ސުޕްރީމް ކޯޓުގެ އައު ގަވައިދު އާންމުކޮށްފި

ޒަމާނީ ބޮޑެތި، ގިނަ ބަދަލުތަކެއް ގެނައުމަށްފަހު ދިވެހިރާއްޖޭގެ ސުޕްރީމް ކޯޓުގެ އައު ގަވައިދު އެ ކޯޓުން އާންމުކޮށްފި އެވެ.

އާންމުކޮށްފައިވާ ސުޕްރީމް ކޯޓުގެ ގަވައިދުގައި ބުނެފައިވާގޮތުން، އެ ގަވައިދަށް އަމަލުކުރަން ފަށާނީ އަންނަ ހޮނިިހިރު ދުވަހުން ފެށިގެންނެވެ. މި ގަވައިދަކީ ދިވެހިރާއްޖޭގެ އެންމެ މަތީ ކޯޓުކަމުގައިވާ ސުޕްރީމް ކޯޓަށް މައްސަލަ ހުށަހެޅުމާއި، އެ ކޯޓުން މައްސަލަ ބަލައިގަތުމާއި، އެ ކޯޓުގައި މައްސަލަ ހިންގުމާއި، މިނޫންވެސް ސުޕްރީމް ކޯޓުގައި ހިންގޭ ޝަރީޢަތްތަކާއި ބޭއްވޭ އަޑުއެހުންތަކާ ގުޅޭ އިދާރީ އަދި އިޖުރާއީ ކަންކަން ބަޔާންކުރާ ޤަވާއިދުކަމަށް ބުނެފައިވެއެވެ.

ސުޕްރީމް ކޯޓުގެ ގަވައިދަށް ބޮޑެތި ބަދަލުތަކެއް ގެނެސްފައިވާއިރު، ޒަމާނީ ބަދަލުތައްވެސް ހިމަނާފައިވެއެވެ. އެގޮތުން ކޯޓު އަމުރުތައް ރައްދުކުރުމާއި ގުޅޭގޮތުން، އިލެކްޓްރޯނިކް ވަސީލަތްތައް މެދުވެރިކޮށް ކޯޓު އަމުރު ރައްދުކުރެވިދާނެކަމަށް އައު ގަވައިދުގައި ބުނެފައިވެއެވެ.

އޭގެއިތުރުން ޝަރީއަތްތައް ދުރުން ކުރިއަށްގެންދިއުމާއި ގުޅޭގޮތުން ވަކި ބަޔެއް ގަވައިދުގައި ހިމަނާފައިވެއެވެ. އެގޮތުން ޝަރީއަތްތައް ދުރުން ކުރިއަށްގެންދިއުމާއި ގުޅޭގޮތުން ނިންމުން ނިންމުމުގެ ބާރު ފަނޑިޔާރަށް ލިބިދޭއިރު، މުއާމަލާތްތައް ކުރިއަށްގެންދަންޖެހޭނީ ޓެކްނޮލަޖީގެ ވަސީލަތްތައް ބޭނުންކޮށްގެންކަމަށް އައު ގަވައިދުގައި ބުނެފައިވެއެވެ.

އޭގެއިތުރުން ސުޕްރީމް ކޯޓުގެ ނިންމުމެއް މުރާޖަޢާކޮށްދިނުމަށް އެދި ހުށަހަޅާ މައްސަލަތަކުގައި އަމަލުކުރަންޖެހޭގޮތް އައު ގަވައިދުގައި ބުނެފައިވެއެވެ. އަދި ސުޕްރީމް ކޯޓަށް ހުށަހެޅޭ ހައިކޯޓުގެ ފަނޑިޔާރުން އިޖުރާއީ ގޮތުން ނިންމާ ނިންމުންތައް ސުޕްރީމް ކޯޓުގެ ފަނޑިޔާރުންގެ މަޖިލީހަކުން ބަލައި އިޖުރާޢީގޮތުން ގޮތެއް ކަނޑައެޅުން ފަދަ ބަދަލުތައް މި ޤަވާއިދުގައި ވަނީ ހިމަނާފަ އެވެ.

ސުޕްރީމް ކޯޓުގެ އައު ގަވައިދަށް އަމަލުކުރަން ފަށާއިރު، އެ ކޯޓުގެ ފަނޑިޔާރުންގެ އަދަދަށް ފަނޑިޔާރުން އައްޔަންކޮށް ނިިމި، ކޯޓުގެ މަސައްކަތްތައް ވަނީ ފަށާފަ އެވެ. އައު ސަރުކާރާއެކު ކުރިއަށް އޮތް ސުޕްރީމް ކޯޓުގެ ފަނޑިޔާރުންގެ މަޖިލީސް ވަނީ އެއްކޮށް ބަދަލުކޮށް، ކުރިިން ފަސް ފަނޑިޔާރުން ތިއްބެވި ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް ބަދަލުކޮށްފަ އެވެ.