އާދަމް ޝަރީފް އިސްވެހުންނަވާ މަޖިލީހުގެ ކަރާމާތް ގެއްލުވާލި މައްސަލަ ބައްލަވަންނުވޭތޯ: އިބްރާހީމް ދީދީ
އިބްރާހީމް ދީދީ ވިދާޅުވީ ވެރިކަމުގައި ތިއްބެވިއިރު އޭރުވެސް އެމްއެންޑީއެފް އަށް އޮޅުވާލެއްވީ އިންޑިޔާ ސިފައިން މަޖިލިސް ހިފަން އެމްޑީޕީ އާއެކު ރޭވިކަމަށް ވިދާޅުވެކަމަށް
ހިތަދޫ މެދު ދާއިރާގެ ކުރީގެ މެމްބަރ އިބްރާހީމް ދީދީ އަދި މަޑުއްވަރީ ދާއިރާގެ މެމްބަރ އާދަމް ޝަރީފް
ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގައި މިހާރު މަޑުއްވަރީ ދާއިރާގެ ގޮނޑި ފުރުއްވަމުން ގެންދަވާ މެމްބަރ އާދަމް ޝަރީފް އިސްވެ ހުންނަވައި ރައްޔިތުންގެ މަޖިލީހަށް ދިވެހި ސިފައިން ވައްދައިގެން މަޖިލީހުގެ ކަރާމާތް ގެއްލުވާލި މައްސަލަ ބަލާކަށްނުވޭތޯ ވިދާޅުވީ ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެމްބަރ އިބްރާހީމް ދީދީ ސުވާލު އުފައްދަވައިފި އެވެ.
މިސަރުކާރުގައި ރާއްޖެ ކުރިޔަށް ގެންދަން ބޭނުންވާ މިސްރާބެއް އަދި އެވިސްނުންތެރިކަމެއްވެސް ނެތްކަމަށް ވިދާޅުވެ ރާއްޖޭގެ ޖީޑީޕީ ދަށަށްގޮސްފައިވާ މިންވަރު ދައްކައިދޭ ގްރާފަކާއެކު އާދަމް ޝަރީފް ކުރެއްވި ޓްވީޓަކަށް ޖަވާބު ދެއްވަމުން އިބްރާހީމް ދީދީ ވިދާޅުވީ އާދަމް ޝަރީފް އަޑީގައި އިސްވެހުންނަވާ ދޮގު އިންޓެލް ރިޕޯޓެއް ފެބްރިކޭޓްކޮށް ދިވެހި ސިފައިން ވައްދައިގެން މަޖިލިސްގެ ކަރާމާތް ގެއްލުވާލި މައްސަލަ ބައްލަވާކަށްނުވޭތޯ އެވެ. އިބްރާހީމް ދީދީ މިސުވާލު ކުރައްވާފައިވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާއި ޑިފެންސް މިނިސްޓަރ މާރިޔާ އަހުމަދު ދީދީ ޓެގްކުރައްވައެވެ.
މީގެއިތުރުން އިބްރާހީމް ދީދީ ވިދާޅުވީ ވެރިކަމުގައި ތިއްބެވިއިރު އޭރުވެސް އެމްއެންޑީއެފް އަށް އޮޅުވާލެއްވީ އިންޑިޔާ ސިފައިން މަޖިލިސް ހިފަން އެމްޑީޕީ އާއެކު ރޭވިކަމަށް ވިދާޅުވެކަމަށެވެ. އަދި މިހާރު އިދިކޮޅުގައި ހުންނަވާ ދައްކަވަނީ އިންޑިޔާއިން ރާއްޖޭގެ މިނިވަންކަން ނަގާލަން އުޅޭ ދޮގު ފިތުނަވެރި ވާހަކަކަމަށް އިބްރާހީމް ދީދީ ވިދާޅުވިއެވެ.
ރައްޔިތުންގެ މަޖިލީހުގެ ތާރީޚުގައިވެސް ފުރަތަމަ ފަހަރަށް މަޖިލީހުގެ ގޭޓްގައި ތަޅުއަޅުވައި ސިފައިން މަޖިލިސް ތެރެއަށް ވަދެ ފޯރިމަރާފައިވަނީ އާދަމް ޝަރީފް ޑިފެންސް މިނިސްޓަރުކަމުގައި ހުންނެވިއިރު އެވެ. 2017 ވަނަ އަހަރު އޭރު ރައްޔިތުންގެ މަޖިލީހުގެ ރައީސްކަމުގައި ހުންނެވި އަބްދުﷲ މަސީހު މަޖިލީހުގެ ރައީސްކަމުން ވަކިކުރުމަށް އިތުބާރު ނެތްކަމުގެ މައްސަލަ ވެއްދުމަށް މަސައްކަތްކުރުމުން ސިފައިން ވަނީ މަޖިލީހަށް ވަދެފައެވެ. އަދި މެމްބަރުން މަޖިލިސް އިދާރާއަށް ވަދުމަށް މަސައްކަތްކުރެއްވުމުން ސިފައިން ވަނީ އެކަމަށް ހުރަސް އަޅުއްވާފައެވެ. އެކަމުގެ ތެރޭގައި ބައެއް މެމްބަރުންނަށް ވަނީ އަނިޔާވެެސްވެފައެވެ.
އަނެއްކޮޅުން ރާއްޖޭގެ މިނިވަންކަން ނަގާލުމަށް އިންޑިޔާއިން މަސައްކަތްކުރަމުންދާ ކަމަށާއި އިންޑިޔާ ސިފައިން ރާއްޖޭގައި ތިބިކަމަށް އިދިކޮޅު މެމްބަރުން އަންނަނީ ތުހުމަތު ކުރައްވަމުންނެވެ. އިދިކޮޅުން އިންޑިޔާއާ ދެކޮޅަށް ދައްކާ ވާހަކަތަކުގެ އަޑުތައް ގަދަވެފައިވަނީ މިފަހުން އިންޑިޔާއިން ލޯނާއި ހިލޭ އެހީ ރާއްޖެއަށް ބޮޑެތި އަދަދުތަކުން ދިންފަހުންނެވެ.
