ލިމިޓެޑް އޯވާ ދެވަނަ ޑިވިޝަން ކްރިކެޓް މުބާރާތް ހުކުރު ދުވަހު ފަށަނީ

ލިމިޓެޑް އޯވާ ދެވަނަ ޑިވިޝަން ކްރިކެޓް މުބާރާތް ހުކުރު ދުވަހު ފަށާނެ ކަމަށް ކްރިކެޓް ބޯޑް އޮފް މޯލްޑިވްސް އިން ބުނެފި އެވެ.

ހުކުރު ދުވަހު ފެށިގެން އަންނަ މަހުގެ 20 ވަނަ ދުވަހުގެ ނިޔަލަށް ކުރިޔަށްދާ މި މުބާރާތުގައި ފަސް ޓީމު ބައިވެރިވާއިރު، 11 މެޗެއް ކުޅުމަށް ހަމަޖެހިފައިވާ ކަމަށް ކްރިކެޓް ބޯޑުން ބުނެއެވެ.

މި މުބާރާތުގައި 23 އަހަރުން ދަށުގެ ދެ ކުޅުންތެރިން ކޮންމެ ޓީމެއްގައި ހިމެނުމުގެ ފުރުސަތު ވަނީ ދީފައެވެ. އެހެންނަމަވެސް އެ ކުޅުންތެރިންނަށް ބެޓް ކުރެވޭނީ ފަސް ވިކެޓް ގެއްލުމުން ކަމަށް ކްރިކެޓް ބޯޑުން ބުނެއެވެ. މީގެއިތުރުން އެ ކުޅުންތެރިންނަށް އުކަން ފުރުސަތު ލިބޭނީ މެޗުގެ 20 އޯވަރު ނިމުމުންނެވެ. އަދި އެ ކުޅުންތެރިންނަށް އުކޭނީ އެންމެ ހަތަރު އޯވަރެވެ.

މުބާރާތް ހުޅުވުމުގެ ގޮތުން ކުޅޭ ފުރަތަމަ މެޗުގައި ބައްދަލުކުރާނީ ސީބީއެލް ސްޕޯޓްސް އަދި ދިވެހި ސިފައިންގެ ކްލަބެވެ. މި މެޗު ފެށުމަށް ހަމަޖެހިފައިވަނީ ހުކުރު ދުވަހުގެ ހެނދުނު 9 ޖަހާއިރު މާފަންނު ޓްރެކް ދަނޑުގައެވެ.