ބައިނަލްއަގުވަމީ މިންގަނޑުތަކާއި އެއްގޮތަށް ސިއްހީ ރައްކާތެރިކަން ދެމެހެއްްޓުމުގެ ފަހުމުނާމާއެއްގައި ސޮއިކޮށްފި
7 އޮކްޓޯބަރު 2020 | ބުދަ 13:47ހެލްތް އިމަޖެންސީ ރިސްކު ކޮމްޕްލިއަންސްގެ ތައާރާފެއް ވަނީ ދެއްވާފައި
އައިފެކްއާ އެމްއެންޔޫއާ ދެމެދު ފަހުމުނާމާގައި ސޮއިކުރުމުގެ ތެރެއިން
ބައިނަލްއަގްވަމީ ސްޓޭންޑަޑްސްއާ އެއްގޮތަށް ސިއްހީ ރައްކާތެރިކަން ދެމެހެއްޓުމުގެ ފަހުމްނާމާއެއް ގައި ގައުމީ ޔުނިވާސިޓީ އާއި ޔޫރަޕިއަން އިންސްޓިޓިއުޓް ފޯ އެކްސްޕޯޓް ކޮމްޕްލަޔަންސް (އެއިފެކް) އަދި އިޓަލީގެ ޔުނިވަރސިޓީ އޮފް ޓިއުރިންއާއި ދެމެދު ފަހުމުނާމާ އެއްގައި ސޮއިކޮށްފިއެވެ.
މި ފަހުމުނާމާ އަކީ "ބަލިމަޑުކަމުގެ ހާލަތުގައި ހެލްތު އިމަޖެންސީ ރިސްކް ކޮމްޕްލަޔަންސް" ޕްރޮގްރާމެއް ދިވެހިރާއްޖޭގައި ހިންގުމަށް ސޮއިކުރެވުނު ފަހުމުނާމާ އެކެވެ.
ބުދަ ދުވަހު ގައުމީ ޔުނިވާސިޓީގެ އޮޑިޓޯރިއަމް ގައި ބޭއްވި ރަސްމިއްޔާތުގައި ޔުނިވާސިޓީގެ ފަރާތުން ފަހުމުނާމާ ގައި ސޮއިކުރެއްވީ، ވައިސް ޗާންސެލާ ޑރ. މުހައްމަދު ޝަރީފްއެެވެ. އަދި އެއިފެކްގެ ފަރާތުން ފަހުމުނާމާގައި ސޮއިކުރެއްވީ ޑިރެކްޓާ ޖެނެރަލް ޗާލްސް ގިޔަކޯމާއެވެ. އެ ރަސްމިއްޔާތުގައި ޗާލްސް ވަނީ ހެލްތް އިމަޖެންސީ ރިސްކު ކޮމްޕްލިއަންސްގެ ތައާރަފެއް ދެއްވާފައެވެ.
އެއިފެކް އަކީ، ބައިނަލްއަގްވާމީ ސަލާމަތަށް ނުރައްކާ ކުރިމަތި ކުރުވާ ނިއުކްލިއާ، ބަޔޮލޮޖިކަލް އަދި ކެމިކަލް ހަތިޔާރު އިތުރުވުން، ވެޕަންސް އޮފް މާސް ޑިސްޓްރަކްޝަން (ޑަބްލިޔުއެމްޑީ)، ފިޔަވަޅުއެޅުން (އެކްސްޕޯޓް ކޮމްޕްލަޔަންސް) ފަދަ ކަންކަމާއި ގުޅޭ ގޮތުން އަމަލުކުރަންޖެހޭ ބައިނަލްއަގްވާމީ މިންގަނޑުތައް ކަނޑައަޅާ އޮގަނައިޒޭޝަނެވެ.
ތަފާތު ގިނަ ދާއިރާތަކުން ކުއްލި ހާލަތާއި ގުޅޭ ގޮތުން ނުވަތަ ކޮންމެ ބާވަތެއްގެވެސް މުހިއްމު ކަންކަމަށް އަމާޒުކޮށްގެން މިންގަނޑުތަކާއި، ގައިޑްލައިންތަކާއި، އަދި ސެޓްފިކެޓް ދެވޭނެ ނިޒާމުތައް ތަރައްގީކޮށް އަދި އީޖާދު ކުރުމުގެ އިލްމާއި ގާބިލުކަން އެއިފެކްއަށް ލިބިގެންވެއެވެ.
ކޮވިޑް-19 ގެ ހާލަތަށް ރިއާޔަތްކޮށް އެއިފެކްއިން ވަނީ ބައިނަލްއަގުވާމީ ކުއްލި ހާލަތާބެހޭ މިންގަނޑުތަކުގެ އައު ސިލްސިލާ ތަރައްގީ ކޮށްފައެވެ. އެ މިންގަނޑުތަކުގެ ސަބަބުން އޯގަނައިޒޭޝަންތަކަށް ކޮވިޑާ ދެކޮޅަށް އެންމެ އެކަށީގެންވާ ގޮތަށް މަސައްކަތް ކުރުމަށް މަގުފަހިވުމާއި، މީހުންގެ އާންމު ދިރިއުޅުމުގައި ރައްކާތެރިވުމަށާއި އަދި ސިއްހަތު ރަނގަޅުވުމަށް އެހީތެރިވެދޭނެއެވެ.
މި ސިލްސިލާގައި ހިމެނޭ ތަފާތު ދެ މިންގަނޑަކީ، ހެލްތު އިމަޖެންސީ ރިސްކް ކޮމްޕްލަޔަންސް މެނޭޖްމެންޓް ސިސްޓަމް (HER-CMS) އަދި ހެލްތު އިމަޖެންސީ ރިސްކް ކޮމްޕްލަޔަންސް މެނޭޖްމެންޓް ސިސްޓަމް ފޯ ސެނިޓައިޒޭޝަން ސާވިސް ޕްރޮވައިޑާރސް (SSP-CMS) އެވެ.
އެމްއެންޔޫއިން ބުނީ، އެއިފެކްއާ އެކު މަސައްކަތް ކުރާނީ އެ ސްޓޭންޑަޑްސްތަކަށް "ސެނިޓޭޝަން އެންޑް ހައިޖީން" އަށް ރައްޔިތުން އަހުލުވެރި ކުރުމަށާއި މިސްޓޭންޑާޑްތައް ހިފެހެއްޓުމަށް ޓްރޭނިން ހިންގާ އެކަމާއި ގުޅޭ ދިރާސާ ހެދުމަށް ކަމަށެވެ. މީގެ އިތުރުން މި ޕްރޮގްރާމްގައި ބައިވެރިވާ ފަރާތްތައް އެއިފެކް ސްޓޭންޑާޑްތައް ހިފަހައްޓާނަމަ އެއިފެކްގެ ސެޓްފިކެޓެއް ދެވޭނެއެވެ.
އެ ސެޓްފިކެޓް އަކީ އިންޓަރނޭޝަނަލް ސެޓްފިކެޓްއަކަށް ވާތީ، ހާއްސަކޮށް ފަތުރުވެރިކަމުގެ ދާއިރާއަށް، މިދުވަސްވަރު ތަނުގެ ސާފުތާހިރު ކަމާއިމެދު ފަތުރުވެރިންގެ އިތުބާރު ހޯދަން، މުހިއްމު ސެޓްފިކެޓްއަކަށް ވާނެކަމަށް ގަބޫލްކުރެވޭ ކަމަށް އެމްއެންޔޫއިން މައުލޫމާތުދެއެވެ.
