ކޯވިޑް-19ގެ ޙާލަތާއި ގުޅިގެން މިހާތަނަށް ހިލޭ އެހީއާއި ލޯނުގެ ގޮތުގައި 520 މިލިއަން ޑޮލަރު ލިބިފައިވާ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ކޯވިޑް-19 ގެ ސަބަބުން ދިވެހިރާއްޖޭގެ އިޤްތިޞާދަށް އައި ލޮޅުމާ ގުޅޭގޮތުން ރައްޔިތުންގެ މަޖިލީހަށް މިނިސްޓަރ އަމީރު ޙާޒިރުކުރެއްވުމުން މެންބަރުންގެ ސުވާލުތަކަށް ޖަވާބު ދެއްވަމުންނެވެ.

"ކޯވިޑް-19ގެ ޙާލަތާއި ލޯންގެ ގޮތުގައާއި ކޮންސެޝަނަލް އެހީގެ ގޮތުގައި އަދި އެހެން ގޮތްގޮތުން އަޅުގަނޑުމެންނަށް 520 މިލިއަން ޑޮލަރު ހަމަޖެހިފައިވާ ވާހަކަ ދަންނަވަން" އިބްރާހީމް އަމީރު ވިދާޅުވިއެވެ. ނަމަވެސް މިއާ ބެހޭގޮތުން މިިނިސްޓަރ އިތުރު ތަފްސީލެއް ދެއްވާފައެއް ނުވެއެވެ.

މިނިސްޓަރު މާބޮޑު ތަފްސީލެއް ދެއްވާފައި ނުވިނަމަވެސް އިންޑިޔާއިން ސެޕްޓެމްބަރ މަހުގެ ތެރޭގައި ވެސް ރާއްޖެ އަށް ބަޖެޓު ސަޕޯޓްގެ ގޮތުގައި 250 މިލިއަން ޑޮލަރު ހަދިޔާ ކުރައްވާފައި ވެއެވެ. މި އެހީ ފޯރުކޮށްދެވިފައިވަނީ ދިވެހި ސަރުކާރަށް އެންމެ ލުއި އަދި އެންމެ ހެޔޮ ޓާމް ތަކުގެ ދަށުންނެވެ. މި ފައިސާ އަނބުރާ ދައްކަން ޖެހޭނީ 10 އަހަރުގެ ރީޕޭމެންޓް ޓެނިއާ އަކަށް ފަހުއެވެ.

މިނިސްޓަރ މަޖިލީހުގެ މެންބަރުންގެ ސުވާލުތަކަށް ޖަވާބު ދެއްވަމުން އިތުރަށް ވިދާޅުވީ މިއަހަރަށް ލަފާކޮށް ހުށައެޅި ބަޖެޓުގެ އަންދާޒާތަކަށް ވަރަށް ބޮޑެތި ބަދަލުތަކެއް އައިސްފައިވާ ކަމަށެވެ. އަދި ހިލޭއެހީ އާއި ލޯންގެ ގޮތުގައި 30 ބިލިއަން ރުފިޔާ ލިބޭނެކަމަށް ކުރިން އަންދާޒާކުރިކަމަށާއި، ނަމަވެސް މިހާރު ލިބޭނެ ކަމަށް އަންދާޒާކުރަނީ 14 ބިލިއަން ރުފިޔާ ކަމަށެވެ. އެއީ 15 ބިލިއަން ރުފިޔާގެ ދަށްވުމެއްކަން މިނިސްޓަރ ފާހަގަކުރައްވާފައިވެއެވެ.

މީގެ އިތުރުން މިނިސްޓަރ ވިދާޅުވީ އަންނަ އަހަރަށް ލަފާކޮށް ހުށައަޅާ ބަޖެޓްގައި ފަތުރުވެރިކަމަށް ބަރޯސާވާ މިންވަރު ކުޑަކޮށް ދަނޑުވެރިކަމާއި މަސްވެރިކަމަށް އިންވެސްޓްކުރުމަށް މުސްތަޤްބަލަށް ރާވާފައިވާ ކަންކަން ފެންނާކެމަަށެވެ.

މިހާލަތަކީ އެއްވެސް ވަރަކަށް އަންދާޒާކުރެވުނުވެސް ހާލަތަކަށްނުވާތީ މިކަމުން އަރައިގަތުމަށް ސަރުކާރުން ވަރަށް ގިނަ މަސައްކަތްތަކެއް ކުރަމުންދާކަމަށް ވެސް އަމީރު ވިދާޅުވެފައިވެއެވެ.