ސިއްހީ ހިދުމަތްތެރިންނާއި ވޮލެންޓިއަރުން މަސައްކަތް ކުރަނީ ޓެކްނިކަލް މިންގަނޑުތަކާ އެއްގޮތަށް: ޑރ. ނަޒްލާ
11 އޮކްޓޯބަރު 2020 | އާދީއްތަ 03:14ސިއްހީ ހިދުމްތަތެރިންނާއި ވޮލެންޓިއަރުން އަދި ހުރިހާ އެންމެންވެސް މަސައްކަތް ކުރަނީ ޕްރޮފެޝަނަލްކޮށް
އެޗްއީއޯސީގެ ތަރުޖަމާނު ޑރ. ނަޒްލާ ރަފީގު؛ އާރުއާރުޓީގެ މަސައްކަތްތައް ޑރ. ނަޒްލާ ވަނީ ދިފާއު ކުރައްވާފައި
ކޮވިޑް-19 އާ ގުޅިގެން މަސައްކަތް ކުރާ ސިއްހީ ހިދުމްތަތެރިންނާއި ވޮލެންޓިއަރުން އަދި ހުރިހާ އެންމެންވެސް މަސައްކަތް ކުރަނީ ޕްރޮފެޝަނަލްކޮށް މި ކަންކަމުގައި ކަނޑައެޅިފައި ހުންނަ ޓެކްނިކަލް މިންގަނޑުތަކާއި އެއްގޮތަށް ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ މިހެން ވިދާޅުވެފައިވަނީ ދާދި ފަހުން މާފަންނު މަދުރަސާގައި ސާމްޕަލް ނަގަން ހުރި ރެޕިޑް ރެސްޕޯންސް ޓީމް (އާރުއާރުޓީ) ގެ މެންބަރަކަށް ދިއްގަރު ދާއިރާގެ މެމްބަރު އިކްރާމް ހަސަން ހަމަލާދެއްވިކަމަށް ހަބަރުތައް ފެތުރި އެ މައްސަލަ ފުލުހުން ބަލަމުންދަނިކޮށެވެ.
ހޮނިހިރު ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ ސިއްހީ ހިދުމަތްތެރިންނާއި ވޮލެންޓިއަރުން, ވަރުބަލިކަމެއް ނެތި މަސައްކަތް ކުރަމުން އަންނަތާ 7 މަސްވެފައިވާ ކަމަށާއި ބަލީގެ ނުރައްކަލާއި ކެރިގެން ކުރިމަތިލާ އެ މަސައްކަތަކީ އެއްވެސް ހާލަތެއްގައި ފަސޭހަ މަސައްކަތެއް ނޫން ކަމަށެވެ. އަދި ހުރިހާ އެންމެންވެސް މަސައްކަތް ކުރަނީ ޕްރޮފެޝަނަލް ކޮށް މި ކަންކަމުގައި ކަނޑައެޅިފައި ހުންނަ ޓެކްނިކަލް މިންގަނޑުތަކާއި އެއްގޮތަށް ކަމަށް ވިދާޅުވިއެވެ.
ޑރ. ނަޒްލާ ވިދާޅުވީ މިހާތަނަށް މަސައްކަތް ކުރި ވަރަށް ގިނަ ފަރާތްތަކުން ވަރަށް ބޮޑު އެއްބާރުލުމެއް މަސައްކަތުގައި އުޅުއްވާ ފަރާތްތަކަށް ލިބޭ ކަމަށެވެ. އަދި ސާމްޕަލް ނެގުމާއި އެހެނިހެން ކަންތައްތަކުގައި ވެސް އެއްބާރުލުން ލިބޭ އިރު، ގިނަ ބޭފުޅުން ޝުކުރުވެރި ބަސްތަކުންވެސް އެ ބޭފުޅުންނާއި މުހާތަބު ކުރައްވާ މަސައްކަތްތެރިންނާއި އިންޓަރެކްޓް ކުރައްވަމުން ގެންދަވާ ކަމަށެވެ. ނަމަވެސް މަދު ފަހަރަކު ގަބޫލުނުކުރެވޭ ކަންތައްތައް ފާހަގަކުރެވޭ ކަމަށެވެ.
ނަޒުލާ ވިދާޅުވީ އާރުއާރުޓީގެ މުވައްޒަފަކަށް ދިމާވި މައްސަލަ ފުލުހުން ބަލަމުން ގެންދަވާ ކަމަށެވެ. އަދި އެކަމާއި ގުޅިގެން އިތުރު މައުލޫމާތެއް ދެވޭނީ ފުލުހުން އެ މައްސަލަ ބައްލަވާފައި އެ ބޭފުޅުން އަޅުއްވާ ފިޔަވަޅެއް ހިއްސާ ކުރެއްވުމުން ކަމަށް ވިދާޅުވިއެވެ.
