ސައުދީ ސަރުކާރުން އެޅި ހަރުދަނާ ފިޔަވަޅުތަކާއެކު އެ ގައުމުން ޕޮޒިޓިވްވާ މީހުންގެ އަދަދު ދަށްވެފައިވާ ކަމަށް ސައުދީގެ ސިއްހަތާއި ބެހޭ ވުޒާރާއިން ބުނެފިއެވެ.

ސައުދީގެ ސިއްހަތާއި ބެހޭ ވުޒާރާއިން އެންމެ ފަހުން ނެރުނު ޑޭޓާ ދައްކާ ގޮތުން ސައުދީން މިދިޔަ 24 ގަޑިއިރު ތެރޭގައި ކޮވިޑަށް ޕޮޒިޓިވް ވެފައިވަނީ 405 މީހުންނެވެ. އަދި މި ބަލީގައި މިދިޔަ 24 ގަޑިއިރު ތެރޭގައި އެގައުމުން 22 މީހުން ވަނީ މަރުވެފައެވެ.

ސައުދީގެ ސިއްހަތާއި ބެހޭ ވުޒާރާއިން ބުނީ މި ބަލިން ފާއިތުވި 24 ގަޑިއިރު ތެރޭގައި 455 މީހުން ރަނގަޅުވެފައިވާ ކަމަށާއި، އަދި މިހާރު ބަލިން ރަނގަޅުވި މީހުންގެ އަދަދު 96 އިންސައްތަ އާއި ގާތް ކޮށްފައިވާ ކަމަށެވެ. ސައުދީގެ ސިއްހަތާއި ބެހޭ ވުޒާރާ އިން ބުނީ އެގައުމުން ކޮވިޑްގެ ކޭސްތައް މަދުވެފައިވަނީ ސަރުކާރުން އެޅި ހަރުދަނާ ފިޔަވަޅުތަކުގެ ސަބަބުން ކަމަށެވެ.

ސައުދީ އަރަބިއާއަކީ މުޅި ދުނިޔެއިން 18 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ. އެގައުމުން މިހާތަނަށް 338,944 މީހުން ވަނީ ޕޮޒިޓިވްވެފައެވެ. އަދި މިހާތަނަށް 5,018 މީހުން ވަނީ މި ބަލީގައި މަރުވެފައެވެ.