މި ފަސް އަހަރުތެރޭގައި އިންސާފު ހޯދައިދިނުމަށް ވީ ވައުދު ފުއްދޭނެ ކަމުގެ ޔަގީންކަން އެބައޮތް: ސިރާޖު
މުއައްސަސާތަކުން އެކަށީގެންވާ ވަރަށް މަސައްކަތްނުކުރާނަމަ އެކަން މަޖިލީހުގެ ތެރެއިން ކުރާނެ
ފޮނަދޫ ދާއިރާގެ މެމްބަރ މޫސާ ސިރާޖު
ރައްޔިތުންނަށް އިންސާފު ހޯދައިދިނުމަށް އެމްޑީޕީން ވެފައިވާ ވައުދު މި ފަސް އަހަރު ތެރޭގައި ފުއްދޭނެކަމުގެ ފުރިހަމަ ޔަގީންކަން އެބައޮތް ކަމަށް ފޮނަދޫ ދާއިރާގެ މެމްބަރ މޫސާ ސިރާޖު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ރައްޔިތުންނަށް މިފަސް އަހަރު ތެރޭގައި ވައުދުވެފައިވާ ގޮތަށް އިންސާފު ލިބޭނެ ކަމަށް ގަބޫލުކުރައްވަންތޯ ކުރެވުނު ސުވާލަށް ޖަވާބު ދެއްވަމުން ރައްޔިތުންގެ މަޖިލީހުގެ ޖުޑީޝަރީ ކޮމިޓީގައިވެސް އިންނަވާ ސިރާޖު ވިދާޅުވީ މަޖިލީހުގައި އެމްޑީޕީގެ ސުޕަރ މެޖޯރިޓީއާއެކު މުއައްސަސާތައް ޖަވާބުދާރީ ކުރުވުމުގެ ކަންކަން ކުރިޔަށްދާ ކަމަށެވެ. މުއައްސަސާތަކުން އެކަށީގެންވާވަރަށް މަސައްކަތް ނުކުރާނަމަ އެކަން މަޖިލީހުގެ ތެރެއިން ކުރާނެ ކަމަށާއި މުއައްސަސާތައް އިތުރަށް ޚަރުދަނާ ކުރުމަށް ޤާނޫނުތަކަށް ބަދަލުތަކެއް ގެންނަމުންދާ ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ ޖުމްލަ ގޮތެއްގައި ކޯޓުތަކުން ވެސް ހެޔޮ ބަދަލުތަކެއް ފެންނަމުންދާ ކަމަށެވެ. އެގޮތުން މީގެކުރިއާ އަޅާބަލާއިރު ކްރިމިނަލް ކޯޓުގެ މަސައްކަތްތަކުގެ ސްޕީޑް އަވަސްވެ މައްސަލަތައް ބެލޭ މިންވަރު އިތުރުވެފައިވާ ކަމަށް ސިރާޖު ވިދާޅުވިއެވެ. އެެހެންނަމަވެސް ކްރިމިނަލް ކޯޓުގެ މަސައްކަތްތަކުގެ ސްޕީޑާމެދު އަދިވެސް ކަންބޮޑުވުންތަކެއް އެބަހުރި ކަމަށް ސިރާޖު ވިދާޅުވިއެވެ.
އެއީ ފަނޑިޔާރުންގެ ދަތިކަމާއެކީގައި އަންނަ ކަމަކަށް ވެސް ވެދާނެ ކަމަށާއި އެހެންނަމަވެސް މިހާރު ތިބި ފަނޑިޔާރުންނާއެކީގައި މިހާރު ޝެޑިއުލްތައް ހުންނަ މިންވަރަށް ބަލާއިރު ކްރިމިނަލް ކޯޓުގައި އެއް އަހަރަށްވުރެ ގިނަ ދުވަސްވީ މައްސަލަތައް އަންނަ އަހަރުގެ މެދު ތެރެއާ ހިސާބަށްދާއިރު ހުންނާނެ ކަމަށް ގަބޫލުނުކުރެއްވޭ ކަމަށް ސިރާޖު ވިދާޅުވިއެވެ.
މީގެއިތުރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ސުޕްރީމް ކޯޓުގެ ބެލުމުގެ ދަށުން ނެރެ ޖުޑީޝަލް ސަރވިސް ކޮމިޝަން (ޖޭއެސްސީ)ގެ ބެލުމުގެ ދަށަށް ގެނައުމާއެކު ވެސް ކުރިޔަށްވުރެ މާ ބޮޑަށް ކަންކަން ރަނގަޅުވެގެން ގޮސްފައިވާތަން ފެންނަ ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ އެމްޑީޕީގެ އެންމެ ބޮޑު އެއް ވައުދަކީ ރަނގަޅު ފަނޑިޔާރު ގެޔެއް ހޯދައި ދިނުން ކަމަށާއި އެ ވައުދު ފުއްދައިދެވެމުން ގެންދެވޭ ކަމަށް ގަބޫލުކުރެވޭ ކަމަށެވެ.
