ބޯޑަރު ހުޅުވާލިފަހުން އެންމެ ގިނަ ފަތުރުވެރިން އައީ ޤަތަރު އެއާރވޭސްއިން

ރާއްޖެ ބޯޑަރު ހުޅުވާލިފަހުން އެންމެ ގިނަ ޓުއަރިސްޓުން އަންނަނީ ޤަތަރު އެއާރވޭސްއިން ކަމަށް ޓޫރިޒަމް މިނިސްޓްރީގެ ރިޕޯޓްތަކުން ދައްކައިފިއެވެ.

މި ރިޕޯޓުގައިވާ ގޮތުގައި ސެޕްޓެމްބަރ މަހުގެ ނިޔަލަށް އިންޓަރނޭޝަނަލް 9 ފްލައިޓަކުން ވަނީ ރާއްޖެއަށް ދަތުރުތައް ފަށާފައެވެ. މީގެ ތެރެއިން އެންމެ ގިނަ އަދަދެއްގެ ޓުއަރިސްޓުން ރާއްޖެ އައިސްފައިވަނީ ޤަތަރު އެއަރވޭސްގެ ފްލައިޓްތަކުންނެވެ.

ސެޕްޓެމްބަރު މަހުގެ ނިޔަލަށް ޤަތަރު އެއާރވޭސްއިން ރާއްޖެއަށް 4566 ފަތުރުވެރިން ވަނީ ދަތުރުކޮށްފައެވެ. އަދި މި މުއްދަތުގައި ޤަތަރު އެއަރވޭސްގެ 60 ފްލައިޓެއް ވަނީ ރާއްޖެއަށް ޖައްސާފައެވެ.

ދެވަނައަށް އެންމެ ގިނައިން ފަތުރުވެރިން ރާއްޖެ އައިސްފައިވަނީ އެމިރޭޓްސްއިންނެވެ. އެމިރޭޓްސްއިން ރާއްޖެއަށް 50 ދަތުރު ކޮށްފައިވާއިރު މި ދަތުރުތަކުގައި 4058 ފަތުރުވެރިން ވަނީ ރާއްޖެ އައިސްފައެވެ.

މި ލިސްޓްގައި ތިންވަނައަށް އެންމެގިނަ ފަތުރުވެރިން ގެނައި އެއާލައިންއަކަށް އޮތީ މިދިޔަ މަހުގެ 11 ވަނަ ދުވަހު ރާއްޖެއަށް ދަތުރުތައް ފެށި އޭރޯޕްލޮޓެވެ. އޭރޯފްލޮޓުން 12 ދަތުރު ކޮށްފައިވާއިރު، 1820 ފަތުރުވެރިން ވަނީ އައިސްފައެވެ.

ރަޝިއާގެ އޭރޯފްލޮޓުން ރާއްޖެއަށް ދަތުރުތައް ފެށުމާއިއެކު ރާއްޖެ އަންނަ ފަތުރުވެރިންގެ އަދަދުތަކަށް ވަނީ ހެޔޮ ބަދަލެއް އައިސްފައެވެ. ރަޝިއާ ފާހަގަކުރެވެނީ ބޯޑަރު ހުޅުވާލިފަހުން އެންމެ ގިނައިން ރާއްޖެއަށް ފަތުރުވެރިން އަންނަ ޤައުމުގެ ގޮތުގައެވެ.

ރާއްޖެއަށް އެންމެ ގިނަ ފަތުރުވެރިން އަންނަ އެއަރލައިން އަކަށް ޤަތަރުވެފައިވާއިރު ރާއްޖޭގެ ބޯޑަރު ހުޅުވާލި ދުވަހު ވޭލާނާ އިންޓަރނޭޝަނަލް އެއަރޕޯޓަށް އެންމެ ފުރަތަމަ ޖައްސާފައިވަނީވެސް ޤަތަރު އެއަރވޭސްގެ ފްލައިޓެކެވެ. ޤަތަރު އެއަރވޭސްއިން ރާއްޖެއަށް ދަތުރުތައް ބާއްވަނީ ޤަތަރުގެ ވެރިރަށް ދޯހާއިން ސީދާ ވެލާނާ އިންޓަރނޭޝަނަލް އެއަރޕޯޓަށެވެ.