އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ޓޮޓެންހަމް ހޮޓްސްޕާ ކުޅޭ މެޗުގައި އެ ޓީމާ ދާދި ފަހުން ގުޅުނު ވޭލްސްގެ ތަރި ގެރެތު ބޭލް ފެނުމުގެ ފުރުސަތު ބޮޑު ކަމަށް ރިޕޯޓުތައް ބުނެފިއެވެ.
ޓޮޓެންހަމް ދޫކޮށް 2013 ވަނަ އަހަރު އޭރު ދުނިޔޭގެ ރެކޯޑް އަގެއް ކަމަށްވާ 100 މިލިޔަން ޔޫރޯއަށް ރެއާލާ ގުޅުނު ބޭލް އަނބުރާ ޓޮޓެންހަމާ ގުޅުނީ ލޯނު އެއްބަސްވުމެއްގެ ދަށުންނެވެ. އެގޮތުން ރެއާލުން އުމުރުން 31 އަހަރުގެ ފޯވާޑް ލޯނު އުސޫލުން ދޫކޮށްފައިވަނީ މި ސީޒަނުގެ ނިޔަލަށެވެ.
ޓޮޓެންހަމާ ގުޅުނުއިރު ބޭލް ހުރީ އަނިޔާގައެވެ. ރިޕޯޓުތައް ބުނާ ގޮތުން ބޭލްގެ ކަކުލަށް އަނިޔާވީ މިދިޔަ ސެޕްޓެމްބަރު މަހު ކުޅުނު ޔުއެފާ ނޭޝަންސް ލީގުގެ މެޗުތަކަށް ތައްޔާރުވުމަށް ވޭލްސްއާއެކު ފަރިތަކުރަމުން ދަނިކޮށެވެ. މީގެ ކުރިން މީޑިއާތަކުން ރިޕޯޓުކޮށްފައިވާ ގޮތުން ބޭލްގެ ކަކުލަށް ލިބިފައިވާ އަނިޔާއިން ސަލާމަތްވެ ކުޅުމުގެ ތެރެއަށް ނުކުމެވޭނެ ކަމަށް ބެލެވެނީ މި މަހުގެ ފަހުކޮޅުއެވެ.
ޓޮޓެންހަމުގެ ފަރިތަކުރުންތަކުގައި ބޭލް މިހާރު ބައިވެރިވަމުން އަންނައިރު، ލީގުގައި ދެން ޓޮޓެންހަމުން ކުޅޭ މެޗުގައި ބޭލަށް ކުޅެވޭނެ ކަމަށް ރިޕޯޓުތައް ބުނެއެވެ. އެގޮތުން ބައިނަލްއަގުވާމީ ބްރޭކަށްފަހު ލީގުގައި ޓޮޓެންހަމުން ކުޅޭ ފުރަތަމަ މެޗުގައި މި މަހުގެ 18 ވަނަ ދުވަހު އަމިއްލަ ދަނޑުގައި ނުކުންނާނީ ވެސްޓް ހޭމާ ދެކޮޅަށެވެ.
މީގެ ކުރިން ޓޮޓެންހަމުގެ ކޯޗު ހޯސޭ މޮރީނިއޯވެސް ވަނީ ބޭލްގެ އަނިޔާގެ ތަފްސީލު ބަރާބަރަށް ކުލަބުން ބަލަމުން އަންނަ ކަމަށާއި، ކުރިއަށް އޮތް ބައިނަލްއަގުވާމީ މެޗުތަކަށްފަހު ބޭލް ކުޅުމުގެ ތެރެއަށް އަންނާނެ ކަމަށް ބެލެވޭ ކަމަށް ބުނެފައެވެ.
ސައުތެމްޓަން ދޫކޮށް 2007 ވަނަ އަހަރު ފަސް މިލިޔަން ޕައުންޑަށް ޓޮޓެންހަމާ ގުޅުނު ބޭލް އެންމެ ފުރަތަމަ ވިދާލީވެސް އެ ކުލަބުންނެވެ. އެގޮތުން ބޭލް ވަނީ ޓޮޓެންހަމްގައި ހޭދަކުރި ހަ ސީޒަނުގައި އެޓީމަށް 203 މެޗު ކުޅެދީ 55 ލަނޑު ކާމިޔާބުކޮށްފައެވެ.
އޭގެ ފަހުން ރެއާލަށް ބަދަލުވެ އެޓީމުގައި ބޭލް މޮޅު ކުޅުމެއް ދެއްކިއިރު، އޭނާ ވަނީ ރެއާލާއެކު ޖުމްލަ 12 ތަށި ހޯދާފައެވެ. އަދި ވަނީ ރެއާލަށް ކުޅެދިން 251 މެޗުގައި 105 ލަނޑު ކާމިޔާބުކޮށްފައެވެ. އެކަމަކު ރެއާލްގެ ކޯޗުގެ މަގާމާ ޒިނެދިން ޒިދާން ހަވާލުވި ފަހުން ބޭލަށް މާކަ ގިނަ ފުރުސަތުތަކެއް ލިބިފައެއް ނުވެއެވެ. އެގޮތުން މިދިޔަ ސީޒަނުގައި ބޭލް ރެއާލުގެ ޖާޒީގައި ފެނިގެން ގޮސްފައިވަނީ އެންމެ 14 މެޗުގައެވެ.
