެ ތެރޭގައި އުސޫލެއް އެކުލަވާލައި ގަސް އިންދަން ބޭނުންވާ ފަރާތްތަކަށް ވަގުތީ ގޮތުންވެސް ބިމެއް ހަމަޖައްސައި ދިނުމުގެ މަޝްވަރާތައް ކުރެވެމުންދާ ކަމަށެވެ. ހަމްނާ ވިދާޅުވީ، ހުސް ބިންތަކުގައި ހުރި އެއްޗެހި އެހެން ތަންތަނަށް ބަދަލުކުރާއިރު ރައްޔިތުންގެ ހިޔާލު ހޯދާނެ ކަމަށެވެ. އަދި ވިލިމާލެއަށް ދިމާވެފައިވާ އެންމެ ބޮޑު އެއް މައްސަލައަކީ ގަސް އިންދުމުގެ އުސޫލެއް ކަނޑައެޅިފައި ނެތުން ކަމަށް ފާހަގަކޮށް، ކައުންސިލްތައް އުފެދި އެތައް ދައުރުތަކެއް ނިމިގެން ދިޔައިރު ވެސް އުސޫލެއް ހެދިފައި ނެތުމަކީ ކަންބޮޑުވުމެއް ކަމުގައި އޭނާ ފާހަގަކުރެއްވިއެވެ.