ހިތްވަރާ ޢަޒުމު އަންދާ ހުލިކޮށްނުލެވޭނެކަން ރާއްޖެޓީވީން ހާމަކޮށްދީފީ: ޝާހިދު
ރާއްޖެޓީވީ ރޯކޮށްލާފައިވަނީ 2013 ވަނަ އަހަރުގެ އޮކްޓޯބަރ މަހުގެ 7 ވަނަ ދުވަހުގަ
ރާއްޖެޓީވީ ރޯކޮށްލި ހާދިސާގެ ސީސީޓީވީ ފޮޓޯއެއް
އިމާރާތް އަނދާ އަޅިޔަށް ހެދިޔަސް، ރައްޔިތުންނަށް ތެދު ޚަބަރު ގެނެސްދިނުމުގައި ސާބިތުވެ ތިބި ބައެއްގެ ހިތްވަރާ ޢަޒުމު އަންދާ ހުލިކޮށްނުލެވޭނެކަން ރާއްޖެޓީވީން ހާމަކޮށްދީފައިވާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީ ރޯކޮށްލި ހާދިސާއަށް ހަތް އަހަރުވި ދުވަހާއި ގުޅިގެން މިނިސްޓަރ ކުރެއްވި ޓުވީޓެއްގައި ވިދާޅުވީ، ޢިމާރާތް އަންދާ އަޅިއަށް ހަދާލިޔަސް ރައްޔިތުންނަށް ތެދު ޚަބަރު ގެނެސްދިނުމުގައި ސާބިތުވެ ތިބި ބައެއްގެ ހިތްވަރާ ޢަޒުމު އަންދާ ހުލިކޮށްނުލެވޭނެކަން، އެ ޢަޒުމުގައި ދެމި އޮތް ރާއްޖެ ޓީވީން ހާމަކޮށްދީފިވާކަމަށެވެ. އަދި މިނިސްޓަރ ވަނީ ރާއްޖެ ޓީވީގެ ހިތްވަރާ ޚިދުމަތަށް އައްސަރިބަހާ ސާބަސް ވިދާޅުވެފައެވެ.
2013 ވަނަ އަހަރުގެ ރިޔާސީ އިންތިޚާބުގެ ތެރޭގައި ހިންގި މި ޓެރަރިސްޓު ހަމަލާއާއި ގުޅިގެން، ރާއްޖެޓީވީއަށާއި އެ އިމާރަތަށް ބޮޑެތި ގެންލުން ލިބުނުއިރު، ރާއްޖެޓީވީގެ މުވައްޒަފުން ބޭނުންކުރަމުންދިޔަ ހުރިހާ ތަކެއްޗެއް ވަނީ އަނދާ އަޅިއަށް ވެފައެވެ.
ރާއްޖެޓީވީން އޭރު ކުރަމުންދިއަ މަސައްކަތް ހުޓުވުމަށް ބަޔަކު އަޑީގައި ތިބެ ހިންގި މި ޖަރީމާއާއި ގުޅިގެން ތައްޔާރު ކުރި އޮޑިޓް ރިޕޯޓުން ދައްކާ ގޮތުގައި އިމާރާތަށް 1،317،430ރ. ގެއްލުން ލިބުނެވެ. ތަކެއްޗާއި ސާމާނަށް 10،339،403ރ. ރުފިޔާގެ ގެއްލުން ލިބިފައި ވެއެވެ. ރާއްޖެޓީވީއަށް ލިބުނު ގެއްލުމުގެ ޖުމްލަ ޢަދަދު 11.65 މިލިއަން ރުފިޔާއަށް އަރައެވެ.
މި ހިތާމަވެރި ހާދިސާއަށް ހަތް އަހަރު ވެގެންދިޔައިރު ވެސް މިކަމުގެ ސަބަބުން ގެއްލިގެންދިޔަ ރާއްޖެޓީވީގެ ޙައްގުތައް ހޯދައިދިނުމަށް ދަޢުލަތުގެ ކަމާ ގުޅުންހުރި އިދާރާތަކުން އެކަށީގެންވާ ގޮތެއްގައި ފިޔަވަޅު އަޅާފައިނުވާކަން ފާހަގަކުރެވެއެވެ. ރާއްޖެޓީވީ ރޯކޮށްލާފައިވަނީ 2013 ވަނަ އަހަރުގެ އޮކްޓޯބަރ މަހުގެ 7 ވަނަ ދުވަހުގައެވެ.
