ކޮވިޑް-19 އިން ރަނގަޅުވެ ޑާބީ މެޗަށް އިބްރަހިމޮވިޗް ތައްޔާރު
10 އޮކްޓޯބަރު 2020 | ހޮނިހިރު 09:12ކޮވިޑް-19 އަށް ޕޮޒިޓިވްވިކަން އިބްރަހިމޮވިޗް ހާމަކުރީ މިދިޔަ މަހުގެ 24 ވަނަ ދުވަހު
އޭސީ މިލާނަށް ކުޅެމުން އަންނަ ސްވިޑެން ފޯވާޑް ޒްލަޓާން އިބްރަހިމޮވިޗް
ކޮވިޑް-19 އިން ސްވިޑެން ފޯވާޑް ޒްލަޓާން އިބްރަހިމޮވިޗް ރަނގަޅުވެފައިވާ ކަމަށް އޭސީ މިލާނުން ހާމަކޮށްފިއެވެ.
އުމުރުން 38 އަހަރުގެ އިބްރަހިމޮވިޗް، އޭނާ ކޮވިޑް-19 އަށް ޕޮޒިޓިވްވިކަން ހާމަކުރީ މިދިޔަ ސެޕްޓެމްބަރު މަހުގެ 24 ވަނަ ދުވަހުއެވެ. އިބްރަހިމޮވިޗް ކޮވިޑް-19 އަށް ޕޮޒިޓިވްވީ ޔުއެފާ ޔޫރޮޕާ ލީގުގެ ކޮލިފައިންގައި ނޯވޭގެ ބޯޑޯ/ގްލިމްޓާ ދެކޮޅަށް މިދިޔަ މަހު މިލާން ކުޅެނު މެޗުގެ ކުރިންނެވެ.
އޭގެ ފަހުން އިބްރަހިމޮވިޗް އައިސޮލޭޝަނުގައި ހުރިއިރު، ހުކުރު ދުވަހުގެ ވަގުތެއްގައި މިލާނުން ވަނީ އިބްރަހިމޮވިޗް ކޮވިޑް-19 އިން ރަނގަޅުވިކަން ހާމަކޮށްފައެވެ. މިލާނުން ނެރުނު ބަޔާނެއްގައި ބުނީ ދެ ފަހަރުގެ މަތިން ކުރި ކޮވިޑް-19 ގެ ޓެސްޓުތަކުންވެސް އިބްރަހިމޮވިޗް ވައިރަހަށް ނެގެޓިވްވެފައިވާ ކަމަށާއި، އެއާއެކު މިލާނުގެ ސިއްހީ އިދާރާތަކުން އިބްރަހިމޮވިޗުގެ ކަރަންޓީނު ނިންމާލާފައިވާ ކަމަށެވެ.
އެހެންކަމުން އިޓާލިއަން ލީގުގައި މި މަހުގެ 17 ވަނަ ދުވަހު އިންޓައާ ދެކޮޅަށް މިލާން ކުޅޭ ޑާބީ މެޗުގައި އިބްރަހިމޮވިޗަށް ކުޅެވޭނެއެވެ.
ކޮވިޑް-19 އަށް ޕޮޒިޓިވްވުމުގެ ކުރިން އިބްރަހިމޮވިޗް ވަނީ މިދިޔަ މަހު މި ސީޒަނުގެ އިޓާލިއަން ލީގުގައި މިލާނުން ކުޅުނު ފުރަތަމަ މެޗުގައި ބޮލޯނިއާ ކޮޅަށް ދެ ލަނޑު ޖަހާފައެވެ. އެ މެޗުގައި އިބްރަހިމޮވިޗް ދެ ލަނޑު ޖެހިއިރު، 1999 ވަނަ އަހަރު ފުޓްބޯޅަ ކެރިއަރު ފެށި އިބްރަހިމޮވިޗް މިހާރު ވަނީ މިހާތަނަށް ކުޅުނު 22 ސީޒަނުގައިވެސް ލަނޑު ޖަހާފައެވެ.
މިދިޔަ އަހަރުގެ ޑިސެމްބަރު މަހުގެ ފަހުކޮޅު މިލާނާ ގުޅުނު އިބްރަހިމޮވިޗް އެ ޓީމުގައި މޮޅު ކުޅުމެއް ދައްކަމުން އަންނައިރު، މިލާނުން މިހާރު ވަނީ އިބްރަހިމޮވިޗުގެ އެއްބަސްވުން މި ސީޒަނުގެ ނިޔަލަށް އާކޮށްފައެވެ.
